Sirr deyil ki, yeni 2016-cı ilin dünyamıza qədəm qoymasına sayılı saatlar qalıb. İnsanlarda bəzən qəribə bir hal olur bayram qabağı. Kimisi ötən ilin ona uğurlu olduğunu deyir, kimisi isə elə də qənaətbəxş il olmadığından gileylənir və Yeni ilin tez gəlməsi üçün səbrsizlənir. Hətta bir çoxumuz hesab edirik ki, gələn ili necə qarşılasaq bir il boyunca günümüz də elə keçəcək. Amma istənilən halda hər birimiz yeni ilin özü ilə bərabər uğur gətirəcəyinə ümidli oluruq. Gözlərimizdə bu ümidin işıq tək parlamasını hətta gizlədə bilmirik.  

Yeni il ”“ yeni başlanğıc, yeni həyat, yeni sevinc deməkdir. Belə bir günün gəlməsinə böyüklər qədər uşaqlar da sevincli olsa da istəklər fərqlənir. Uşaqlar daha çox yeni ildə hədiyyə və onları şənləndirəcək macəra gözləyirlər. Onların hədiyyə arzuları da müxtəlif olur yaşadıqları mühitə görə. Həm sevindirən,  həm də təəssüflə dolu olan hədiyyələr... Kimisi hədiyyə olaraq Yeni ilini həsrətində olduğu öz evində keçirməyi, kimisi isə bəlkə də geri qayıtması mümkün olmayan valideynini istəyir. Çünki insanları xoşbəxt edəcək elə şeylər var ki, həyatda onu bəzən pulla da almaq mümkün deyil. Bəlkə də buna görə bizim uşaq vaxtından eşitdiyimiz hər kəsə hədiyyə gətirən Şaxta baba reallıqda olmur. Mən həyatda möcüzələrə inanıram və əminəm ki, biz qəlbdən istəsək olar. Axı uşaqlar qədər böyüklər də nəsə gözləyir. Hədiyyə gözləyən böyüklər də sanki bir uşaq kimi olurlar, çöhrələrində sevinc hissi ilə yanaşı maraqlı bir həyəcan olur. 

Təbii hər ilin müəyyən çətinlikləri var. Lakin bu o demək deyil ki, biz o çətinliyi aşa bilmərik. Bununla dünyanın sonu deyil axı! Biz xoşbəxt yaşamaq üçün əlimizdə olan bütün imkanlarımızı artırmalıyıq. Ümid edirəm ki, bu ildə bacarmadıqlarımızı Yeni ildə həyata keçirməyə nail olacağıq. Və çalışıb ilin ilk gününə uğurla addım atmalıyıq ki, bir il boyunca bizi yalnız xoş əhval-ruhiyyə müşayiət etsin. Yaxınlarımıza, əzizlərimizə bacardığımız qədər bu sevinc payından ötürməli, çevrəmizi sanki bütün mənfi təsirlərdən təmizləyəcək o yeni nəfəsiverməliyik. Necə deyərlər sevincli olmaq ehtimalımızı təkcə özümüzə deyil ətrafımıza da bəxş etməliyik. Belə olarsa görün ilimiz necə də yaddaqalan olar!

Hər kəsin 2016-dan gözləntiləri çoxdu. Xüsusən də meymun üzərində gələcək bu ilin daha çox dinamik, maraqlı keçəcəyinə, yaddaşlarımızda sözün əsl mənasında iz qoyacağına inanıram. Əsas odur ki, biz qəlbdən inanaq və bu inamı daha da artıraq. Həmçinin köhnə ildə bizə uğur gətirməyən, zövq verməyən, ən əsası xatırladıqca pis olduğumuz işləri yeni ildə təkrar etməyək. Daha çox yenilik axtarışında olaq. Bəzən həyatımızda baş verəcək yeniliyin rəsmini çəkmək çətin olsada, fırçanın hər zaman öz əlimizdə olmağını unutmamalıyıq. Gəlin özümüz öz həyatımızın rəssamı olaq və onu yalnız gözəl rənglərə boyayaq. 

 

Yeni il biz səni səbrsizliklə gözləyirik! İnşallah ilk gəlişin möhtəşəm və uğurlu olsun xalqımız üçün. Təbəssüm və xoş günlər naminə hər şeyin olduqca parlaq keçəcəyinə inanaraq qarşılayaq Yeni 2016-cı ili.