Ölkə başçısının 24 sentyabr 2014-cü il tarixli sərəncamı yenidən hərbi-dövlət sirrinin yayılmasını önləmək, bu tip informasiyaların media və sosial şəbəkələrdə ictimaiyyiləşməsinin qarşısını almaqla bağlı məsələnin aktuallaşmasına səbəb olub. Məlumat üçün qeyd edək ki, sərəncamda göstərilib ki, “Prezidentinin Administrasiyası cəbhəboyu zonada yerləşən yaşayış məntəqələrinin sakinləri arasında qoşunların dislokasiyası, hərbi-siyasi və əməliyyat şəraiti, hərbi sahədə Azərbaycan Respublikasının milli təhlükəsizliyinə xələl gətirə bilən digər məlumatların yayılmasının yolverilməzliyi barədə izahat işini təşkil edəcək”.
Ölkə
başçısının məlum sərəncamından dərhal sonra baş verənləri hakimiyyətə yarınmaq fürsəti kimi dəyərləndirən bəzi
"vətənpərvər" media təmsilçləri
və siyasətçilər dövlət və hərbi sirlərin qorunmasına bilavasitə məsul olan şəxslər kimi ictimaiyyətə ard-arda
müraciətlər ünvanlamaqda, haray-həşir salmaqdadırlar. Hansı ki, "vətənpərəvərlər
ordusunun" açıqlamalarında bir-birini təkzib edən elə aydın həqiqətlər var
ki, bu təzadlı mühakimələri qəşş etmədən oxumaq mümkün deyil.
Öncə onu qeyd edək ki, həm
rəsmi, həm də qeyri-rəsmi şəxslərin müraciətində bütün vətəndaşlara hərbi-dövlət
sirlərini yaymamaq tövsiyyə olunur ki, məsələnin bu cür qoyuluşunun özü hərbi və
dövlət sirri anlayışın mahiyyətini təkzib edir. Belə ki, istər hərbi, istərsə də
digər dövlət sirrləri ilə dünyanın heç bir ölkəsində elliklə məşğul olmurlar.
Bu sirlərlə müəyyən yetki və səlahiyyətə malik olan şəxslər işləyir ki, həmin
sirlərin yayılmamasına görə məsuliyyət də məhz bu insanların üzərinə düşür. Deməli,
burada söhbət bütün vətəndaşların deyil, yalnız hərbi-dövlət sirri ilə işləyən
yetkili şəxslərin məsuliyyətinin
artırılmasından gedə bilər ki, bunun da digər insanlara heç bir aiddiyatı
yoxdur. Başqa cür desək, bu müraciət bütün xalqa, bütün təbəqə və
kateqoriyalara ünvanlana bilməz.
İkincisi, əgər həqiqətən
də bu gün başda media təmsilçiləri olmaqla cəmiyyətin digər təbəqələri və peşə
sahibləri az və ya çox əhəmiyyət kəsb edən hansısa hərbi-dövlət sirrinə
sahibdirsə, o zaman həmin sirrin qorunmasına görə məsul olan bütün şəxslər məsuliyyətə
cəlb edilməli və qanunun bütün sərtliyi ilə cəzalandırılmalıdır. Çünki adi bir
vətəndaşın və ya jurnalsitin hansısa hərbi-dövlət
sirrinə malik olması etiraf olunursa, bu etiraf həm də həmin sirrin qorunmasına
məsul olan şəxslərin öz vəzifə öhdəliklərini yerinə yetirmədikərinin təsdiqi
kimi qəbul edilməlidir. Deməli, adi vətəndaşların hərbi-dövlət sirrinə sahib
olduğunu və bəzi hallarda bu sirri ictimaiyyiləşdirdiklərini iddia edən şəxslər bununla dövlət sirlərinin qorunmasındakı
boşluqları da təsdiq etmiş olurlar. Bu isə bir daha sirrin qorunmasına məsul
olan şəxslərin cəzalandırılması zərurətini ortaya qoyur.
Məlumat üçün qeyd edək
ki, dünyanın bir çox ölkəsində, o cümlədən İsraildə düşmən əsirliyində olan adi
əsgər-çavuş heyətinə bildiyi hər bir informasiyanı açıqlamaq icazəsi verilir və
onlar buna görə məsuliyyətə cəlb edilmirlər. Bu, onunla izah edilir ki, adi əsgərlərin
hərbi sirlə işləmək yetkisi olmadığı
üçün onlar bu sirlərdən xəbərsizdir və deməli onların söylədiyi istənilən məlumat
dövlətin hərbi təhlükəsizliyi üçün təhdidə çevrilə bilməz. Baxmayarq ki, adi
bir əsgər belə xidmət etdiyi hərbi hissənin
təyinatı, canlı qüvvə potensialı, texnikanın sayı və növü haqqında məlumatlı olur və bu məlumat da
özlüyündə az şey deyil.
İsrail örnəyi dövlətlərin
hərbi-dövlət sirrini necə qoruduğu, bu sirrə görə cavabdehliyi milyonların
deyil, konkret fərdlərin üzərinə qoyduğuna nümunədir.
Görünən odur ki, yalnız
Azərbaycanda bir və ya bir neçə nəfərin daşımalı olduğu sirr bütün xalqa, milyonlarla
insana həvalə olunur. Yalnız Azərbaycanda hərbi-dövlət sirlərinin qorunması
birgə, ictimai vəzifə kimi irəli sürülür və onu qorumalı olan şəxslər faktiki
olaraq heç bir məsuliyyət daşımır. Yalnız Azərbaycanda ölkə rəsmiləri hərbi-dövlət
sirrini yaymamaq üçün insanları yalvar-yaxır və hədə-qorxu ilə dilə tutmağa
çalışır, öz səriştəsizliklərini "düşmən amili” faktoru ilə pərdələməyə
çalışırlar.
Heç şübhəsiz ki, bu cür
anormallıqlara yalnız Azərbaycanda rast gəlmək mümkündür. O ölkədə ki, orada hər
şey - bütün hərəkət və davranışlar, fikir və bəyanatlar multfilmi xatırladır. Elə
bir multfilmi ki, onun gerçək həyat və müasir reallqılarla yaxından-uzaqdan heç
bir əlaqəsi yoxdur.
Bəli, biz multfilmlər ölkəsinin
sakinləriyik və bu baxımdan bizim hər şeyimiz, eləcə də hərbi-dövlət sirlərimizi
gizləmək, hifz etmək yöntəmlərimiz də multfilmi xatırladır. Özündə təbəssüm və
ağrını birləşdirən multfilmi.
Seymur Əliyev
e-mail: [email protected]