Moderator.az xəbər verir ki, bu barədə o, Ağ Evdə jurnalistlər üçün keçirfiyi brifinqdə bəyan edib.

 

"Prezident İsrailin uzunmüddətli təhlükəsizliyinin təmin edilməsinə dərin sədaqətini vurğulayıb. O, həmçinin İsrailin Xolokost dönəmindən bəri yəhudi xalqının ən dəhşətli qətliamında günahkar olan HƏMAS-ı təqib etmək hüququnun olmasını təsdiq edib", - Sallivan vurğulayıb.

 

"Eyni zamanda bu münaqişədə, bu hərbi əməliyyatda Qəzzada baş verən bütün müharibələrdə birlikdə olduğundan daha çox günahsız mülki şəxslər, o cümlədən minlərlə uşaq həlak olub. Bütün Qəzza boyunca humanitar böhran yaranıb. İsrail hərbçilərinin təmizlədiyi, lakin sabitlik yaratmadığı rayonlarda isə xaos hökm sürür", - o, davam edib.

 

Sallivan deyib ki, söhbət zamanı Bayden üç bəndlə Rafahda iri hərbi əməliyyatın keçirilmə perspektivinin onu nədən bu qədər çox narahat etdiyini izah edib:

 

"Birincisi, Rafahda bir milyondan çox insan sığınacaq tapıb, onların daha getməyə yerləri yoxdur. Qəzzanın digər iri şəhərləri əsasən dağıdılıb. İsrail nə bizə, nə də başqa ölkələrə bu mülki şəxslərin necə və haraya təhlükəsiz yerdəyişməsinin mümkünlüyü barədə plan təqdim etməyib, mən hələ onların qidalanması, yerləşdirilməsi və sanitariya kimi elementar şeylərə çıxışının təmin edilməsindən danışmıram.

 

İkincisi, Rafah Qəzzaya Misir və İsraildən humanitar yardımın çatdırılmasının əsas məntəqəsidir. Hərbi müdaxilə bu imkanı mümkünsüz edəcək və ya hər halda məhz onu zəruri olduğu məqamda ciddi riskə məruz qoyacaq.

 

Üçüncüsü, Rafah Misirlə sərhəddə yerləşir, bu ölkə orada iri hərbi əməliyyatın aparılması ilə bağlı dərin narahatlığını ifadə edib və hətta İsraillə münasibətlərinin gələcəyi ilə bağlı məsələ qaldırıb".

 

Sallivan əmin edib ki, İsrailin Rafahda nail olmaq istədiyi həlledici məqsədlərinə "digər vasitələrlə nail olmaq mümkündür".

 

"Bugünkü telefon söhbətində prezident Bayden baş nazirdən yaxın günlərdə Vaşinqtona hərbi kəşfiyyat və humanitar təşkilatların nümayəndələrindən ibarət idarələrarası işçi qrupunu göndərməyi xahiş edib.

 

Biz Rafahda HƏMAS-ın əsas elementlərinə zərbə endirməyə və geniş yerüstü hərbi müdaxilə olmadan Misirlə Qəzza arasında sərhəddin təhlükəsizliyini təmin etməyə alternativ yanaşmanı təqdim etmək istəyirik", - Sallivan deyib.

 

"Aydındır ki, Netanyahunun Rafahda əməliyyatla bağlı öz nöqteyi-nəzəri var, lakin o, Vaşinqtona müzakirə və qarşılıqlı əlaqə üçün komanda göndərməyə razılıq verib. Və biz bu müzakirələri səbirsizliklə gözləyirik", - o, əlavə edib.

 

Sallivan dəqiqləşdirib ki, söhbət zamanı Bayden "Rafah barədə məsələ qaldırmaq elə HƏMAS üzərində qələbə məsələsini qaldırmaq deməkdir" dəlilini yenidən təkzib edib. Bu, sadəcə, boş şeydir. Bizim mövqeyimiz ondan ibarətdir ki, HƏMAS nə Rafahda, nə də hər-hansı başqa yerdə sığınacaq tapmamalıdır".

 

"Prezident və baş nazir yaxın günlər və həftələrdə bütün bu məsələlər üzrə sıx təmas barədə razılığa gəlib. Və əlbəttə ki, onların komandaları bu böhranın hər bir elementi, həmçinin İsrailin regionda üzləşdiyi digər təhlükələr, Birləşmiş Ştatların, İsrailin və digər müttəfiqlərimizin İranın və onun bütün Yaxın Şərqdə oyuncaq qüvvələri tərəfindən üzləşdiyi ümumi təhlükələr üzrə gündəlik təmasdadır", - Sallivan vurğulayıb.