Yazının əvvəli---moderator.az/?xeber=50279

”¦Arvad uşaqla bərabər bir “QAZ- 66” markalı hərbi maşın da bizə yaxınlaşırdı. Bunu görən alay komandiri Elmar Hüseynov bizə əmr etmişdi ki, əlinizdəki silahları bu maşına yükləyin, silahlar mülki şəxslərin əlinə keçməsin. Düzü, biz elə bildik ki bu maşın Müdafiə Nazirliyinin maşınıdır. Birinci olaraq alay komandiri Elmar Hüseynov özü silahını maşında gələn hərbçiyə təhvil vermişdi. Bizə isə silahları bir-bir maşının küzasına atmağı əmr etmişdi. Ondan sonra Nəsirov da silahını maşına atmışdı. Biz silahı təhvil verən kimi bir dəstə əli silahlı hərbçi peyda olmuşdu və bizi mühasirəyə almışdılar. Bizə bildirdilər ki, sizin qvardiyaçılar bizim briqadanın tabor komandiri Mehman Ələkbərovu 5,45 markalı avtomatla vurublar. Bunu ayırd etmək üçün sizi əsir götürürük. Hamı bir nəfər kimi artıq əskik hərəkətlərə yol vermədən gedirik Lələnin ianına. Elmar Hüseynov birinci olaraq qabağa düşüb onların göstərişini yerinə yetirmişdi. Ondan sonra biz əli silahsız qalaraq təslim olmuşduq. Hamımızı gətirib bura doldurmuşdular.

   Artıq hava qaralmaq üzrə idi. Biz saxlanılan kazarmanın pəncərələrindən baxanda günün batdığı hiss olunurdu. Birdən biz saxlanılan hərbi hissəyə yaxın məsafədən qəfıl şiddətli avtomat atəşi eşidildi. Güllə səsi yaxın məsafədən bir neçə yerdən aramsız gəlirdi. Bu zaman bizim keşiymizi çəkən əsgərlər ora-bura qaçmağa başlamışdılar. İnsan qışqırtısının səsi hər yerə yayılmışdı. Biz elə bildik ki, hərbi hissələrin hansısa bizi azad etmək üçün hücuma keçiblər. Dəhşətli insan naləsinin səsi hər yeri bürümüşdü. Dəhlizlə qaçan hərbçilərdən biri bildirmişdi ki, qvardiyaçıları Goranboy taborunun  uşaqları və gəncəli mülki adamlar güllələdilər. Bu xəbəri eşidən zaman özümdən aslı olmayaraq elə qışqırdıb bağırmışam ki, yerə nə vaxtı yıxıldığımı bilməmişəm. Yanımdakı qvardiyaçılar məni güclə ayıltmışdılar. Çöldə maşında olub güllənənlərin içində sağ qalan qvardiyaçıları da qapını açıb bizim yanımıza salırdılar. Bu zaman yaxından daha bir aramsız atəş   səsi eşidilmişdi. Hərbi hissədə bizimlə qonşu hərbi kazarmada saxlanılan qvardiyaçıların və Milli ordu əsgərlərinin bir hissəsi bu qarşılıqdan istifadə edərək kazarmanın arxa pəncərəsini açaraq qaçmağa müvəffəq olmuşdular. Bir güllə səsi də yaxından eşidilmişdi. Bizim mühafizəmizi çəkən qapıda duran əsgərdən soruşduqda nə olub, o bildirmişdi ki, bir Milli qvardiyaçı bizə tabe olmayıb özünü öldürdü. Həmin qvardiyaçının kimliyi ilə biz maraqlandıqda bəlli olmuşdu ki, bu, Gəncənin futbol komandasında futbol oynayan gəncəlilərin sevimlisi olan “Ziko” ləqəbli futbolçu, hal-hazırda Milli Qvardiyanın xüsusi təyinatlı dəstəsində xidmət edən qvardiyaçı İsmayılov Kamaləddin Rəhim oğludur. Bizim yanımıza salınan qvardiyaçılardan soruşduqda çöldə nə baş verib onlar bildirdilər ki, komandir, sizi Surət Hüseynovun adamları əsir götürəndən