“Zerkalo” qəzetinin 9 iyul tarixli sayında keçmiş millət vəkili Gültəkin Hacıbəyli ilə bağlı məqalə dərc olunub. Həmin məqaləni qısa ixtisarla təqdim edirik.
6 iyul tarixində qəzetimizdə ”Gültəkin Hacıbəyli Avropa məhkəməsinə qədər getmək fikrindədir" adlı məqalə çap edilmişdi. Məqalədə biz, Milli Məclisin keçmiş deputatı, Demokratik Qüvvələrin Milli Şurasının üzvü Gültəkin Hacıbəyli və onun keçmiş həyat yoldaşı, əvvəllər Respublika prokurorluğunda müstəntiq vəzifəsində çalışmış Mahmud Mehdiyev arasındakı məhkəmə prosesindən bəhs etmişdik.
Xatırladaq ki, Moderator.az-ın araşdırmalarına görə, Mahmud Mehdiyev hərbi biletinin saxtalaşdırılmasına görə Ağdaş rayon prokurorluğunun baş müstəntiqi vəzifəsindən kənarlaşdırılmışdır.
Xatırladaq ki, bu ilin 4 iyulunda Nəsimi Rayon Məhkəməsi Gültəkin Hacıbəylinin oğlu Toğrulun həftədə beş gün saat 16:00-dan 21:00-a qədər atası ilə qalması haqqında qərar çıxarmışdı. Bundan əlavə, ataya həftədə bir dəfə bütün gün ərzində oğlu ilə birlikdə olmaq haqqı da tanınmışdı. Gültəkin Hacıbəylinin “Zerkalo”ya bildirdiyinə görə, bununla da Nəsimi məhkəməsi faktiki olaraq, oğlunun ondan alınması haqqında qərar çıxarıb.
Gültəkin Hacıbəyli qeyd etmişdi ki, “səhər saat 8.00-da oğlum məktəbə gedir. 16:00-da dərsdən qayıtdıqdan sonra o, 21:00-a qədər atası ilə olmalıdır. Bundan əlavə, atası həftədə bir dəfə bütün günü onu özü ilə apara bilər. Belə çıxır ki, mən də uşaqla heç olmasa eynilə gündə beş saat ünsiyyət saxlamaq imkanı əldə etmək üçün onu məktəbdən çıxarmalı və bununla da oğlumu təhsil hüququndan məhrum etməliyəm”.
Keçmiş deputat qeyd etdi ki, Nəsimi Rayon Məhkəməsinin qərarı ilə barışmaq niyyətində deyil və övladının haqlarının müdafiəsi naminə Avropa Məhkəməsinə qədər gedib çıxmağa hazırdır.
Onu da qeyd edək ki, bu il mayın 17-də haqqin.az saytında “Gültəkin Hacıbəyli və Anna Karenina” başlıqlı məqalə çap olunmuşdu. Məqalə müəllifi Mahmud Mehdiyevin sözlərinə istinadən iddia edir ki, Gültəkin Hacıbəylinin keçmiş ərinin prokurorluqdan xaric edilməsi keçmiş deputat tərəfindən ona qarşı qisasçılıq idi.
“Qeyri-məhdud hakimiyyətin şirinliyini dadmış hökmran despot qadın üçün adi bir müstəntiqlə haqq-hesab çəkmək çətin olmadı. O qadın, əlbəttə ki, müstəntiqə qalib gəldi. Bu, nəticəsi əvvəlcədən bəlli olan apriori döyüşdür.
Mahmud Mehdiyevi Mütəşəkkil Cinayətkarlıqla Mübarizə İdarəsində sorğu-sual edirlər (!), onu prokurorluqdan, qardaşı Seymur Mehdiyevi isə Vergilər Nazirliyindən qovurlar. Sabunçu rayonunun polis idarəsində xidmət etmiş üçüncü qardaş Allahverənin taleyi tükdən asılı qalır... Amma burada nazir qüdrətli deputatın sözü ilə oturub-duran digər insanlardan fərqli olaraq daha ədalətli olub"- deyə məqalədə bildirilir.
