Hər il Ramazan dönəmində müsəlman cəmiyyətlərində əməl məsələsi gündəmə gəlir. Və əməl dedikdə də “daha çox ibadət etmək, oruc tutmaq, qonşuya, kasıba əl tutmaq, rəftarlarında başqalarının könlünə dəyməmək” və s. kimi nümunələr önə çəkilir. Görəsən bu sadalananlar kifayətdirmi? Əgər kifayətdirsə, cəmiyyətimiz hər növbəti Ramazanda hansı əməl zəfərlərini qutlamağı haqq edir?
Moderator.az-ın əməkdaşı bu qəbildən
olan suallarla hər hansı bir dinşünas alimə, yaxud
ekspertə deyil, yazıçı-tarixi araşdırmaçı Xaqani İsmayıla müraciət edib. Səbəbsə odur ki, o, türklərin, müsəlmanların əksər coğrafiyalarda tarixi faciələrini
(soyqırımlarını) araşdırıb və bu durumlara düşməkdə müsəlmanların özlərinin məsuliyyətini,
daha doğrusu topluluq olaraq səhlənkarlıq dərəcələrini, başqa sözlə əməllərindəki
yetərsizlikləri də görə və açıqlaya bilər.
-Çox təəssüf olsun ki, əmələ çağırışlar, Sizin də
dediyiniz kimi, əsasən yuxarıdakı fəaliyyətlərlə məhdudlaşdırılmış kimi
görünür. Əgər Ramazan günahların bağışlanması və s. üçün fürsət ayıdırsa, o
zaman həm də müsəlmanlar üçün bir növ daxili hesabat ayı ola bilər. Yəni ötən
ilki Ramazan ayından növbəti Ramazanadək mömin nə kimi faydalı əməllər ortaya
qoymuşdur? Unutmaq olmaz ki, hər bir möminin həmçinin vətəni (yurdu) vardır, o,
başqa məsuliyyətləri ilə yanaşı, həm də vətəndaşdır ”“işğal olunan torpaqların
taleyi onu düşündürməlidir! O, hər hansı cəmiyyətin üzvüdür ”“həmin cəmiyyətdə
qayda-qanunun, ədalətin durumu onu qayğılandırmalıdır! O, bəlli bir xalqın
övladıdır ”“o xalqın yaraları onu sızıldatmalı, gələcəyi onu məqsədyönlü fəaliyyətə
dəvət etməlidir!
-Sizcə, bu amillərin yetərincə nəzərə alınmaması nə
ilə bağlıdır?
-Dinin və dindarın vəzifəsinin doğru təqdim
olunmaması ilə! Dünyada baş verən bugünkü proseslərdən belə nəticə çıxarmaq
olar ki, indiki əksər insanların yaşadığı əsl islam deyil ”“təqdim və mən deyərdim
ki, təlqin olunmuş “islam”dır! Yəni müsəlmançılıq idarə olunur! Və müsəlmanlar
tərəfindən deyil!
-Dünya müsəlman ölkələrinin kənardan idarə
olunduğunun bəlli məsələ olduğunu söyləyə bilərlər...
-Aydındır. Ancaq mən müsəlmanların özlərinin məsuliyyətini
önə çıxarmaq istəyirəm. Məhz müsəlmanlar onların kənardan idarə olunma
mexanizmini pozmağa çalışmalıdırlar: əlahiddə hər hansısa fəaliyyətlə deyil,
ömürlük məqsədyönlü fəaliyyət (əməl) zənciri ilə. Gəlin diqqət edək: Azərbaycanda
hansı dini fondlar var? Yoxdursa, ianələr toplamaqla bunu kim formalaşdırmalıdır?
Hansı dini icma özgür mediaya, milli kitablara, maarifçiliyə və s. təşkilati və
maddi dəstək verir. 10 dəfə Həccə getmiş həmvətənimiz növbəti ildə millətin taleyüklü
məsələləri ilə bağlı hər hansı bir layihəyə, kitaba dəstək vermək əvəzinə, yenə
də artıq vəsaitini Həccə getməyə, yaxud başqa bir arvad almağa sərf etməyə
üstünlük verir.