sonra hər tərəfdən axışıb gəldilər. Elə bil sizin tutulmağınız barədə onlara kimcə məlumat vermişdi. Sizdən sonra bizə heç kim rəhbərlik edə bilməmişdi. Komandanın başı danışıqlara qarışmışdı. Sizin əsir götürlməyiniz ona çox pis təsir etmişdi. O sizi onların yanına göndərməyinin peşmançılığını çəkirdi. Böyük səhv etdim deyirdi. Bu arada onların qabağına çıxa biləcək bir şəxsin olmadığını hiss edən surətçilər danışıq zamanı baş prokuror İxtiyar Şirinovun onlara təhvil verilməsini tələb edirdilər. Milli Qvardiya komandanı Tahir Məmmədov baş prokurorun heç kimə təhvil verilmiyəcəyini qəti sürətdə bildirirdi. Hər dəqiqə vəziyyət ağırlaşırdı. Surət Hüseynovun tərəfdarları isə baş prokuroru tələb edirdilər. Vəziyyətin çıxılmaz olduğunu hiss edən Tahir Məmmədov İxtiyar Şirinovu gizli yol vasitəsi ilə baş prokurorun olduğu Milli Təhlükəsizlik Nazirliyinin Gəncəgəki inzibati binasının ərazisindən çıxarılması qərarına gəlmişdi. Milli Qvardiyanın iki nəfər xüsusi təyinatlı dəstəsinin üzvü olan Əlizadə Tərlan Aydın oğlu və Rəfiyev Elgün Qoca oğlu tərəfindən baş prokuror İxtiyar Şirinov inzibati binadan maneəsiz çıxarılmışdı. Sonradan aldığımız məlumata əsasən Milli Təhlükəsizlik Nazirliyinin inzibati binasından gizli yolla heç bir maneə olmadan uzaqlaşdırılan İxtiyar Şirinov yolda təhlükəsiz yerdə olduğunu hiss edib, onu müşayət edən Milli Qvardiyaçıların xidmətlərindən imtina edir. Onları geri qaytararaq özü nəməlum istiqamətdə hərəkət edir. (bu epizodun da araşdırilmasını tarixçilərin öhdəsinə buraxıram.)     

 Sürət Hüseynovun adamları ilə danşıq aparan milli təhlükəsizlik nazirinin birinçi müavini Sülhəddin Əkbərov və Milli Qvardiyanın komandanı Tahir Məmmədov onlarla belə razılığa gəlmişdilər ki, Qvardiyaçılar və Milli Təhlükəsizlik Nazirliyinin xüsusi təyinatlı dəstəsi silahı təhvil vermədən maneəsiz şəhərdən çıxırlar. Bu razılıq əsasında onlar avtobuslara minərək, Gəncədən çıxmaq istəyirdilər. Surətçilərlə razılaşma əsasında yol boyu dövlət qrumunun üzvü olan avtobusa sürücü kimi Gəncədə tanınan bir adam oturdulur. Birinci “Mersedes” markalı Milli Qvardiyaya məxsus olan avtobusa qvardiyaçıların bir hissəsi minir və yola düşür. İkinci böyük avtobus Milli Təhlükəsizlik Nazirliyinə məxsus olur. Həmin avtobusa yerdə qalan hər iki silahlı qurumun əməkdaşları, başda Milli Qvardiyanın komandanı Tahir Məmmədov olmaqla 50- dən çox əməkdaş minir. Tahir Məmmədov yerdə heç bir əməkdaşın qalmadığına əmin olandan sonra özü avtobusun qabağında ayaq üstə durub, sürücüyə şəhərdən çıxmaları barədə göstəriş verir. Birinci avtobus ikinci avtobusdan bir az tez çıxaraq Surət Hüseynovun şəxsən qərargah saldığı 709 saylı hərbi hissənin yaxınlığında Gəncə şəhərinə giriş- cıxış yolu ayrıcında surətçilər tərəfindən əvəlcədən qurulmuş məntəqədə silahlı pusquya düşürlər. Ağ hərbi masxalatla əvəlcədən təmin olunmuş bu silahlı qiyamçılar