Yadınızdadırsa, 2016-cı ilin sonunda Moderator.az planetin ən qüdrətli və məşhur transmilli super-klanlarından olan Rotşildlərin guya Azərbaycanı xaosdan qoruması iddia olunan yazı dərc etmişdi: “Azərbaycanı xaosdan Roşildlər qoruyur...”(bax: moderator.az/news/162980.html)...
Təxminən 10 ay sonra - 2017-ci ilin oktyabrında bu dünya şöhrətli ailənin 7 nümayəndəsi Bakıda oldu, Əlyazmalar İnstitutunu ziyarət etdi, bir sıra qədim əlyazmalarla maraqlandı (moderator.az/news/195288.html)...
Bu gəliş sanki yuxarıdakı iddianın gerçəkliyinə bir işarə oldu. Doğrudan da belə bir milyarder yox, trilyoner sülaləsi üzvlərinin Azərbaycana səfəri təsadüf ola bilməz. Araşdırmalarımızdan bəlli oldu ki, Rotşidlərin Azərbaycana qədim bir qohumluğu olması haqda fərziyyələr mövcuddur...
Onu da xatırladaq ki, 2018-ci il iyulun 20-də Fransada səfərdə olan Azərbaycan prezidenti İlham Əliyev burada Prezident Emmanuel Makron və digər siyasətçilərlə yanaşı, Fransız biznesinin elitası, böyük şirkətlərin rəhbərləri ilə də görüşlər keçirib. Dövlət başçısının görüşdüyü şəxslərdən biri «Rothschild and Co» şirkətinin Müşahidə Şurasının sədri Devid de Rotşild olub. Görüşdə Azərbaycan ilə “Rothschild and Co” şirkəti arasında əməkdaşlıqla bağlı məsələlər müzakirə edilib, bu əməkdaşlığın bank sektorunda, özəlləşdirmə sahəsində genişləndirilməsinin zəruriliyi vurğulanıb. Devid de Rotşild babasının(Alfons Rotşild-S.L.) vaxtilə Azərbaycanda uğurlu fəaliyyət göstərdiyini, onun da bu ənənəni davam etdirmək niyyətində olduğunu bildirib...
Əslində güclünün haqlı sayıldığı çağdaş dünyada Rotşildlərin Azərbaycana qohumluğu Vətənimiz üçün bir yandan çox müsbət amil olardı.
Bəs fərz edilən həmin qohumluğun tarixi kökləri haralara gedib çıxır? Azərbaycanda Rotşildlərlə eyni nəslin genlərini daşıyanlar kimlərdir?
“Azərbaycan ərazisində yaşamış Aşkinaz adlanan yəhudilərin də əsilləri türk olub?..”
Rotşildlərin Azərbaycanla biznes əlaqəsini təsdiqləyən ilk tarixi fakt kimi 1883-cü il mayın 16-da Alfons Rotşild tərəfindən Bakıda «Xəzər –Qara dəniz neft sənayesi və ticarət cəmiyyəti» (qısaca«Xəzər – Qara dəniz cəmiyyəti») adlı yeni bir şirkət təsis olunmasını göstərmək olar. O vaxtdan təxminən 1912-ci ilədək Rotşildlər Bakı neftinin xeyli hissəsinə nəzarət edə biliblər. 1897-1907-ci illərdə Bakı-Batum neft kəmərinin çəkilməsində də Rotşildlərin böyük rolu olub. Bu haqda Azərbaycan mediasında çox bəhs edilib...
Rotşildlərin Azərbaycan xalqı ilə bilavasitə tarixi qohumluğu iddia edilən həqiqətə yaxın fərziyələr əsasən VII - XI əsrlərdə Xəzər dənizinin ətrafında, Van gölündən Qara dənizə və Kiyevə, Aral gölündən Macarıstana qədər olan torpaqlarda hökm sürmüş türk dövləti hesab edilən Xəzər xaqanlığıyla bağlıdır. Tarixdən bəlli olduğu kimi, xaqanlıq əyanlarının hamısı din kimi İslamı qəbul etməyib, onların bir hissəsi yəhudi (iudaizm) dinini yaymağa başlayıblar. Xəzər xaqanı Obadi 790-cı ildə iudaizmi xaqanlığın rəsmi dini elan edib...