Qüvvədə olan qanunvericiliyə əsasən, Baş prokuror özünün tabeçiliyində olan qurumlarda kadr siyasətini müstəqil şəkildə müəyyənləşdirir. Lakin əgər yuxarıda qeyd edilən materiala inansaq, tabeçiliyində olan qurumda kimin işləyə biləcəyini heç də Baş Prokurorluğun rəhbəri müəyyən etmir. Baş prokurorun əvəzinə qərarları Milli Məclisin deputatı qəbul edirmiş. Biz də Mahmud Mehdiyevin işdən azad olması ilə bağlı qərarın doğurdanmı Gültəkin Hacıbəylinin müdaxiləsi nəticəsində qəbul edildiyini müəyyənləşdirmək qərarına gəldik.
Cavab üçün biz, Mahmud Mehdiyevin özünə müraciət etdik. “Press-konfransın materiallarına baxın. Orada hər şey təfsilatı ilə yazılıb”- deyə Mahmud Mehdiyev bildirdi. “Siz bildirmisiniz ki, işdən azad edilməyinizlə bağlı qərar Gültəkin Hacıbəylinin təzyiqi ilə qəbul edilmişdir"- deyə müxbirimiz soruşdu. “Bəli, mən bunu bildirmişəm” - Mahmud Mehdiyev dedi. “Belə çıxır ki, Baş prokuror sizi Gültəkin Hacıbəylinin göstərişi ilə işdən azad edib?”- deyə müxbirimiz növbəti sualla müraciət etdi. “Mən bilmirəm, kim kimin göstərişini yerinə yetirib. Ancaq mənim işdən azad edilməyim Gültəkin Hacıbylinin təzyiqi ilə baş verib” - deyərək M.Mehdiyev dəstəyi asdı.
“Əgər Gültəkin Hacıbəylinin keçmiş həyat yoldaşına inansaq, belə çıxır ki, Baş Prokurorluq özünün qərarlarında o zamanlar sıravi deputat olmuş Gültəkin Hacıbəylinin rəyindən çıxış edirdi”- deyə Helsinki Vətəndaş Assambleyasının Azərbaycan Milli Komitəsinin rəhbəri Arzu Abdullayeva bildirdi. Hüquq müdafiəçisinin sözlərinə görə, Mahmud Mehdiyevin bəyanatı həqiqətə uyğun deyil. “Sıravi deputat Baş prokurora necə təzyiq göstərə və ona necə qərarlar verməsi barədə göstəriş verə bilərdi?”- deyə Arzu Abdullayeva sual verir. Hüquq müdafiəçisi onu da qeyd etdi ki, onun zənnincə, Gültəkin Hacıbəyli, sadəcə olaraq, belə hərəkətlərə qadir deyil.
“Mən hesab edirəm ki, Mahmud Mehdiyev, sadəcə olaraq, Milli Şura üzvünə böhtan atır”- deyə o, “Zerkalo”ya bildirdi.
Hüquq müdafiəçisi Ələkbər Məmmədov Mahmud Mehdiyevin söylədiklərini belə şərh etdi: “Əgər onun dediklərinə inansaq, Baş prokurorluq, Konstitutsiyanın tələblərinin ziddinə olaraq, ölkə başçısının deyil, Gültəkin Hacıbəylinin tabeçiliyi altındadır. Onun ifadələri əsasında belə bir nəticəyə gəlmək olar ki, Baş prokurorluğun rəhbərləri heç də qanuna istinad etmirlər, bu və ya digər deputatın rəyindən çıxış edirlər. Mən hesab edirəm ki, məhz, Mehdiyevin söylədikləri həqiqətə uyğun deyil”.
Biz həmçinin keçmiş deputat Gültəkin Hacıbəylidən də Mahmud Mehdiyevin söylədikləri ilə bağlı mövqeyini bildirməsini xahiş etdik.
