Moderator.az xəbər verir ki, Demokratik Azərbaycan Dünyası Partiyasının (DADP) sədri Əlisahib Hüseynov nüfuzlu beynəlxalq təşkilatı boykot etməyə çağırıb:

“Bir nömrəli beynəlxalq təxribatçı kimi tanınan “Amnesty İnternational” son günlər yenə də öz ampluasındadır. Bu təşkilat indi də I Avropa Oyunlarından Azərbaycana qarşı siyasi-psixoloji təzyiq vasitəsi kimi istifadə etməyə çalışır.

Görəsən, ABŞ-dan başqa elə bir ölkə varmı ki, “Amnesty İnternational” ondan ağız dolusu gözəl cümlələr yazsın? Hesab edirəm ki, biz uzun müddət bu təşkilatdan belə bir şey gözləməməliyik. Çünki “Amnesty İnternational” çox sevdiyi insan haqları alveriylə hələ uzun müddət məşğul olmağı planlaşdırır. İndi də hər yerdən üzülmüş əlini Bakıda keçiriləcək I Avropa Oyunlarını boykot etmək üçün uzadır.

Maraqlıdır, “Amnesty İnternational” guya inkişaf etmiş ölkə modeli istəyir, amma həm də bu modeli danan, həzm edə bilməyən təşkilat kimi tarixə düşəcək. Sanki bütün üçüncü ölkələr bu təşkilatın qızışdırdığı rəngli inqilablardan keçməsə, inkişaf etmiş ola bilməzlər.

Bəs niyə bu təşkilat Ermənistanda hər gün hökümətə etiraz edən, mitinqlər keçirən ermənilərin haqlarından yazmır? Getsin onların taleyiylə də bir maraqlansın. Ancaq rəsmi İrəvan belə təşkilatların və bu təşkilatı himayə edənlərin çaldığı hər zurnaya oynamağı bacardığı üçün ordakı “insan haqları”na fikir verən də yoxdur.

Azərbaycan isə bölgədə öz sözünü deyəcək, öz oyununu oynayacaq səviyyəyə yüksəlib. Bu isə ağa dövlətləri Azərbaycanla da hesablaşmağa vadar edir. Lakin o dövlətlər özləriylə eyni səviyyəyə qalxacaq dövlətlərə açıq etiraz etmirlər. Bunun üçün ortaya “Amnesty İnternational” kimi təşkilatlar çıxır. Hansılar ki, “nüfuzdansalma” maşını funksiyasını yerinə yetirirlər. Bu mənada, bugün “Amnesty İnternational” da öz işiylə deyil, siyasi quldurluqla məşğul olur.

Hesab edirəm ki, biz də bu təxribatçı təşkilatın fəaliyyətini boykot etməliyik. Ən azından ona görə ki, iki-üç məhbusdan dolayı aylardır ki, nəlbəkidə siyasi fırtına yaratmağa çalışan “Amnesty İnternational” 20 ildən çoxdur haqqı yerdə qalan xocalılıların halal haqqını tələb etmir. Biz bu təşkilatı siyasi şoulara və ikili standartlara son qoymağa çağırmalıyıq.

Bu təşkilatın rəhbərlərinə sual vermək lazımdır: “Ümumiyyətlə, yönətdiyiniz təşkilatın məqsədi, missiyası nədən ibarətdir? İnsan haqlarını müdafiə etmək? Yoxsa, ayrı-ayrı ölkələrə siyasi inqilab ab-havasını ixrac etmək? Madam ki, insan haqlarının müdafiəsi üçün yarandığınızı və bu işlə gərçəkdən də məşğul olduğunuzu iddia edirsiniz, o zaman buyurun, bu işlə professional şəkildə məşğul olun. Daha I Avropa Oyunlarını boykot etmək kimi dolayısı üsullarlarla deyil. Siz itdən tutmuş cinayətkara kimi hər kəsi öz təxribatlarınıza alət etməklə ilk növbədə təşkilatınızın profesionallığını şübhə altına alırsınız.

İmiciniz ayaqlar altındadır, cənablar! İmicinizini xilas edin!”