Bəzi mənbələrə görə, Xəzər xaqanlığında, deməli, həm də Azərbaycan ərazisində yaşayan Aşkinaz adlanan yəhudilərin də əsilləri türk olub. Yəni onlar sonradan iudaizmi qəbul etmiş türklərdir. Amma Xəzər xaqanlığının yıxılmasından sonra həmin yəhudilər Avropa ölkələrinə köç etmişlər. 60 mindən artıq Aşkinaz yəhudiləri Azərbaycana gəlmiş və burada onlar dağ yəhudiləri adı ilə yaşamaqdadırlar...
O da məlumdur ki, Xəzər xaqanlığının dağılmasının başlanğıcını 965-ci ildə Kiyev knyazı Svyatoslavın hücumu qoyub. Xəzərlərlə slavyanlar arasında bir çox müharibələr olduğundan bu mövzu Rusiya alimləri tərəfindən daim tədqiq edilib. Belə tədqiqatçılardan biri olan Rusiya Silahlı Qüvvələri Baş qərargahı hərbi akademiyasının kafedra müdiri, politoloq Tatyana Qraçovadır. O, bütövlükdə yəhudi-iudey dövləti hesab etdiyi Xəzər xaqanlığı barəsində “Görünməz Xəzəriyyə”, “Müqəddəs Rus Xəzəriyyəyə qarşı” adlı kitablar yazıb. Məhz həmin əsərlərdə T. Qraçova iddia edir ki, Rotşildlər nəsli Xəzər boyundan Avropaya qaçmış yəhudi inanclı xəzərlərin nəslindən törəyib. Və məlum olduğu kimi, Xəzər xaqanlığı Azərbaycanın həm quzey, həm də güney hissəsini xeyli müddət nəzarətdə saxlayıb. Bəzi Azərbaycan tədqiqatçıları, o cümlədən Firudin Cəlilov isə təkidlə Azərbaycan türkləri ilə Xəzərlər arasında böyük bir soykök bağlılığını, Xəzər imperiyasının isə əslində hələ eramızdan əvvəl 1-ci minillikdən bəri mövcud olmuş bir Azərbaycan-türk dövləti olduğunu bildirirlər. Əgər Avropaya köçmüş Aşkenazi yəhudilərinin mənşəcə türk olduğunu da hesab etsək, o halda Rotşildlərin Azərbaycan xalqına, ən azı, ölkəmizdə hazırda da yaşayan dağ yəhudilərinə qohumluğu və ehtimalı güclənir. Bu məntiqlə belə çıxır ki, hazırda da ölkəmizdə bu məşhur sülalə ilə eyni geni daşıyan nəsillər var...
...Azərbaycanı Marks və Rotşild kimi məşhur ailələrin vətəni saymağı mümkün edən məlumatlardan biri də 2014-cü ildə ortalığa çıxdı. Mənşəcə Polşa aristokratlarından olan Pavel Krupanın rəsmi saytında bildirildi ki, Avropa yəhudilərinin çox sayda məşhur ailələri, o cümlədən Marks və Rotşild kimi dünyanın tarixində böyük rol oynamış ailələr Aşina soyundan gələn xəzər türkləridir. Bu haqda Azərbaycan mediasında ilk informasiyanı “ANS PRESS” nəşri yaydı...
“Polyak aristokrat öz fikirlərində əsas kimi həmin tanınmış ailələrin təmsilçilərinin Aşina türk soyu kimi “Q1b/M-378” genini daşımasını göstərir.
Genetikaya görə, yəhudilər və onların əmisi oğlanları olan ərəblər “J1” geni daşımalıdır. Amma bir çox tanınmış Avropa yəhudilərinin əsasən Amerika hindularının daşıdığı “Q1b” geninə sahib olması sual doğurur. Pavel Krupa öz ailəsinin də mənsub olduğu bu genin mənbəyini Aşina soyunda görür.
