Bu gün, ADP İdarə Heyətinin ölkə və beynəlxalq aləmdə baş verən ictimai-siyasi hadisələrin müzakirəsinə dair növbəti toplantısı keçirilib. Toplantıda ilk növbədə Rusiyanın Ukraynaya qarşı davam edən işğalçılıq siyasəti, son günlər Ukrayna-Rusiya cəbhəsindəki vəziyyət müzakirə olunub və qeyd edilib ki, Rusiya Ukrayna üzərində qələbə qazanacağı təqdirdə özünün də çəkinmədən bəyan etdiyi kimi I Pyotrın imperialist siyasətini davam etdirə bilər. Bu baxımdan Avropa və Amerikanın Rusiyanın işğalçılıq siyasətinin dayandırılması üçün əlavə potensiala baxmalarının lazım olduğu, Rusiyanı işğalıçılıq siyasətindən çəkindirmək üçün Ukraynaya daha ciddi siyasi, iqtisadi və hərbi baxımdan dəstək verməyin vacibliyi qeyd edilib. İdarə Heyəti eyni zamanda Azərbaycan hökumətini də Ukraynaya humanitar yardımını genişləndirməyə çağırıb. 

 

İdarə Heyəti Rusiya prezidenti V.Putinin I Pyotrun 350 illiyinə həsr olunmuş tədbirdə imperiya ambisiyaları ilə çıxış etməsini qətiyyətlə pisləyib, bunu öz ölkəsində korrupsiya və rüşvətxorluqdan və ağır sosial-iqtisadi vəziyyətdən ictimai diqqəti yayındırmaq cəhdi kimi qiymətləndirib. Eyni zamanda keçmiş SSRİ Respublikalarının rus imperiyasına qarşı səylərinin birləşdirilməsinin vacibliyi qeyd edilib və dünya dövlətlərini Rusiyanın işğalına məruz qalan dövlətlərə siyasi və hərbi dəstəyini gücləndirməyə, 21-ci əsrdə imperialist şüarlarla çıxış edən şəxslərə və dövlətlərə qarşı səylərini birləşdirməyə çağırıb. Müzakirələrdə Rusiyanın imperiya təhdidlərini nəzərə alaraq Türk dövlətlər birliyinin vahid ordusunun yaradılmasının zəruriliyi də vurğulanıb. 

 

İdarə Heyəti son zamanlar Rusiya rəsmi və qeyri-rəsmi qurumları və rəhbərləri tərəfindən Azərbaycanda separatçılığı təşviq edən fəaliyyətin intensiv xarakter almasını müzakirə edib. Müzakirələrdə Rusiyanın XİN rəhbərinin Ermənistana səfəri zamanı Azərbaycanın dövlət maraqlarına zidd olan açıqlama verməsi qətiyyətlə pislənilib bu açıqlamanı Azərbaycanla Ermənistan arasında imzalanması nəzərdə tutulan sülh sazişinin qarşısının alınmasına hesablanmış fitnəkarlıq kimi dəyərləndirib. 

 

İdarə Heyəti belə hesab edib ki, son zamanlar Rusiya tərəfindən Azərbaycannın dövlət maraqlarına qarşı yönələn hərəkətlər Azərbaycan Rusiya və Ermənistan arasında bağlanmış üçtərəfli bəyanatın, o cümlədən cari ilin 22 fevral tarixində Azərbaycanla Rusiya arasında imzalanmış müttəfiqlik bəyyannaməsinin tələblərinin kobud şəkildə pozulmasıdır, Rusiya tərəfi imzaladığı sənədlərlə üzərinə götürdüyü öhdəlikləri nəinki yerinə yetirmir, həmin sənədlərə görə üzərinə götürdüyü öhdəliyə zidd fəaliyyət göstərir, bu baxımdan Azərbaycan hökuməti həmin razılaşmalara yenidən baxılmasının mümkünlüyünə baxmalıdır. 

 

İdarə Heyəti Azərbaycanla Ermənistan arasında imzalanması nəzərdə tutulan sülh sazişinin və iki dövlət arasında sərhədlərin müəyyənləşdirilməsinin süni şəkildə gecikdirilməsinə də diqqət çəkib. Qeyd edilib ki, Azərbaycan 10 noyabr 2020-ci il tarixli bəyanatını Ermənistanla tezliklə sülh müqaviləsinin bağlanması şərti ilə imzalayıb, əgər nəzərdə tutulan sülh müqaviləsi süni surətdə gecikdiriləcəksə, Ermənistan tərəfi Azərbaycana qarşı yenidən təxribatçı, revanşist şüarlar səsləndirəcəksə Azərbaycan vaxt itirmədən Xankəndi iqtisadi zonasında antiterror əməliyyatlar həyata keçirərək həmin ərazilərdə suverenliyini bərpa etməli və rus “sülhməramlı” qüvvələri ərazilərimizdən çıxarılmalıdır. 

 

İdarə Heyəti son zamanlar Azərbaycanla Avropa və Qərb münasibətlərinin nizamlanması istiqamətində atılan addımlar fonunda ölkədə bəzi siyasilərin Qərb və Avropaya qarşı fikirlər səsləndirməsini yolverilməz hesab edib, bunu Rusiyanın siyasi dairələrinin sifarişi ilə atılan addım kimi qiymətləndirib. 

 

İdarə Heyəti VİP sədri Əli Əliyevin üzərində aparılan növbəti məhkəmə prosesinə də münasibət bildirib. İdarə Heyəti belə hesab edib ki, bu məhkəmə siyasi sifarişlidir, qərəzlidir və ölkədə iqtidar-müxalifət arasında münasibətlərin kəskinləşməsinə xidmət edir. İdarə Heyəti ölkə başçısını özünün konstitusion hüquqlarından istifadə edərək Ə.Əliyevin azadlığa buraxılması istiqamətində addımlar atmağa çağırıb. 

 

İdarə Heyəti eyni zamanda “Tərtər cinayətləri”nin araşdırılması ilə məşğul olan hüquq müdafiəçisi İlham Aslanoğlunun övladının toyu ərəfəsində yenidən həbs olunması qətiyyətlə pisləyib, hüquq-mühafizə orqanları tərəfindən övladının toy mərasiminə kobud müdaxiləni Azərbaycan xalqına və milli dəyərlərimizə hörmətsizlik kimi dəyərləndirib, eyni zamanda Azərbaycan hökumətini ölkənin iç sabitliyini poza biləcək bu tipli qanunsuz addımlardan çəkinməyə çağırıb.