Azərbaycanda demokratik islahatların aparılmasının zəruriliyi, insan haqları və azadlıqlarının boğulması cəhdlərinin qarşının alınması və s. kimi məsələlərin uzun illərdir ki, ictimai-siyasi müstəvidə əsaslı surətdə müzakirə edildiyi məlumdur. Halbuki, ölkəmizdə demokratiyanın təntənəsi istiqamətində ölkə iqtidarının həyata keçirdiyi kompleks tədbirlər, qanunvericilik bazasında aparılan köklü dəyişikliklər və qanunların işləməsini təmin edən sərt və şəffaf nəzarət sistemi Azərbaycanda demokratiyanın nəinki yoxluğundan, hətta hansısa çatışmazlığından belə şikayətlənməyə əsas olmadığını göstərir. Lakin buna baxmayaraq, hər zaman olduğu kimi bu gün də bəzi qüvvələrin demokratiyanın vəziyyəti ilə bağlı öz narazılığını dilə gətirməsi, hakimiyyətin ünvanına əsassız ittihamlar səsləndirməsi müşahidə edilir ki, bu da müxalifət və bütövlükdə xalqın böyük kəsiminin hakimiyyətin uğurlarına olan qərəzindən xəbər verir.
Ümumiyyətlə,
kim ki, Azərbaycanda demokratiyanın mövcud olmadığını söyləyir, kim ki,
hakimiyyətin insan haqq və hüquqlarına qəsb etdiyini, vətəndaş azadlıqlarını məhdudlaşdırdığını
söyləyir, bununla da özünün hədsiz riyakarlığını ifşa etmiş olur. Çünki
Azərbaycanda demokratiyanın, həm də bütün dünyaya örnək olacaq demokratiyanın
mövcudluğu dənizin maviliyi, günəşin hərarəti, səmanın sonsuzluğu qədər aydın
bir həqiqətdir.
Bəli,
Azəbaycanda cəmiyyətin, dövlət və idarəetmə sisteminin bütün sahələrini əhatə
edən aşkar, inkaredilməz demokratiya mövcuddur. Lakin bu, hər kəsin şərhsiz də
başa düşdüyü sıradan, ənənəvi demokratiya deyil. Bu, sözün həqiqi mənasında
qara demokratiyadır. Bu, varlının kasıb, güclünün zəif, məmurun xalq,
haqısızın haqlı, günahkarın günahsız, oğrunun doğru, yalanın həqiqət, cinayətin
qanun üzərindəki demokratiyasıdır. Bu, elə bir demokratiyadır ki, siz bu
demokratiyanın yazılmayan, amma həyata çoxdan vəsiqə alan prinsiplərini əsas
götürərək törətdiyiniz istənilən cinayətə haqq qazandıra, hətta buna görə təltif
də ala bilərsiniz. Siz qara demokratiyanın pul və mənsəb sahiblərinə tanıdığı
sonsuz səlahiyyətlərdən faydalanaraq bütün bir toplumla kralın təlxəklə rəftar
etdiyi kimi rəftar edə, onu ən gülməli və təhlükəli əyləncələrinizə alət edə
bilərsiniz. Siz bu demokratiyanın köməyi ilə özünüzün qanun və əxlaqa zidd olan
elə istəklərinizi reallaşdıra bilərsiniz ki, bu istəkləri dünyanın heç bir ölkəsində
- demokratiya beşiyi sayılan ABŞ-dan tutmuş polisi cinayətkardan seçilməyən vəhşi
Kolumbiyaya qədər heç bir guşəsində gerçəkliyə qovuşdura bilməzsiniz.
Bəli,
kimin nə deməyindən asılı olmayaraq, Azərbaycan demokratik ölkədir. Burada hər
kəsin istədiyi fikri dilə gətirməsi, istədiyi məsələ ilə bağlı öz narazılığını
dilə gətitrməsi mümkündür. Qara demokratiya buna etiraz etmir, əksinə insanlara
bütün bu azadlıqları verməklə öz mövcudluğunu təsdiqləmiş olur. Lakin əgər
sizin haqlı olduğunuzu sübut edəcək qədər gücünüz yoxdursa və bu səbəbdən əzilən,
təhqir edilən tərəf olduğunuz halda sizi döyən, haqqınızı qəsb edən tərəfə
kompensasiya ödəmək, ondan üzr istəmək məcburiyyəti qarşısında qalmısınızsa, bu
demokratiyanın günahı deyil. Madam ki, siz demokratiya ilə bağlı yanlış təsəvvürlərlə
silahlanmış halda rüşvət verməli olduğunuz nöqtədə “qanun” deyə çığırırsınızsa,
pulun aça biləcəyi qıfılları ədalətin zərif barmaqları ilə açmağa
çalışırsınızsa, bu, demokratiyanın deyil, sizin özünüzün nöqsan və
çatışmazlığından xəbər verir.
Odur
ki, ədalətli olun. Azərbaycanda denokratiyanın yoxluğu ilə bağlı qərəzli təbliğat
aparmağı dayandırın. Gerçəyi qəbul edin və demokratiyadan faydalanmaq, onun
yeni, Azərbaycan mühitinə uyğunlaşdırılan prinsipləri ilə işləməyi öyrənin.
Birdəfəlik bilin ki, dünya demokratiyasının uzunmüddətli tərəqqi prosesinin
yekunu olaraq meydana çıxan Azərbaycan demokratiyası yalnız o şəxslərin
hüququnu tanıyır ki, onların ölkə qanunlarına təsir gücü qanunların onlara təsir
gücündən qat-qat çoxdur. Əgər siz yetərincə güclü deyilsinizsə, əgər sizin
milyonlarla pulunuz, tonlarla qızılınız yoxdursa, əgər çiyninizdə general
paqonu, cibinizdə nazir vəsiqəsi daşımırsınızsa, əgər bütöv bir ömrü yalnız
halal zəhmətlə, sıradan bir zəhmət adamı kimi keçirmisinizsə, deməli baş
verənlərin bütün məsuliyyət sizə məxsusdur. Ona görə də, Azərbaycanda
demokratiyanın yoxluğu ilə bağlı gərtəksiz hay-küy salmaqdan, ölkə iqtidarına
qara yaxmaqdan əl çəkin. Ləyaqətli olun və qara demokratiya qarşısında hörmət
hissi ilə baş əyin. Madam ki, sizi özünə əsir edən bu demokratiyadan xilas ola
bilmirsiniz, madam ki, nifrət etdiyiniz sistemin adi, idarəolunan tərkib hissəsiniz,
madam ki, dünən də, bu gün də həyatınıza cinayətkar hesab etdiyiniz insanlar qərar
verir və sizin bu qərara etiraz etmək, bu yolda ölmək cəsarətiniz yoxdur, o
zaman sadəcə ehtiramla baş əyin.
Zaur Abdullayev