“Azərbaycan” jurnalının baş redaktorunun müavini vəzifəsindən çıxarılmağım haqqında yayılmış məlumatlar yalandır".

Bunu Moderator.az-a tənqidçi Əsəd Cahangir bildirib.

Əsəd Cahangir deyib ki, bu məlumatların hansı məqsədlə yayıldığı ona bəlli deyil.

Azərbaycan Yazıçılar Birliyinin katibi, xalq şairi Fikrət Qoca isə Moderator.az-a bildirib ki, Əsəd Cahangir işdən çıxmaq haqqında ərizə yazıb, bu məsələ katiblikdə müzakirə edilib və onun ərizəsi qəbul olunub.

"Azərbaycan" jurnalının baş redaktoru İntiqam Qasımzadə isə Moderator.az-a deyib ki, hazırda evdə xəstə yatır və heç nədən xəbəri yoxdur: "Jurnalistlər bütün günü mənə zəng vurub, məni narahat edirlər, onlara da deyirəm ki, mən xəstə yatıram və bu məsələlərdən xəbərim yoxdur".

İntiqam Qasımzadə Əsəd Cahangirdən etdiyi şikayətlər haqqında danışmaq istəməyib: "Bu barədə sizə açıqlama verməyə borclu deyiləm".

Bu arada AYB-nin rəsmi saytı-ayb.az məsələ ilə bağlı açıqlama yayıb: "Azərbaycan Yazıçılar Birliyinin Katibliyi Əsəd Cahangirin ərizəsini nəzərə alaraq onu öz xahişi ilə "Azərbaycan" jurnalının baş redaktor müavini vəzifəsindən azad edib. Əsəd Cahangirə Azərbaycan Yazıçılar Birliyində başqa iş təklif olunacaq".

AYB daxilindəki mənbə isə saytımıza bildirib ki, Əsəd Cahangir işdən çıxmaq haqqında ərizə yazmayıb, İntiqam Qasımzadənin şikayətləri əsasında vəzifəsindən azad olunub. İntiqam Qasımzadə özü də Kulisə verdiyi açıqlamada Əsəd Cahangir tərəfindən iki dəfə təhqir olunduğunu və onunla bağlı katibliyə şikayət etdiyini bildirib. Məlumata görə, İntiqam Qasımzadə Yazıçılar Birliyinin sədri, xalq yazıçısı Anar qarşısında təxminən "Burda ya Əsəd qalmalıdır, ya da mən" kimi şərt də qoyub. Anar məhz bundan sonra Əsəd Cahngirin işdən çıxarılmasına qərar verib.  Mənbə bildirib ki, İntiqam Qasımzadənin xəstə olması haqqında dedikləri yalandır, sadəcə ona bu mərhələdə susmaq göstərişi verilib.