İqtidaryönlü partiya olaraq tanınan Demokratik Azərbaycan Dünyası Partiyasının (DADP) ikiyə ayrılmış qolları arasında başlanan qarşıdurmaya müəyyən müddət keçdikdən sonra DADP-nin keçmiş sədrləri Məmməd Əlizadə və Mirkazım Seyidov da qoşuldu. Hər iki şəxs də partiya ilə bağlı olduqca ilginc açıqlamalar verdilər. Belə ki, Məmməd Əlizadə konkret adlar açıqlamasa da, partiyadan getməsinin səbəbini ona qarşı kimlərinsə təzyiq etməsi ilə əlaqələndirib. Eyni zamanda, DADP-nin hər iki qanadını səhv addımlarda suçlayıb.

M.Əlizadədən sonra müvəqqəti sədr olmuş Mirkazım Seyidov isə Publika.Az-a müsahibəsində kifayət qədər maraqları məqamlara toxunaraq, DADP daxilində İran və Rusiyaya işləyən qüvvələrin olduğunu, məlum “ikinci namizəd” məsələsinin də kənar qüvvələrin ortaya ata biləcəyi ehtimalını istisna etmədiyini deyib. O iddia edib ki, DADP-nin Əlisahib Hüseynovun rəhbərlik etdiyi qanadı İranla sıx əlaqələrdədir. Onun sözlərinə görə, İranla əlaqələri Ə.Hüseynovun müavini Elşad Əliyev qurur.

“Fatma Əliyeva isə Rusiyameylli bir insandır. O ilk gəlişindən də yüksək çinli məmurların adından istifadə edirdi. Bilmirəm doğrudan da belə idi, ya yox. Hətta Rəbiyyət xanımla çox yaxın münasibətlərdə olduğunu belə deyirdi ( Xatırladaq Rəbiyyət Aslanova Publika.Az-a müsahibəsində belə bağlantının olmasını təkzib edib-red.). Onun haqqında bir insan kimi heç nə deyə bilmərəm. Amma onun fəaliyyəti haradasa ümid verirdi ki, doğrudan da partiyanı irəliyə apara biləcək. Lakin onun rusiyameylli olması unudulmamalıdır”-deyə keçmiş sədr bildirib.

“Məmməd Əlizadə Mirkazım Seyidovu pul aldığı üçün sədr gətirdi”

Fatma Əliyeva isə hər iki keçmiş sədrlə bağlı inanılmza məlumatlar açıqlayıb. Bununla bağlı Publika.Az-a danışan DADP-nin digər qanadının sədri F.Əliyeva bildirib ki, Mirkazım Seyidovu Məmməd Əlizadə DADP-yə özü gətirib: “Çünki Mirkazım Seyidov Rusiyanın Novosbiriski vilayətində işləyirdi, özü də Rusiya vətəndaşı olub. O, DADP-yə pul verirdiyi üçün də Məmməd Əlizadə onu partiyaya sədr olaraq gətirdi. O şəxs vaxtilə Novosbirskidə polis tərəfindən axtarışda olub. Ümumiyyətlə, Məmməd Əlizadə o insanları partiyaya gətirirdi ki, onlar pullu insanlar idi və partiyaya maliyyə yardımı ayırırdılar. Həmin puldan da Məmməd Əlizadə və onun kadrı Sevda özlərinə xərcləyirdi. Məqsədləri maliyyə cəhətdən üstünlük qazansınmaq idi. Halbuki onların yığdıqları puldan partiyaya heç bir xeyri olmayıb”.

F. Əliyeva qeyd edib ki, Mirkazım Seyidov cəmi 15 gün DADP-də sədr əvəzi vəzifəsində çalışıb: “Onunla bağlı Təşkilat Komitəsinin sədri Ramiz Orucov çox şeylər bilir. Hətta “youtube”də də video yerləşdirilib. Hətta Mirkazım Seyidov Sevdaya deyirdi ki, “ayaqlarının altında ölərəm, getmə, məni tək qoyma”. Bu insanların DADP haqqında söz demələrinə heç bir haqları yoxdur. Mirkazım 15 günlük səd olduqdan sonra həmin Ramiz Seyidova 15 min dollar pul müqabilində sədrlik vəzifəsini təklif edib. M.Seyidov İranla bağlı olduğu deyilən Elşad Əliyevdən 15 min dollar istəyib. Bütün bunları cəmi 15 gün ərzində edib”.