Genetiklər belə düşünür ki, Amerika hindularının da daşıdığı “Q1” geni təxminən 20 min il qabaq Sibir və Ural tərəflərdə yaranıb. Daha sonra isə Berinq boğazından keçərək Amerikaya yerləşib. Türk ulusunun yaradıcısı olan Aşina soyunun da “Q1” genini daşıdığı güman edilir. Genetiklərin fikrincə, “Q1b” genini daşıyan Aşina soyu onlara qohum olan “R1b” və “R1a” genlərini daşıyanları özlərinə tabe edib və türk ulusunu yaradıb...
Zatən “R1” geni də “Q1” kimi eyni “P” geninin davamçılarıdır. Beləliklə, əsasən qırğızlarda və qazaxlarda, altay türklərində müşahidə edilən “R1a” genini və başqırdlarda, türkmənlərdə, türklərdə dominant olan “R1b” genini daşıyanlar Aşina soyunun danışdığı türk dilini qəbul ediblər...
Aşina soyunun bir qolu olan xəzərlər 6-cı əsrdən İrandan gəlmiş yəhudi köçkünləri ilə rastlaşıblar. Bunun Azərbaycan, daha doğrusu Bakı ərazisində baş verdiyi güman edilir. Xəzərlərin ilk paytaxtları Saray və Bələncər hazırda Bakı ətrafında kiçik qəsəbələrdir...
Azərbaycanın orta əsrlərdə rast gəlinən “Xəzərbeycan” adının da xəzərlərlə bağlı olduğu güman edilir. Hazırda Azərbaycan türklərinin 5%-ə qədərinin “Q1” genini daşıması da bu ehtimalları gücləndirir. Xəzər xaqanlarından əvvəllər tanrıçı olmuş Bulan yəhudi qızı ilə evlənir və yəhudiliyi bu iri türk imperiyasının rəsmi dininə çevirir. Daha sonra bütün xəzər aristokratiyası yəhudi dininə keçir...
6-cı əsrdə İran şahı Xosrov Ənuşirəvanla xəzərlər arasında qanlı müharibələr gedib və Xosrov Pərviz Cənubi Azərbaycanda 50 min xəzər ailəsini oturaqlaşdırıb. Ərəblər Azərbaycana girəndə Dərbənddən Həmədana kimi, o cümlədən Tiflis xəzərlərin nəzarəti altında idi...
Ərəblərin güclü təzyiqi və Şimali Qafqazda Bulqar türk ulusunun çöküşü, bulqarların Balkan yarımadasına köçməsi xəzərlərin Şimali Qafqaza keçməsinə və böyük ulus yaratmasına imkan verir...
Xəzərlər tarixə daimi muzdlu ordu yaratmış ilk imperiya kimi düşüb. Lakin hakim elitanın tanrıçılıqdan imtina edərək yəhudiliyi qəbul eləməsi şimaldan Bulqar İslam dövləti, qərbdən xristian Kiyev, cənubdan isə xristian Bizans və müsəlman Ərəb xilafəti ilə müharibələrə səbəb olur. 10-cu əsrdə Rus vikinq knyazı Svyatoslav xəzərlərin paytaxtı Atili dağıdaraq Xəzər dövlətinin sonunu gətirir. Xəzər aristokartiyası isə Avropanın müxtəlif şəhərlərinə dağılaraq yəhudi icmalarına qarışır...
Xəzər imperiyasının ata yurdu Azərbaycan olduğuna görə, ölkəmizi Marks və Rotşild kimi məşhur ailələrin vətəni saymaq olar...”
Göründüyü kimi, genetik baxımdan da Rotşildlərin Azərbaycana soykök bağlılığını təsdiqləyən mənbələr var. Qalır Rotşildlərin özlərinin cavabı...
Təki, dünyanın iqtisadi-siyasi proseslərini idarə edənlərdən biri olan bir sülalə qohumluğumuz xeyirli-uğurlu olsun. Amma atalarımız yaxşı deyir, uzaq qohumdansa, yaxın qonşu yaxşıdır. Fəqət o da var ki, qonşuya ümid olan şamsız qalar...
Sultan Laçın
