İyunun 14-də Nemət Pənahlının Qobustan həbsxanasına köçürülməsi haqda qərar qüvvəyə minib. Bu qərar 17 saylı Cəzaçəkmə Müəssisəsi rəisinin təqdimatı əsasında qəbul edilib.

Həcər Pənahlı bildirib ki, iyunun 19-da 17 saylı Cəzaçəkmə Müəssisəsinə zəng edib: “Mənə dedilər ki, Nemətə yemək gətirin, götürəcəyik. Hazır getdim. Müəssisədən dedilər ki, iyunun 18-də Neməti Qobustana köçürüblər. Bu necə müəssisədir ki, iki işçinin bir-birindən xəbəri yoxdur?

Qobustandan məlumat aldım ki, Nemət 14 gün müddətində karantində tək saxlanacaq, heç bir əlaqə ola bilməz. Neməti elə tez-tələsik çıxardıb aparıblar ki, nə zəng etməyə imkan veriblər, nə də görüşə icazə veriblər. Ombudsman Aparatının şöbə müdiri Vüqar Məhərrəmovdan xahiş etdim ki, Nemətin yanına getsin, amma getməyə imkanı olmadı. Vəkilimiz Elçin Əliyevlə isə əlaqə qura bilmirəm”.

Penitensiar Xidmətin ictimaiyyətlə əlaqələr şöbəsinin rəisi Mehman Sadıqov “Media forum”a deyib ki, Nemət Pənahlı Qobustana köçürülübsə, 14 gün karantində qalmalıdır: “Orada vəkili ilə hər gün görüşmək ixtiyarı var. Qüvvədə olan qanunvericiliyə əsasən, məhkum 14 gün ərzində həkim müayinəsindən keçirilir, həmin müddət ərzində Qobustan həbsxanasında çalışan müxtəlif xidmət sahələrinin əməkdaşları ona həbsxanada saxlanma qaydaları haqqında məlumat verirlər. Nemət Pənahlı cəzaçəkmə müəssisələrindən keçirilmiş məhkumlara dair korpusların birində saxlanacaq”.

Milli azadlıq hərəkatının öncül simalarından olan Nemət Pənahlı 2011-ci il yanvarın 8-də tutulub, xuliqanlıq və qəsdən sağlamlığa az ağır zərər vurma ittihamı ilə 6 il müddətinə azadlıqdan məhrum edilib.