İndi bir az da qafil dindar qardaşlarımızın
(bacılarımızın) əməllərinin yekunlaşdığı bəzi uzaqmənzilli nəticələrə və üzərində
düşünmək gərəkən suallara diqqət edək:
1/ Müsəlmanlar basabasla Həccə gedir, Səudiyyə Ərəbistanı
varlanır, xalqı eyş-işrət içində yaşayır, dövlət sifarişli terrorçuları maliyələşdirir
və həmin pullardan milyardlarla ölçülən bir hissəsinə də (heç bir yerə atmamaq
şərti ilə ABŞ-dan silah alıb, anbarlara yığır;
2/ Məkkədə kəsilən qurbanların böyük bir hissəsi,
Türkiyə din alimlərindən birinin dediyi kimi, söyuducular yetişdirmək problemi
üzündən qoxuyur və çöplüyə atılır, qurban kəsdirən həmin hacının da öz vətənində
nə qədər ac-yalavac, həftələrlə ətə və yardıma möhtac insanlar var!
3/ Əgər müsəlmanlar doğru yoldadırlarsa, o zaman
hal-hazırda inkişaf vüsəti götürmüş çağdaş dünyanın harasındadırlar: hansı bəşəri
elmi, texnoloji və b. nailiyyətlərə imza atıblar?! (Hansı yenilikləri də mənimsəyiblərsə,
əksəri “kafir ölkələr”in nailiyyətləridir!);
4/Üstəlik Səudiyyə Ərəbistanının dini başbilənləri sağlam
və gənc cütlüklər üçün Marsa köçməyi intihara bərabər tutub “haram” elan edərək
müsəlmanları gələcək bəşəriyyətin indidən “qara dəftər”inə salıblar. Bu qadağa,
sonuc olaraq o anlama gəlir ki, bəşəriyyətin gələcəyi üçün digər planetə köçmək
zərurət olarsa başqaları indidən həmin strateji eksperimentə fədakarlar
yetişdirə bilir, müsəlmanlar isə qorxaq, yaramaz toplum olaraq insanlığın
qurtuluşu üçün fədakarlıq edə bilməz, gələcəkdə başqa xalqların hesabına hazır
təcrübədən yararlanmaqları isə “halal” olar.
Gülünc deyilmi?
Başqa sözlə, islam qorxaq, bəsirəti bağlı,
haramzada, korazehin, dünyanı qaranlıq pərdənin arxasından alatoran görən
robotların dini halına gətirilir. İslam hal-hazırda bir-birini düşman edən təriqətlərin,
daha doğrusu partiyalara bənzər icmaların vitrinində süni bəslənmiş vəhşiliklər
və qeyri-milli, qeyri-insani keyfiyyətləri özündə daşıyan qəflət ünsürləri ilə
səciyyələnməkdədir.
-Sizcə, əsl mömin müsəlmanlar bu fəlakətə aparan
gedişata necə təsir göstərə bilərlər?
-Onların sağlam hissəsi bir məxrəcə gəlməli, milli
qüvvələrlə, cəmiyyətin sağlam institutları ilə və dövlətlə səmərəli təmas və
işbiliyində olmalıdırlar. İbadət və Qurani-Kərimin fövqündə dindarlara heç kəs
lazım deyil, yəni onlar özlərini görəvləndirilmiş kimi aparan vasitəçilərdən
(“Cənnətə vəsilə olacaq” araçılardan) imtina etməlidirlər. Özəlliklə də
dindarlarımız Cümə namazlarından sonra millət, cəmiyyət və dövlətin inkişafı
üçün düşünüb-daşınıb müzakirələr aparmalı, cəmiyyətin inanılmış elm
adamlarının, yazıçı və öncül ziyalıların, milli siyasət liderlərinin, dövlətçiliyə
bağlılığı şübhə doğurmayan dövlət nümayəndələrinin və medianın yardımından
faydalanmağa çalışmalıdırlar. Bu düyünlərin açılmasında həmçinin bəzi uzaqgörən
millətlərin həyatında dinin rolunun dərk edilməsi də baxışlara müəyyənlik gətirə
bilər. Məsələn, min yeddi yüz illən artıq bir sürədir ki, ermənilərin kilsələri
və onlardan da daha qədim olan yəhudilərin sinaqoqları daha çox milli kimliyin
qorunması və milli mücadilə qalasıdır. Əsrlərlə bu xalqların dövlətçiliyi
olmadığı halda dini mərkəzlər onlara etnik immunitetin təşkilində uca məbəd
rolunu oynayıb. Həmçinin cəmiyyət, dövlət və media da bütün var gücü ilə vətəndaşın
din pərdəsi altında itirilməsinə qarşı ardıcıl, konseptual və amansız mübarizə
aparmalıdır. Yoxsa həryönlü fəlakət və islamın, insançılığın iflası bütün
coğrafiyalarda qaçılmaz olacaqdır!
-Tanrı qorusun!..