Mayın 19-da səhər saatlarında Binəqədi rayonu ərazisində, metronun “Azadlıq” stansiyasının yaxınlığında 16 mərtəbəli yaşayış binasında baş verən və 15 nəfər insanın həyatına son qoyan yanğından sonra ölkənin ictimai-siyasi həyatında əsl tamaşaya start verilib. Elan etdiyi sosial rifah və təhlükəsiz yaşam siyasətinin külə dönmüş nümunəsi ilə üzə-üzə qalan hakimiyyət, öz əsəri olan bu faciənin bədəlini özgəsinə ödətmək, xalqın nəzərində aydan arı, sudan duru qalmaq üçün sözün həqiqi mənasında dəridən qabıqdan çıxmaqdadır. Binaların fasadı üçün üzlük istehsal edən “Global Construction” şirkətinin rəhbəri Miryusif Mahmudovun bir göz qırpımında həbsə qoyan mövcud rejimin nümayəndələri ”“ nazir və komitə rəhbərləri öz vəzifələrini ititrməmək üçün məsuliyyəti bir-birlərinin üzərinə atmaqda, müxtəlif bəhanələrlə öz təqsirsizliklərini ört-basdır etməkdədirlər. Halbuki, baş verən yanğın fəlakətində ən az günah payı elə həbs edilən şirkət rəhbəri M.Mahmudova məxsusdur. Çünki o, yanmaya həssas meyilliliyi olan üzlüklərin gətirilməsi və quraşdırılmasını sifariş edən, onun tərkibi və yararlılığı ilə bağlı rəy verən yetki sahibi deyil. M.Mahmudov sadəcə bu üzülülərin quraşdırılmasına həyata keçirən icraçı bir şəxsdir. Başqa sözlə desək, M.Mahmudov o şəxsdir ki, kim hansı havanı çalsa, o havaya da oynamağa məcburdur. Bu isə o deməkdir ki, əgər M.Mahmudov həbs edilirsə, o zaman başda FHN-yi olmaq şərti ilə digər nazirlik və əlaqədar qurumların ali rəhbər heyəti güllələnməlidir.
Başsağlığı var, matəm yox!
Baş verən hadisə ilə bağlı diqqət çəkən ən başlıca məqamlardan biri də
faciənin hədsiz böyüklüyünə baxmayaraq, rəsmi şəkildə matəmin elan edilməməsi
oldu. İran, Rusiya, Türkiyə və yaxın-uzaq digər ölkələrdən gələn onlarla
başsağlığı mesajına rəğmən Azərbaycanda rəsmi matəmin elan edilməməsi haqlı
olaraq vətəndaşların ciddi narazılığı ilə qarşılandı və cavablandırılması gərəkən
suallar yaratdı. Rəsmi Bakının yanğınla bağlı matəm elan etməməsi nə ilə bağlıdır?
Bir ölkədə bir olay zamanı 15 insanın ölməsi, 60-dan çox şəxsin yaralanması matəm
elan etmək üçün yetərli deyilmi? Məlum olayla bağlı bütün ölkədə matəm elan etmək
üçün ölü və yaralı sayısının daha nə qədər artması lazım idi? Bunca itki
qarşısında rəsmi şəkildə matəm elan edilməməsi dövlətin öz vətəndaşına olan
biganəliyi, etinasızlığı deyilmi?
Bəli, bütün bu sualar hələ də cavablandırılmasını gözləyən və eyni
zamanda hər kəsin cavabını bildiyi suallardır. Lakin bununla belə hakimiyyətin
və ya bu hakimiyyətdən birilərinin bu sualları açıq şəkildə cavablandırması gərəkir.
Xalq bu sualların cavabını hakimiyyətin özündən eşitməlidir. Bu xalqın haqqı,
hakimiyyətin isə borcu olan bir məsələdir.
Uşaq qatilləri
Sözügedən yanğınla bağlı ən ağrılı məqamlardan biri də hadisə zamanı
yetkin insanlarla yanaşı, bir neçə azyaşlı uşağın da həlak olması faktıdır. Hansı
ki, onlar da digər yetkin soydaşlarımız kimi məmur tamahkarlığının, pul və sərvət
hərisliyinin qurbanları oldu. Hər kəs kimi onların da ölümünə görə bütün məsuliyyət
bu dövlətin başında dayanan, onun sosial, iqtisadi, siyasi inkişafını müəyyənləşdirən,
təhlükəsizliyinə cavabdeh olan şəxslərin üzərinə düşür. Bu mənada həmin vəzifələlilərin
uşaq qatili, PKK lideri Öcalanla heç bir fərqi yoxdur. Əksinə, Öcalan öz
xalqının deyil, özgə bir xalqın - türk millətinin qanına susamışdısa, hakimiyyət
öz doğma xalqının, doğma vətəndaşlarının qanına susayıb. Və qana olan bu hərislik
hər ötən gün daha da artmaqdadır.
Sabun köpüyünə bənzər şöhrət
Binəqədi rayonunda baş verən bu yanğın bu vaxta qədər tərifi göylərə
qaldırılan, nazirlik və onun fəaliyyətindən daha çox rəhbəri olduğu şəxsin adı
ilə şöhrət tapan FHN-nin, eləcə də Səhiyyə Nazirliyinin fəaliyyətinin digər
nazirliklər kimi yarıtmaz olduğunu göstərdi.
Bu yanğın sübut etdi ki, sağlam, həqiqi gücün mövcud olmadığı anti-depokratik
rejimlərdə hansısa nazirlik və ya digər dövlət qurumunun ayrıca, əlahiddə
üstünlüyə malik olması, vətəndaşa başqalarından daha yaxşı xidmət göstərməsi
mümkün deyil. Çünki bütün bu nazirlik və komitələr eyni kök və gövdənin müxtəlif
budaqları kimidir. Kök və gövdənin gördüyü hər bir zərərin bu ağacın hər bir
budağı və hər bir yarpağında özünün hiss etdirməsi mütləqdir.
Oğru dünyasında doğru axtarışı
Baş verən yanğınla bağlı günah keçisi axtarışına gəlincə, bu günah
keçisi günahkar axtarışına çıxanların özləridir. Çünki bu ölkədə son və həlledici
bütün qərarlar məhz onlar tərəfindən verilir və bu baxımdan bütün məsuliyyət də
onların üzərinə düşür. Odur ki, digər məsələlərdə
olduğu kimi yanğın olayı ilə bağlı məsələdə də günahsız və ya ikinci, üçüncü dərəcəli
günah sahiblərinin cəzalanacağı, əsas günahkarların yenə də azadlıqda və vəzifədə
qalacağı şübhəsizdir. Əgər bir möcüzə baş versə və hakimiyyət daxilində az-çox önəm
kəsb edən hansısa bir fiqur cəzalandırılsa belə bu, yenə də bir oğrunun digər
oğrunu, bir cinayətkarın digər cinayətkarı, bir günahkarın digər günahkarı cəzalandırması
demək olacaq. Bu isə, hələ ədalət demək deyil.
Seymur Əliyev
e-mail: [email protected]