yolun hər iki tərəfində gizlənirlər. Gəncəyə giriş -çıxış yol kəsişini isə göy rəngli “VAZ 2106” markalı Jiquli maşını ilə kəsirlər. Sonradan aldığımız məlumatlara görə bu yol kənarında pusqu qurub duran silahlı hərbi və mülki formada olan qiyamçıların bir neçə nəfəri Gəncə şəhərində qatı cinayətkar sayılan şəxslərlə yanaşı Goranboy taborunun milliyətcə qarışıq olan 5-6 hərbi formalı üzvləri də olur. Onlar birinci avtobusu atəş açmadan saxlayıb hərbi hissənin içərisinə sala bilirlər. İçərisində Milli Qvardiyanın komandanı Tahir Məmmədov olan ikinci avtobus yol ayrıcına catan zaman əvəlcədən yolu kəsmək üçün hazır vəziyyətdə olan göy 06 jiquli markalı maşınla kəsilir. Avtobusun sürücüsü maşını saxlayır. Bunu görən Tahir Məmmədov həmin sürücünü sükanın arxasından götürüb çölə atır. Avtobusun əsl sürücüsü olan Milli Təhlükəsizlik Nazirliyinin əməkdaşı tez avtobusun sükanının arxasına keçib, yolu kəsən göy 06 markalı jiqulini vuraraq yolun Gəncə şəhərinə girişi istiqamətdə hərəkət edir. Bu zaman avtobusun qabağına qəflətən çıxan ağ masxalatlı hərbçi əlindəki avtomatın altında quraşdırılmış qumbaraatanla avtobusu öndən vurur. Avtobus dayanan kimi onun sağ və solunda gizlənən ağ masxalatlılar tərəfindən avtobus hər iki tərəfdən qəflətən şiddətli avtomat atəşinə tutulur. İlk güllə öndən avtobusun içində öndə olan iri cüssəli hündür boylu olan Milli Qvardiya komandanı Tahir Məmmədovun başına dəyir. O müqavimətin saxlaya bilməyib avtobusun atəş zamanı mərmi və güllədən çilik çilik olmuş ön şüşə yerindən avtobusun qabağına düşür. Avtobusun sürücüsü isə sükanın arxasındaca keçinir. Amansızlıqla qəddarcasına hazırlanmış bu terror aktı zamanı 13 nəfər yerincədə ölür, 10 nəfərdən çox əməkdaş ağır güllə yarası alır. Avtobusdan salamat çıxan karate üzrə resbublika və Avropa çempionu olmuş qvardiyaçı Hüseynov Firdövsi Hüseyn oğlu avtobusun yanında əlində pistolet tutub, avtobusdan düşən dövlət qrumunun əməkdaşlarına tərəf tuşlamış mülki formada olan üzü  şıramlı Gəncə sakinindən soruşanda ki, bizi niyə güllələyirsiniz? Həmin üzü çapıq adam ona “kəs səsini” deyib söyüş söyərək əlindəki pistoletdən Firdövsiyə atəş açır, Firdövsini əlində tutduğu güllə ilə başından vurur. Başından aldığı güllə yarasından Firdövsü yerindəcə keçinir. Güllə səsini və yaralanan insanların ah-naləsini eşidən hadisə baş verən yerin yaxınlığında yaşayan Gəncə sakinləri bu vəhşi terror aktını görüb, küçəyə tökülürlər. Evlərindən küçəyə çıxıb onlara tərəf gələn insan axınını görən ermənilərdən qorxub döyüş bölgəsindən qaçıb fərarilik edən bu canilər törətdikləri qanlı cinayət yerindən qaçırlar. Böyük insan qırğınının qarşısını alan sadə Gəncə vətəndaşları avtobusda güllələnən yaralı və ölənləri fədakarlıq edib yolda saxladıqları maşınlara yükləyib xəstəxanaya göndərirlər. Gəncə sakinləri sonradan söyləyirdilər ki, atəşə tutulmuş avtobusun sağ və sol