“2003-cü ildə mən Baş Prokurorluq rəhbərliyinə o zaman həyat yoldaşım olan Mahmud Mehdiyevin Nizami rayon prokurorluğundan Bakı prokurorluğuna keçirilməsi ilə bağlı müraciət etdim. Sağ olsunlar ki, Baş prokurorluq rəhbərliyi xahişimi yerə salmadı. Bu, qətiyyən qanuna zidd deyildi”- deyə o, “Zerkalo”ya bildirdi.
“Lakin Baş prokuror mənim tələbimlə Mahmud Mehdiyevi tutduğu vəzifədən azad edə bilməzdi. Çünki o mənim tabeçiliyimdə deyildi və müvafiq surətdə, mən ona belə tələblərlə müraciət edə bilməzdim. Mənim təzyiqim nəticəsində tutduğu vəzifədən azad edilməsi ilə bağlı bəyanat verməklə Mahmud Mehdiyev, faktiki olaraq, Baş prokurorluq rəhbərliyini vəzifə cinayətində ittiham edir. Belə ki, bu və ya digər şəxsi qanunsuz olaraq işdən azad etmək bilavasitə vəzifə cinayətidir”- deyə G.Hacıbəyli bildirdi.
Keçmiş deputat bəyan etdi ki, Azərbaycanda müstəqil məhkəmə sistemi yaradıldıqdan sonra, o, mütləq Mahmud Mehdiyevin atdığı böhtanlara görə məsuliyyətə cəlb olunmasına nail olacaq.
“Bu həmçinin Mehdiyevin sözlərinə istinadən ünvanıma böhtan yağdıran KIV-lərə də aiddir”- deyə o, “Zerkalo”ya bildirdi. O, bəzi saytların Mahmud Mehdiyevin onun göstərişi ilə işdən çıxarılmasına dair informasiyanı tirajlamasına təəccübləndiyini dilə gətirdi. "Axı bununla onlar həm də Baş prokurorun vəzifə cinayəti törətməsi faktını iddia edirlər"- deyə o, “Zerlako”ya dedi.
Biz Mahmud Mehdiyevin söylədiklərini şərh etmək üçün Baş Prokurorluq mətbuat xidmətinə müraciət etdik. Baş prokurorluq mətbuat xidmətinin rəhbərinin cavabı lakonik oldu: “Baş prokurorluq öz qərarlarını müstəqil şəkildə və qanun çərçivəsində qəbul edir, heç kimin sifarişlərini yerinə yetirmir”.
Bu şərhi əldə etdiyimizdən dərhal sonra Mahmud Mehdiyev özü bizə zəng etdi və dedi ki, “Zerkalo”nun müxbiri onu dolaşığa salıb.
“Mən axı sizə dedim ki, bu haqda mən keçirdiyim mətbuat konfransında təfsilatı ilə bildirmişəm. Siz isə məndən soruşdunuz ki, mənim işdən azad olunmağımla bağlı qərarın Gültəkin Hacıbəylinin təzyiqi ilə qəbul edilməsi haqqında bəyanat vermişəmmi? Beləliklə, siz məni tamamilə çaşdırdınız. Mən onu bildirmək istəyirəm ki, mənim prokurorluq orqanlarından xaric olunmağım heç bir halda Gültəkin Hacıbəylinin təzyiqlərilə əlaqəli deyil”- deyə o, “Zerkola”ya bəyan etdi.
“Axı, siz özünüz dediniz ki, sizin işdən xaric olunmağınız Gültəkin Hacıbəylinin təzyiqi ilə baş vermişdir...”- deyə müxbirimiz xatırlatdı.
“Mən bir daha bəyan edirəm ki, mənim işdən xaric olunmağımın Gültəkin Hacıbəyli tərəfindən təzyiqlərlə heç bir əlaqəsi yoxdur”- deyə Mahmud Mehdiyev bildirdi.
