“Qardaşım Orxan Süleymanov əks hücum əməliyyatı başlayan günü-27 sentyabrda günorta saatlarında Füzuli istiqamətindəki döyüşlərdə qəhrəmancasına şəhid olub. Bu gün artıq zəfər tariximizin başladığı gündən 1 il ötür. Orxan 2-ci vətən müharibəsinin ilk şəhidlərindən biridir. O sonuncu dəfə 26 sentyabrda zəng etdi və 10 dəqiqəlik danışığımız oldu. Həmişə deyib gülərdik, amma bu dəfə səsində fərqlilik vardı. Sən demə bizdən xəbərsiz bizimlə sağollaşırmış həmin gün”

 

Bunu Moderator.az-a açıqlamasında şəhid gizirimiz Orxan Süleymanovun bacısı Tərminə Süleymanova deyib. O daha sonra əlavə edib:

 

“Son danışıqda özünə yaxşı bax, özünü qoru demişdim. Amma heç biri olmadı. Səhər oyandıq, bütün xəbər kanallarında Azərbaycan ordusu əks hücum əməliyyatına başlayıb deyə xəbərlər yayıldı. Orxan artıq 27sentyabr günorta saatlarında şəhid olmuşdu. Orxanın telefonuna nə zəng çatırdı, nə də bir nəfər onu gördüm deyən olmadı. O gündən Orxansız günlərimiz başladı. 32 gün səbrlə, ümidlə gözlədik. 29 oktyabrda xəbər gəldi ki, biz onları neytral zonada tapmışıq. İlk dəfə idi qardaşım gəlir yox, qardaşımı gətirirlər sözünü eşitdim. Orxan haqqında nə qədər danışsam azdır. Əvəzsiz ata, əvəzsiz oğul və əvəzsiz qardaş idi. Dünyaya bir daha gəlsəm qardaşımın Orxan olmağını istəyərdim. Çox gülərüz, mehriban, ailəcanlı, qayğıkeş biri idi. Onu nəvaxtsa görmək imkanım olsa idi gəzdiyimiz yerlərə, baxdığımız filmlərə, onunla keçirdiyimiz ən xoş günləri yenidən yaşamaq istəyərdim. Ən çox film izləməyi, doğmaları ilə vaxt keçirməyi sevərdi. Arzuları bitib tükənməzdi, həyat dolu biri idi. Ən böyük arzusu oğlu ilə xoşbəxt gələcək yaşamaq və onun da atası kimi vətənpərvər bir övlad olaraq böyüməsi idi. Axı Orxan da vətənpərvər, xeyirxah bir ailədə böyüyüb, boya- başa çatmışdı. Orxan ailəsinə çox bağlı biri idi, hər zaman onlar üçün əlindən gələnin ən yaxşısını etməyə çalışardı. Onu itirmək bizlər üçün çox ağır zərbə oldu. Orxanla keçən günlərin bir daha təkrarı olmayacaq, yaddaşımızda həmişə xoş xatirələrlə yaşayacaq” deyə şəhidin bacısı bildirib.

Tərminə Süleymanova qardaşının şəhid olduğu torpağa getmək istəyindən də danışıb.

 

“Orxanla keçən hər gün dəyərli idi. Qardaşımın şəhid olduğu yerləri görmək mənə tamamilə başqa hisslər yaşadar. 30 ildən sonra azad olunmuş torpaqlarımızda mənim qardaşımın da əməyi var. O yerləri görmək, onun şəhid olduğu yeri ziyarət edib qardaşıma olan mənəvi borcumu yerinə yetirmək mənim üçün şərəf olar” deyə şəhidin bacısı bildirib.

Qeyd edək ki, Şəhid Süleymanov Orxan Oruc oğlu 1990-cı ilin 10 iyun tarixində Ağstafa rayonunun Saloğlu qəsəbəsində hərbçi ailəsində anadan olub. Hərbi fəaliyyətə Beyləqan rayonundan başlayıb. 2016-cı ildə aprel döyüşlərində də iştirak edib. 2020- ci il sentyabr ayının 27-sindən başlayan 2-ci Qarabağ uğrunda gedən döyüşlər zamanı Füzuli istiqamətində qəhrəmancasına döyüşərək şəhidlik zirvəsinə ucalıb. Füzuli rayonunun dörd kəndinin işğaldan azad edilməsində böyük rolu olmuşdur. Füzuli uğrunda gedən döyüşlərdə qolundan yaralanmasına baxmayaraq, döyüş meydanını tərk edib müalicə almaqdan imtina etmiş, son damla qanına qədər torpaqlarımızın azad olunması uğrunda vuruşmuşdur. Vətənə əmanət 1 oğlu qalıb. Azərbaycan Respublikasının Prezidentinin sərəncamlarına əsasən Azərbaycan Respublikasının Silahlı Qüvvələrinin 90 və 95 illik yubileyi münasibəti ilə 2 medalla təltif olunmuşdur. Ölümündən sonra isə "Vətən Uğrunda", “Cəbrayılın azad olunmasına görə”, "Cəsur döyüşçü" medalları ilə təltif edilib.