Bunu Moderator.az-a özəl açıqlamasında aktrisa Rəna Səlimova deyib. Uzun illərdir mətbuatdan uzaq düşən, efirlərə çıxmaqdan imtina edən sənətkar hələ də o illərin həsrəti ilə yaşayır, qaynar kino həyatını yada salır.

 

“Bu gün sözün düzü kino üçün darıxmıram. Darıxanda da evdə oturub köhnə jurnallara, köhnə filmlərə baxıram. Kino üçün olmasa da, keçmiş həyatım üçün çox darıxıram. Bir dəqiqə boş vaxtımız yox idi. Bütün günü çəkilişlərdə olurduq. Məni indi filmlərə dəvət etsələr də getmərəm. Dəvət edirlər və getmirəm. Gic-gic filmlərə çağırırlar. Mən istəmirəm çəkilim. “Azərbaycanfilm” kinostudiyası fəaliyyətsizdir. Harada çəkilim?! Əvvəlki kinolarımız indi yoxdur. Heç əvvəlki rejissorlar da yoxdur. Hər şey Həsən Seyidbəyli, Rasim Ocaqovla getdi. Rasim Ocaqov mənim bir filmdə həm rejissorum, başqa bir filmdə isə operatorum olub. Məni tamaşaçılar “Sən niyə susursan?”, “Cazibə qüvvəsi” kimi filmlərdən tanıyırlar. “Sən niyə susursan?” filmində Xəyal Axundzadə ilə tanış oldum. Filmdə qovuşduq, ailə həyatı qurduq. Hətta Xəyal çəkilişlərə gəlməyəndə mən də gəlmirdim. 14 yaşım var idi o vaxt. Sonra ayrıldıq. İkinci həyat yoldaşım filmlərdə çəkilməyə icazə vermirdi. Hətta Moskvadan məni filmə dəvət etdilər, amma uşaqlarım balaca idi deyə gedə bilmədim. Həsən Seyidbəyli “Nəsimi” filmində məni Şəms roluna dəvət etmişdi. Yoldaşım qoymadı. Ondan ayrılandan sonra Həsən Seyidbəylinin yanına gedib dedim ki, indi çəkilə bilərəm. Artıq gec idi, həmin rola aktrisa təsdiqlənmişdi. Həsən müəllim məni filmdə rəqqasə rolunda çəkdi. Hansı ki, filmdə Zeynəb Xanlarova mahnı oxuyur, mən isə rəqs edirəm. Mən xoreoqrafiyada da təhsil almışam, 18 il ginekoloq işləmişəm. Aktrisaya o vaxt qəribə baxırdılar. Həyatımı övladlarıma həsr etdim. Peşman deyiləm”, - deyə aktrisa bildirib.

 

 

“Mən həmişə Rüstəm İbrahimbəyovun rəhbərlik etdiyi ittifaqda olmuşam. İndi onun yerinə görkəmli sənətkarımız Rasim Balayev gəlib. Kinematoqrafçılar İttifaqından çox razıyam. Mənim 75 yaşım olanda dəvət edib, təbrik etdilər, gözəl hədiyyə verdilər. Tez-tez zəng edirlər, yada salırlar, qayğı, diqqət göstərirlər”.