“Mirkazım Seyidov məndən də 5 min dollar pul istəyib”

F.Əliyeva M.Seyidovun sədrlik üçün ondan da 5 min dollar pul istədiyini deyib.“Deyirdi ki, kim mənə pul versə, partiyanın sədrliyini ona verəcəm. Özləri günahkar ola-ola nə haqları var ki, partiya haqqında ağızlarına gələni desinlər. Ramiz Orucov Təşkilat Komitəsinin sədri olaraq çox şeylərdən xəbərdardır, lakin açıqlamır. Açıqlasa çox şeylər bilinər. Mirkazım Seyidovu bu hərəkətlərinə görə partiyadan azad etdikdən sonra, sədr olaraq mən seçildim. İnanın ki, mənə qədər partiyada ən aşağı əxlaqi, qeyri-etik normalar hökm sürür, dedi-qodu, insanların şərəf və ləyaqətini alçaldan hərəkətlərə yol verilirdi. Bunların da hamısına şərait yaradan Məmməd Əlizadə olubdur. Onlar Sevda Qələndərovadır, nə bilim Xurşudovadır - soyadını gündə dəyişən xanımla birlikdə insanları aldadıb pullarını alırdılar. Sevda saatlarla Məmməd Əlizadənin otağına girib çıxmırdı. Partiya üzvləri Məmməd Əlizadənin yanına girmək üçün gərək Sevdadan icazə alaydılar”-deyə DADP-nin bir qanadının sədri bildirib.

F.Əliyeva bildirib ki, Məmməd Əlizadə DADP-də gah iqtidar, gah müxalifət ideologiyalarını yayır, eyni zamanda 5-6 idealogiyaya xidmət edirmiş: “O vaxt bələdiyyə seçkilərinə düz 70 namizəd irəli sürmüşdülər. Heç biri də seçilmədi. Halbuki iki namizədlə getsəydi nəsə qazana bilərdilər. Ona görə bu qədər namizədlə çıxış edirdilər ki, çünki onların hər birindən pul almışdılar”.

“İkinci namizəd” məsələsində yeni məlumatlar

F.Əliyeva onun Rusiya ilə əlaqələri barədə deyilənlərlə də cavab verib. O bildirib ki, zamanında ulu öndər Heydər Əliyevin tapşırığı ilə BAM-a yol çəkilişinə göndərilənlərdən idi: “Orda işləyə-işləyə 20 Yanvar hadisələri ilə bağlı kitab çıxardım. Məni həbs etmək istəyirdilər, lakin sonra qurtula bildim. BAM-dan gələndən sonra mənim Rusiya ilə əlaqələrim yoxdur.

Əlisahib Hüseynovun sədrlik etdiyi qanadın “ikinci namizəd” məsələsi ilə bağlı F.Əliyeva yeni məlumatlar da açıqlayıb. O xatırladıb ki, həmin qanad iddia edir ki, söhbət Arif Paşayevdən gedir: “Guya onların dediyi Arif Paşayev Mehriban xanımın atası deyil, laçınlı komandir olan şəxsdir. Guya həmin iclasda laçınlı komandir Arif Paşayev yanlarında oturub, onlar da deyəndə, hər kəs səhv başa düşüb. Bunu da buraxdıqları səhvi ört-basdır etmək məqsədilə edirlər”.

F.Əliyeva digər qanadın hazırda da Mehriban Əliyevanın adından istifadə etdiyini iddia edib.
Qeyd edək ki, məsələ ilə bağlı qarşı tərəfin də mövqeyini verməyə hazırıq.