Milli Şuranın 30 may 2015-ci il tarixli aksiyasında iştirak edən, həmin aksiyaya insanları cəlb edən və aksiya zamanı hakimiyyətin ünvanına radikal şüarlar səsləndirən ADP fəalı Tural Yadigarov aksiyadan sonra naməlum şəraitdə yoxa çıxıb. Gecə saatlarında məlum olub ki, aksiya başa çatdıqdan sonra Tural Yadigarov axşam saatlarında yaşadığı ünvana getdiyi zaman polis və mülki geyimli şəxslər tərəfindən saxlanılaraq zorla Suraxanı Rayon Polis İdarəsinə aparılıb. Orada ondan nəyə görə mitinqə qatıldığı və aksiya zamanı hakimiyyət əleyhinə şüarlar səsləndirdiyini soruşublar. ADP fəalı T.Yadigarov mitinqə qatılmaq və orada şüarlar səsləndirmək onun hüququ olduğunu, buna görə kiməsə hesabat verməli olmadığını bildirdikdə, polis idarəsində T.Yadigarov nalayiq ifadələrlə təhqir edilmiş, təqib və təzyiqlərə məruz qalmış, aksiyalara qoşulacağı halda başına oyun açılacağı, digər dostların kimi şərlənib türməyə soxulacağı ilə təhdid edilmişdir. Polis idarəsində ADP fəalından mitinqlərə qoşulmamağı və təmsil olunduğu partiyadan istefa verməyi və siyasi fəaliyyətini dayandırmağı tələb ediblər. Bununla razılaşmayan ADP fəalına qarşı polis əməkdaşları saxta protokol tərtib edərək məhkəməyə aparmış və onun barəsində 1 ay müddətinə inzibati qaydada həbs qərarı çıxarılıb.
ADP fəalına qarşı törədilən
zorakılıq sözsüz ki, hakimiyyət orqanlarının siyasi sifarişi əsasında həyata
keçirilib. Çünki, ölkədə olan mövcud rejim zaman-zaman müxalifət düşərgəsinin
aktiv üzvlərinə, o cümlədən ADP fəallarına qarşı bu cür iyrənc metodlardan
istifadə edib. Məqsəd isə gənclərdə xof yaratmaq onları siyasi fəaliyyətdən və
mübarizədən çəkindirməkdir. Bu cür metodlar effekt verməyəndə isə müxalifətçi fəalların
ya cibinə narkotik atır, ya evindən silah “çıxarır”, ya da başqa qondarma və
saxta ittihamla həbsə atır. Necə ki, bu gün yüzlərlə müxalifət fəalı hakimiyyətin
qondarma və saxta ittihamları ilə türmələrdə çürüyür.
Avropa Şurası, Avropa
Birliyi və bir sıra başqa beynəlxalq təşkilatların Azərbaycan hökumətini ölkədə
siyasi islahatlara çağırdığı halda, hakimiyyətin siyasi motivli həbsləri davam
etdirməsi, müxalif düşüncəli insanları davamlı olaraq təqiblərə, təzyiqlərə,
zorakılıqlara və diskriminasiyaya məruz qoyması onu göstərir ki, bu rejim islah
olunan deyil.