Ermənistanın Avropa İttifaqına daxil olması ilə bağlı referendum üçün imzaların toplanması sentyabrın 16-da başlayacaq və 2024-cü il noyabrın 14-dək davam edəcək.

 

Moderator.az “Kavkazskiy uzel” nəşrinə istinadla bildirir ki, bu haqda Ermənistan Mərkəzi Seçki Komissiyasından məlumat verilib.

 

Xəbər verdiyi kimi, martın 13-də Avropa Parlamentinin üzvləri Ermənistana Avropa İttifaqına(Aİ) üzvlüyünə namizəd statusunun verilməsi imkanlarına baxmağı təklif edən qətnamə qəbul ediblər və bu, Ermənistanın Rusiyadan asılılığını azaltmağa çalışdığını göstərir. 

 

 Erməni analitiklərin fikrincə, Avropa Parlamentinin Ermənistanın Aİ üzvlüyünə namizəd statusu üçün ərizə verməsi mümkünlüyü ilə bağlı qətnaməsi Qərbin Rusiya ilə Cənubi Qafqaza nəzarəti uğrunda rəqabəti səbəbindən Ermənistan üçün unikal imkanlar açır. "Qətnamə yalnız deklarativ xarakter daşıyır, onun icrası bütünlüklə geo-siyasi amillərdən asılı olacaq", -deyə onların opponenti  buna etiraz edib.

 

Aİ Şurası iyulun 22-də elan edib ki, Avropa İttifaqı Ermənistana ordunun maddi-texniki imkanlarını gücləndirmək və əhalinin müdafiəsini yaxşılaşdırmaq üçün 10 milyon avro ayırır. Təşkilat vurğulayıb ki, Avropa İttifaqı ilk dəfədir ki, Ermənistana belə yardım edir.

 

"Sentyabrın 11-də Ermənistan Mərkəzi Seçki Komissiyası Ermənistanın Aİ-yə daxil olması ilə bağlı referendum layihəsinin dəstəklənməsi məqsədilə imza toplamaq üçün vətəndaş təşəbbüsünü qeydə alıb", -deyə Ermənistan Mərkəzi Seçki Komissiyasının mətbuat katibi Seda Qukasyan  bildirib. Onun sözlərinə görə, vətəndaş təşəbbüsünə 51 nəfər daxildir və onun səlahiyyətli şəxsi qismində Respublika Partiyasının nümayəndəsi Artak Zeynalyan təyin edilib.

 

“İmzaların toplanması təşəbbüs qrupunun Mərkəzi Seçki Komissiyası tərəfindən qeydə alındıqdan sonra 60 gün ərzində həyata keçirilir. İmzaların toplanması müddəti 2024-cü il sentyabrın 16-dan noyabrın 14-dəkdir”, - deyə mətbuat katibi qeyd edib.

 

S.Laçın