Moderator.az xəbər verir ki, bu barədə Ukrayna prezidenti Vladimir Zelenski Rusiyada martın 17-də keçirilən prezident "seçkilərinin" yekunlarına dair müraciətində bəyan edib.

 

 

"Bu günlər Rusiya diktatoru növbəti seçkilərin imitasiyası ilə məşğuldur. Dünyada hamı anlayır ki, tarixdə artıq tez-tez olduğu kimi, bu adam, sadəcə, hakimiyyət xəstəsidir və ömürlük hakimlik etmək üçün hər şeyi edir. Öz şəxsi hakimiyyətini uzatmaq üçün onun törətməyəcəyi cinayət yoxdur. Və dünyada heç kim bundan sığortalanmayıb", - Ukrayna prezidenti deyib.

 

O, "hər şeyi öz adı ilə çağıran və çağıracaq" dünya liderlərinə və beynəlxalq təşkilatlara minnətdarlıq edib.

 

"Rusiyanın Ukraynanın işğal edilən ərazilərində bütün etdikləri cinayətdir. Bu müharibədə Rusiya qatillərindən Putinin ömürlük hakimiyyəti naminə etdiklərinə görə ədalətli qisas alınmalıdır. Onun ən çox qorxduğu yalnız ədalətdir.

 

Seçkilərin bu imitasiyasında heç bir legitimlik yoxdur və ola da bilməz. Bu adam Haaqada müttəhimlər kürsüsündə əyləşməlidir və biz məhz bunu təmin etməliyik. Dünyada həyatı və ləyaqəti dəyərləndirən hər kəs məhz bunu təmin etməlidir", - Zelenski vurğulayıb.

 

Zelenski qeyd edib ki, Putinin Avropada və dünyada xarabalıqlar zonasını genişləndirməyə nail ola biləcəyi məsələsi məhz bu gün həll edilir. Onu indi dayandırmaq hamı üçün sərfəlidir

 

ABŞ və Qərb ölkələri rusiyalı işğalçılara müqavimət göstərən Ukraynaya dəstəkdə davamlılığı bərpa etməlidir, prezident vurğulayıb.

 

"Bizim müdafiəmizdə dəstəyin davamlılığının bərpası çox vacibdir. Bu müharibədə Putinin Avropada və dünyada xarabalıqlar zonasının genişləndirməyə nail ola biləcəyi məsələsi məhz indi və məhz Ukraynanın müdafiəsi ilə həll edilir. İndi onu dayandırmaq hamı üçün sərfəlidir", - Ukrayna prezidenti deyib.

 

O, son zamanlar Ukraynaya müdafiə xarakterli yardım göstərən ölkələri-ABŞ, Danimarka, Almaniya və Kanadanı xatırladıb. Bu ölkələr Ukrayna üçün mərmilər alışı üzrə Çexiyanın təşəbbüsünə qoşulub.

 

"Mən Avropada hamı üçün təhlükələri dəqiq anlayan Yunanıstanı qeyd etmək istəyirəm. Kanada bizim dronlar koalisiyamıza qoşulub. Bu silah özünün fövqəladə dərəcədə səmərəli olduğunu nümayiş etdirib.

 

Bu gün mən həmçinin Fransanın Avropada liderliyini qeyd etmək istəyirəm. Biz prezident Makronun Avropa üçün strateji perspektiv işləyib hazırladığını yüksək qiymətləndiririk. Bu perspektiv yalnız Putinin bu müharibədə məğlub olacağı təqdirdə gerçək, uzunmüddətli təhlükəsiz ola bilər", - Zelenski izah edib.

 

O, həmçinin Ukraynaya "Taurus" uzaqmənzilli raketləri verməkdən hələ də imtina edən bəzi tərəfdaşları xatırladıb və aydlndır ki, Almaniyanı nəzərdə tutub.

 

"Müharibənin belə mürəkkəb şəraitində ordumuzun uzaqvuran silahlara malik olmaması bəzi tərəfdaşlarımızın aydın şəkildə uzaqgörən olmamasını göstərir",  Zelenski hesab edir.