"İrəvanın mərkəzində neonasistlər nasistlərin əlaltısı Qaregin Njdenin mərkəzi meydanda ucaldılan heykəlinə doğru yürüş edir...Bəs, buna nə deyirsiniz?.."

 

Ermənistanın İsraillə münasibətləri onun İranla əlaqələrinin inkişafı və antisemitizm faktlarının təkidlə inkar edilməsi səbəbindən pisləşir.

 

Moderator.az xəbər verir ki, bu barədə İsrailin "Jerusalem Post" nəşri yazıb.

 

İrəvan regionda öz təsirini gücləndirən Tehranın marionetkasına çevrilib, məqalədə deyilir.

 

"Dünyada ermənilərlə yəhudilər arasında nifaq salmaq istəyən qüvvələr var. Onlar Ermənistanda yalançı antisemitizm barədə feyk xəbərlər yayır. Onlar İsrailin Ermənistanın "aqressiv"  qonşusu Azərbaycana silah tədarük etməsi barədə danışaraq erməniləri təhrik etmək istəyir".

 

Bu, Ermənistan XİN rəhbərinin sabiq müavini Qriqor Ovannisyanın sözləridir. Özünün "Ermənistan. İran. Saxta iddialar" başlıqlı məqaləsində o, mənim belə qüvvələrin nümayəndəsi olduğuma eyham vurur, çünki mən İranla Ermənistanın qarşılıqlı əlaqələrinin möhkəmləndirilməsi, xüsusilə İrəvanın inkar etdiyi silah tədarükü ilə bağlı müqavilələrdən yazıram. 

 

Ermənistan çox şeyləri inkar edir. "Ermənistanda saxta antisemitizmlə bağlı feyk xəbərlərdən" başlayaq. Hakimiyyət "Mordehay Navi" sinaqoquna çoxsaylı hücum faktlarını inkar edir. Deyir ki, hansısa "əcnəbilər" gəlib, guya, mühafizə edilən sinaqoqu yandırmağa cəhd edib, sonra ölkəni tərk edib. Hakimiyyət bu hücumlara görə məsuliyyəti üzərinə götürən, həm də yeni hücumlarla təhdid edən "Ermənistanın azadlığı uğrunda erməni məxfi ordusu" təşkilatının mövcudluğunu inkar edir.

 

Bəs yaxşı, bu ilin əvvəlində İrəvanın mərkəzində neonasist parad necə olsun? Əvvəlcə erməni hakimiyyəti bütün bunları inkar edib, sonra isə günahı yenidən "əcnəbilərin" üzərinə qoyub və "onlar ilə məşğul olduqlarını" iddia edib. Bəs o zaman nədən erməni neonasistlərinin lideri Ayk Nazaryan sərbəst şəkildə İrəvanın küçələrində gəzir, çoxsaylı tərəfdarları ilə şəkillər çəkdirir, sonra onları sosial şəbəkələrdə yayır, bu şəkilləri həyasız antisemit çağırışlarla müşayiət edir? Niyə neonasistlər İrəvanın mərkəzində marş keçirir? Onlar nasistlərin əlaltısı Qaregin Njdenin mərkəzi meydanda ucaldılan heykəlinə doğru yürüş edib.

 

Yenə də Ermənistanın dostu İrana dönək. İrəvanla Tehran arasında uzun strateji əməkdaşlıq tarixçəsi var. 2008-ci ilin sonunda amerikalı diplomatlar bu nəticəyə gəlib ki, Ermənistan İrana idarəedilməyən raket və pulemyotlar tədarük edib, bu silahlarla İraqdakı amerikalı hərbçilər qətlə yetirilib. Bu, İrəvanın Tehranla hərbi əməkdaşlığının 2016-cı ildə möhkəmləndirilməsindən xeyli öncə baş verib.

 

İranla kəşfiyyat, hərbi əlaqələrin möhkəmləndiriıməsi, təlim və erməni torpağında bazaların yaradılması sahəsində bu yaxınlarda imzalanan sazişə gəldikdə, bunu gizlətmək, sadəcə, mümkün deyil. Bu sövdələşmə barəsində ilk məlumatın üzə çıxmasından bir neçə gün öncə baş nazir Nikol Paşinyan Tehrana səfər edərək yeni seçilən İran prezidentinin andiçmə mərasimində iştirak edib. Bu mərasimdə cəmi iki dövlətin rəhbəri iştirak edib. Digər ölkələr aşağı səviyyədə təmsil olunub.

 

Paşinyan və Xamenei

 

Paşinyan həmçinin İranın Ali dini lideri Əli Xamenei ilə də görüş keçirib. Ayətüllah Xamenei deyib: "Biz Ermənistanla münasibətlərimizi möhkəmləndirməkdə qətiyyətliyik, ölkələrimiz arasında qarşılıqlı maraqlara əsaslanan və digər dövlətlərin siyasətindən asılı olmayan əməkdaşlığı isə sarsılmaz qüvvə ilə davam edəcək".

 

Paşinyanın HƏMAS lideri İsmayıl Haniyə ilə də görüşəcəyi barədə məlumat üzə çıxıb, Haniyə mövcud olmayan Fələstin dövlətini tanıdığına görə Paşinyana şəxsən minnətdarlıq etməli idi. Amma bunun əlavə təsdiqləri yoxdur, çünki Haniyə törətdiyi cinayətlərə görə cavab verib. İrəvan bunu da inkar edə bilər. Lakin Yaxın Şərq tarixindən xəbəri olan hər kəs xatırlayır ki, ermənilər həmişə Fələstinin terrorçu təşkilatlarına dəstək verib. Ermənistanın milli qəhrəmanlarından biri Markar Melkonyan israillilərə qarşı döyüşdüyünə görə öyünüb. Siz bu barədə onun "Qardaşımın yolu. Amerikalının Ermənistana taleyüklü səyahəti" adlı kitabından oxuya bilərsiniz.

 

Cənab Ovannisyana bir məsələ barəsində tövsiyə vermək istərdim. Əgər o, həqiqətən də xalqlarımız arasında münasibətlərin möhkəmləndirilməsini istəyirsə, o zaman Ermənistanın həm yerli, həm də xarici KİV-lərindən antisemitizmlə mübarizə və öz dövlətinin xarici siyasətinin dəyişməsi üçün istifadə etməlidir. Çox təəssüf ki, bu siyasət  səbəbindən Ermənistan İranın marionetkasına çevrilib.

 

Müəllif: Mordehay Kedar