İki il əvvəl bu günlərdə Qarabağdaydım. Şuşanın işğal günündə Paşinyanın rəhbər kimi ilk dəfə Qarabağa gəlib Şuşada bayram etməsini, bizimsə tam sükutla bunu qarşılamağımızı, cəbhə xəttindəki ölü səssizlik əsəblərimi həqiqətən tarıma çəkmişdi. Şuşa 26 il idi işğalda olmasına baxmayaraq, Paşinyanın sərbəst şəkildə Şuşaya gəlib Cıdır düzündə Zori Balayanla birlikdə oynamasını görəndə elə bildim ki, Şuşa sanki yenicə işğal olunub. Əsəbimi sözlərimə töküb sosial şəbəkədə yazdım ki, Paşinyan bizə qorxaq deyib. Deməmişdi, amma bununla mən səssizliyimizə əsəbləşib, özümüzü qınağa doldurmaq istəmişdim. Əksinə oldu. Ölkə mətbuatının üzqarası hesab etdiyim bəzi saytları üstümə qısqırdıb, Paşinyanı müdafiə etdirdilər, onun belə bir söz demədiyini təkrar-təkrar vurğuladılar. Mənə  saxta vətənpərvər deyib təhqir etdilər. Bunu yazanların (onlar jurnalist deyil) yal yandaşı olduğunu bütün ölkə bilir. Sahiblərindən aldıqları təlimatlara və payın miqdarına uyğun olaraq, guya bunlara məsləhət verən, adının çəkilməsini istəməyən vəkilə əsaslanıb ölkə mətbuatına çağırış etdilər ki, bu adamı ictimai rəydən uzaq tutmaq lazımdır, çünki Paşinyanın demədiyi sözü deyib. Yalançıdır! Bu bədbəxtlər bilmədi ki, Paşinyanın düşmən ölkənin rəhbəri statusunda ilk dəfə Şuşaya gəlişi elə ən böyük söyüş idi, mütləq deyildi ki, sözlə ifadə etsin...

 

Keçən il Paşinyan yenə Şuşanın işğal günündə gəlib Cıdır düzündə yallı getdi, bu “yekə vətənpərvər yazarlar”isə ən asan işi gördülər- Paşinyanı söydülər. Azərbaycanda  bu gün ən asan iş ermənini söyməkdir. Söyüləsi isə bizik ki, 28 ildi Şuşanı, Qarabağı azad edə bilmirik. Bizə “qorxaq” deməyən Paşinyan bizim “cürətimizdən” cürətlənib keçən il avqustun  5-də Qarabağın ortasında dedi ki “ Qarabağ Ermənistandır və nöqtə”. Həmin yal yandaşları yazdılar ki, “Paşinyan beynəlxalq hüququ pozur,  BMT qətnamələrini saymır”. Paşinyanın, ya qeyri “yanın” çox vecinədi BMT qətnamələri, ya beynəlxalq hüquq normaları. Oturublar Qarabağda, heç kəs də heç nə deyə bilmir, çünki deyəsi, hərəkət edəsi bizik, biz də məlum... 

Bu il Paşinyan 8 may Şuşanı işğal etdikləri gün Qarabağa gəlməkdən qorxur. Yox əşşi, biz yox, biz qorxutmamışıq, bizdən qorxmur, koronavirusdan qorxub gəlməyəcək. Biz indiyəcən Ermənistanın Şuşaya gələn hansı rəhbərini qorxutmuşuq ki, indi də Paşinyan bizdən çəkinə. Koronavirusa təşəkkür düşür. Amma, sabaha hələ çox var, birdən gələ də bilər...

Amma, mən istərdim ki, o “birdən”i bizim Müdafiə Nazirliyi etsin. Allah eləsin  o “birdən” baş versin, sabah oyananda eşidək ki, ordumuz hücuma keçib, düşmənə dərs verib, döyüşlər başlayıb və bu döyüşlər “may döyüşləri” adını alsın, amma qələbə ilə bitən döyüş olsun. Ordumuz da məni yalançılıqda suçlasın ki, bax, hücum etdik, sakit dayanmadıq, Şuşanın işğal günü düşmənin başına od ələdik, sən yalan yazmısan. Ya Allah, məni yalançı çıxar, qoy ordumuz Şuşanın işğal günü düşmənin başına od yağdırsın!!!