tərəfindəki oturacaqlarda ölən və yaralı qvardiyaçıların bədənlərində ən azı hər birinin 10-15 güllə yarası yeri var idi. Bu avtobusda olub güllə yarası alan milli qvardiyanın xüsusi təyinatlı dəstəsinin üzvü olan leytenant Cabbarov Vilayət Həmid oğlunun bir qoluna 19 güllə dəymişdi. Milli Qvardiyanın başqa bir zabiti leytenant Əzimov Rövşən Salman oğlunun ayağında güllə yerindən  salamat yer yox idi. Avtobusda vəhşicəsinə güllələnmiş insanların köməyinə gələn sadə Gəncə camaatı özlərini surətçi adlandıran canilərə üz tutub deyirdilər ki, sizin vicdanınız yoxdu. Qvardiyaçılar kişilik göstərdilər, ana- bacı qədri bildilər, ermənilərə qan udduran bu cəngavərlər bizə görə sizə güllə atmadılar. Biz- arvadlı uşaqlı onların üstünə getdik, siz isə həmin vaxtı hamınız qaçıb gizlənmişdiniz. İndi isə tülki kimi üzə çıxıb bizə görə sizə güllə atmayan oğlanları qırırsınız. Siz Mehmanı özünüz arxadan vurdunuz və aranı qarışdırıb qan saldınız. O Gəncədəki 709 sayli qiyam qaldıran hərbi hissədə tabor komandiri vəzifəsində calışırdı. Əslən Gədəbəy rayonunun İvanovka kəndindən idi. Milli Qvardiyanın komandanı Tahir Məmmədov da həmin kənddən idi, onların bir-biri ilə hətta uzaq qohumluq əlaqələri vardı. Taleyin qismətinə bax ki, hər ikisi eyni gündə, eyni yerdə eyni adamlar tərəfindən güllələnib öldürüldü.Yaranmış qarışıqlıqdan istifadə edən qvardiyaçıların sıravi heyətinin bir hissəsi əsir saxlanıldıqları əsgər yataqxanasının arxa pəncərələrini sındıraraq qaça bilmişdilər. Bunu görən Surət Hüseynovun adamları orada qalan qvardiyaçıları gətirib bizim yanımıza saldılar. Avtobusda sağ qalan qvardiyaçıları da gətirib bura saldılar. Onların arasında hətta yaralılar da var idi. Həmin yaralılardan biri mənimlə birlikdə Bakıdan təyyarə ilə Gəncəyə gələn qvardiyaçı Məhərrəmov Ədalət Şirin oğlu idi. O içəri girən kimi mənim yanıma gəlmişdi. Çöldə baş verən qanlı hadisəni danışırdılar. Onlar deyirdilər ki, Kəmaləddin birinci gələn avtobusda idi. Bizi güllələyən Surətçilər birinci avtobusu yolu kəsərək hərbi hissənin içərisinə sala bilmişdilər. Onlar avtobusda olan qvardiyaçılardan silahı təhvil verməyi tələb edirdilər. Qvardiyaçı İsmayılov Kəmaləddin Rəhim oğlu bu zaman əlindəki avtomatın lüləsini çənəsinin altına sıxaraq “kişinin sözü bir olar” deyərək özünü vurmuşdu. Güllə onun çənəsindən girib başından çıxmış və həmin andaca ölmüşdü. 

     Bəli, qvardiyaçıların başına gələn bu müsübətli bəlanın bilavasitə səbəbkarlarının bir hissəsi başda alay komandiri Elmar Hüseynov və Milli Qvardiyanın qərargah rəisi Taryel Nəsirov komandir heyəti ilə birlikdə indi də mənimlə bərabər surətçilərin əsiri idilər. Bacarıqsızlıqlarının, satqınçılıqlarının acı dadını yavaş yavaş hiss edirdilər. Qvardiyaçıların güllələnməsi xəbərin eşitsək də, kimlərin ölüb, kimin yaralanmasından, hələ ki, bir -iki nəfəri çıxmaq şərti ilə xəbərimiz yox idi...

Ardı var...