Xaçmazın keçmiş polis rəisi Habil Cankişi oğlu Qasımovun başı yenə dərdədir. Bu dəfə “Bank Standard” QSC ilə. Bank onu əsassız olaraq məhkəməyə verib. Bu barədə Habil Qasımovun özü məlumat verib və bəzi sənədləri təqdim edib.
Keçmiş polis rəisi deyib ki, 02 avqust 2007-ci il tarixdə 60 ay müddətinə kredit və girov müqaviləsi imzalayıb. Həmin tarixdə kredit müqaviləsi üzrə öhdəliklərinin icrasını təmin etmək məqsədilə mülkiyyətində olan VOLKSWAGEN PASSAT markalı 10 VL 908 dövlət nömrə nişanlı avtomobili girov qoyub. Lakin müəyyən qədər pul ödədikdən sonra kreditin ödənməsində problemlər yaranıb. “Bank Standard” QSC qarşısında götürülən kreditin ödənilməsini girov qoyulan avtomobilə yönəldərək həmin avtomobilin açıq hərracda satılmasına və borcun satışdan olan vəsait hesabına ödənilməsinə qərar verib. Bu Bank əməkdaşları və H. Qasımovla razılaşdırılıb. Razılaşmaya əsasən bank avtomobili sataraq H.Qasımovun banka olan borcunu qapatmalı idi. Lakin sonradan, borclunun xəbəri olmadan və girov avtomobil hərraca çıxarılmadan bank işçiləri tərəfindən vəkalətnamə ilə satılıb. İllər keçdikdən sonra (2009-cu ildən 2015-ci ilə qədər) isə bank H.Qasımova qarşı Bakı Şəhər Xətai Rayon Məhkəməsində iddia qaldırıb. Bankın iddiasına görə, keçmiş polis rəisinin 28 min manat borcu yaranıb və məhkəmədən bu borcun ödənilməsi girova yönəldilməsi və girovun satılaraq bankın pulunun ödənilməsi istənilir. Halbuki, yuxarıda qeyd olunduğu kimi, avtomobil girov kimi bankın işçilərinə illər öncə təhvil verilib
H.Qasımov əməkdaşımıza deyib ki, bankın bu addımı qeyri-qanunidir. Çünki, zamanında borcun ödənilməsinin girova yönəldilməsi bankla razılaşdırlıb və avtomobil məhz həmin vaxtdan banka təhvil verilib. Lakin bank işçiləri qeyri-qanuni yollarla avtomobili bir-birinə satıblar. Girovluqda olan avtomobil qanunla satıla bilməz. Amma idarə etmək məqsədilə üçün etibarnaməsi olan Kərimov Elçin 03.08.2009-cu ildə avtomobili vəkalətnamə ilə Xankişiyev Ayaz Aydın oğluna, 18.08.2009-cu il tarixdə Ayaz Xankişiyev etibarnamə ilə avtomobili Pərviz Quliyev Vaqif oğluna, elə həmin gün Pərviz Quliyev isə 43 saylı notariat kontorunda etibarnamə ilə Quliyev Vaqif Yunis oğluna satıb. Göründüyü kimi ortada zəncirvari bir cinayət əməli var. Bankın girov saxladığı avtomobil bank işçiləri tərəfindən satılıb. Əslində avtomobilin satılmasında iştirak edən notariat kontorları da bu məsələdə məsuliyyət daşıyırlar. Bu məsələdə dəladuzluq faktı var və aidiyyatı qurumlar bu məsələni araşdırmalıdır. Müqavilənin bitməsindən 3 il, avtomobilin bank işçiləri tərəfindən satılmasından 5 il ötməsinə və avtomobili bankın öz işçilərinə satmasına baxmayaraq, bank yenidən məhkəməyə müraciət edib borcun girova yönəlməsini tələb edir. Bundan başqa qanuna uyğun olaraq kredit götürən şəxs öhdəliyini icra edə bilmədiyi zaman xəbərdarlıqdan sonra maksimum üç ay müddətində iş məhkəməyə göndərilməli idi. Hətta bu tərəfdən yanaşılsa belə müddət kifayət qədər buraxılıb.
Keçmiş polis rəisi əlavə olaraq bildirib ki, ona olan təzyiqlərin davam etməsi bir neçə gün əvvəl avtomobilinin cərimə meydançasına aparıldığı zaman onunla qaba danışan DYP əməkdaşından 102-xidmətinə şikayət etməsi və DİN-lə bağlı mətbuata açıqlama verməsidir. 
H.Qasımov qeyd edib ki, iyulun 27-də saat 09.30-da Bakı şəhər Xətai Rayon Məhkəməsində iş üzrə məhkəmə hazırlıq iclası keçiriləcək. O, məhkəmədə əks iddia qaldıracaq, maddi-mənəvi təzminat və bank işçilərinə qarşı cinayət işinin açılmasını tələb edəcək.
Qeyd edək ki, Bankın Habil Qasımova qarşı qaldırdığı iddia ərizəsinin surəti bizdədir. Məsələ ilə bağlı əməkdaşımız ötən gün bank rəhbərliyi ilə görüşüb. “Bank Standard” QSC-nin rəhbərliyi əməkdaşımıza geniş məlumat verməkdən imtina edərək, məsələnin məhkəmədə araşdırılmasının tərəfdarı olduqlarını qeyd edib. Ümid edirik ki, aidiyyatı qurumlar məsələnin araşdırılması üçün lazımi addımları atacaqlar. 

Conflict.az