Dostlardan biri zəng vurub yayın istisində xaş yeməyin insan orqanizmi üçün öldürücü təsirə malik olduğunu deyəndə hansı simə vurduğunu anladım. Onu yola verəndən sonra sonuncu köşəmə-“Xaş yarmarkası”na baxanda 16 iyunda yazdığımı görüb nədənsə iyulda Kürdəmirdəki girdirmə kafelərin birində xaş yemiş sərnişin kimi qan-tərə batdım xəcalətimdən...
Amma gərək dostlar məndən inciməsin.
İmkansızlıq yaman dərddir. Yox, tələsməyin, pulu-malı nəzərdə tutmurdum,
bunlardan dərd çəkən deyiləm, çünki açığı, nə zamansa qədərindən artıq olmayıb
ki, indi də yoxluğunun xiffətini çəkəm. Mən bəlli səbəblərdən vaxt məhdudluğunun
korluğun yaman çəkirəm son aylarda...
Amma söz verirəm ki, ən azı ayda bir köşə
yazacam, qarabağlılar demişkən, gündə Moderator.az-da yazdığım 4-5 yazı “kov”
deyilmiş sizlər üçün...
Xülasə, bu dəfə neçə gündü bir ağsaqqaldan
eşitdiyim sözlə bağlı gözünüzə zəhmət verəcəm. Amma bəri başdan zəmanət verirəm
ki, oxuduğunuza peşman olmayacaqsınız.
Öncə ondan başlayım ki, nədənsə hər dəfə metronun
xidmətindən istifadə edib harasa gedəndə qeyri-ixtiyari ölkədəki fontanvari
iqtisadi inkişaf nağıllarını xatrılayıb öz-özümə donquldanıram ki, ay sizin dəymişiniz
qalan yerdə kalınız tökülsün, inkişaf budur? Sonra da suala özüm cavab olaraq
Süleyman Rüstəmi xatırlayıram və “inkişaf görmək istəyən metroya gəlsin” deyə-deyə
yerin altında məxsusi hazırlanmış bu qaynar cəhənnəmdən qurtulmağa çalışıram. İllərdi
bu millətə yerin üstündə zülm edib altında nəfəsin yandırırlar. Hər dəfə də
donqli əsaslar gətirərək ittihamlardan sapınmağı bacarırlar. Amma milyarder bir
ölkədə vətəndaşına belə zülm edən, hər gün yüz minləri özünə söydürən hökumətin
Tağı Əhmədov demişkən, vallah-billah burcutmağa yeri yoxdur. Nə böyük işdir ki,
metro vaqonlarına və stansiyalara soyutma sistemləri quraşdırmaq? Gərək burdan
da qazanc götürəsiniz? Qoy bu sahə də rentabelli yox, dotasiya ilə işləsin,
kasıb düşəcəksiniz, ay filankəslər...?
Bilənlər bilir, söyənlər söyür, xəbəri
olmayanlara ərz edim ki, 26 il fasiləsiz Bakıda yaşayan və hər zaman metrodan
istifadə edən bir şəxs kimi getdikcə bu nəqliyyat növünün cəhənnəmə
çevrildiyini, vaqonların nasistlərin ölüm kameralarından betər isti və havasız
olduğunu görüb, hiss edib millətə bu məşəqqəti yaşadanları aşağıdan yuxarı,
soldan sağa söymədiyim yerləri qalmır...
Yeri gəlmişkən, ağsaqqalın fikirlərini
yazmazdan öncə bir epizodu xatırladım ki, metrodakı dəhşətli istidən halı pisləşən,
mənzil başına çatmayıb vaqonu yarımçıq tərk edən onlarla adam gördüm bu Müqəddəs
Ramazan günlərində. Bu hələ harasıdı, nəinki
qışın küləkli-çovğunlu günlərində, elə indilərdə də metrodan açıq havaya çıxıb
temperatur fərqindən axşam özünü bankaladan, yaxud yolüstü aptekdən dərman almağa
məcbur olan minlərlə sərnişin var...
Nəhayət, gəlib çatdıq ölkədəki anoloqsuz
inkişafın və neft kapitalını insan kapitalına çevirən hökumətimizin mətəsinə.
Bu günlərdə Bərdədə yaşı 70-i ötmüş bir taksi sürücüsüylə bir müddət yol
yoldaşı olduq və aptekdən dərman aldığıma işarə edərək bir misal çəkdi ki,
qapıbir qonşusu vaxtilə aptekar olub və hər dəfə də gileylənirmiş ki, saatlarla
qapını açıb bir qarın və ya baş ağrısı, yaxud bint də soruşan olmurmuş, həmişə
də gileylənirmiş ki, ay başına dönüm, bu boyda qos-qoca Bərdədə xəstələnən
olmur...? Ağsaqqal həmin misalı çəkib deyirdi ki, 50 ilə yaxındır taksi sürür, əvvəllər
rayonda cəmisi 2-3 yerdə aptek olduğu halda indi hər küçədə 20-30 aptek var və
hər birində də növbədir...
O saat barmağımı dişləyib niyə metro
vaqonlarına və stansiyalarına soyutma sistemi quraşdırılmamasının cavabını
tapdım. Bəs o zaman mövcud illik dövriyyəsi milyardlarla ölçülən dərmanları kim
alar ki...?