Moderator.az Vətəndaş və İnkişaf Partiyasının sədri Əli Əliyevin Fransada baş vermiş terrora həsr olunmuş statusunu oxuculara təqdim edir:

"Dünən baş vermiş Paris terror aktı bütün dünyanı silkələyib. Xüsusən Fransada baş verənlər diqqəti çəkir. İnsanlar "Qorxmuram" şüarları ilə Respublika dəyərlərini qorumaq üçün küçələrə axışıb. 

Baş verənlər qan donduran hadisələrdir. Təbii ki, qətliamı törətmişlərin İslamla bağlılığı yoxdur. Bu formada vəhşiliyi bəşəriyyətin ən mükəmməl dini- İslamın ayağına yazdırmaq, insanları qətlə yetirərək, bəşəriyyətin ən layiqli nümayəndəsi, bəşər övladı olmaqla yanaşı, Allahın seçim etdiyi peyğəmbərin- Məhəmmədin müdafiəsi adı ilə terror törətmək İslama zidd əməldir. İslam dinini nüfuzdan salmaq üçün bundan böyük ziyanlı addım mümkün deyildi.

Gün ərzində hadisələrə müxtəlif qiymətlər verilib. Yanaşmaların hamısı bir nöqtədə uzlaşır- bu vəhşilikdir, hamı Fransa xalqına səbr diləyir. Biz də bu məqamlarla həmrəyik.

Məsələnin bir neçə maraqlı paralelləri vardır. 

İlk növbədə fransızların dərhal verdiyi spontan reaksiya mənə Bakı qətliamını xatırlatdı. 90-cı il 20 yanvar qırğınından sonra insanlarımız gündüz, indiki Prezident Aparatının qarşısına yığılaraq, mtinq keçirməyə, vəhşiliyə etiraz etməyə nail oldular. İşğalçı imperiya qoşunlarının şəhərdə olmasına, komendant rejimi tətbiqinə baxmayaraq, insanlar tankların qarşısından qaçmırdı. Şəhidlərin dəfn mərasiminə isə milyondan çox insan küçələrə çıxmışdı. Ən böyük daxili özünütəşkil nümunəsi isə, şəhidlərin 40 günlük yas mərasimini millət olaraq, bütövlükdə tətillərlə saxlamağımız idi. Azərbaycanda 40 gün, həyat təminatlı müəssisələrdən savayı, heç bir müəssisə işləmədi.

Paris qətliamı eyni zamanda 30 aprel 2009-cu il tarixdə Bakıda Neft Akademiyasında törədilmiş qətliama da çox bənzəyir. Heç bir günahı olmayan insanlarımız soyuqqanlı şəkildə terror aktı ilə kütləvi şəkildə qətlə yetirilmişdi. Ölənlərin sayı da Parisdə öldürülülənlərin sayı qədər idi-12 nəfər. Bu 2 hadisənin ikisində də Dövlətə və xalqa təhdid məqsədi güdülürdü. Bu qədər oxşar.

Məsələnin digər maraqlı tərəfi son zamanlar Qərbdə İslam dininə qarşı baş verən demarşlardır. Heç bir halda terrorçulara bərait qazandırmadan, müsəlmanların heysiyyatına toxunan belə hərəkətləri də qınamaq lazımdır. Söz, ifadə, düşüncə azadlığı digərlərinin dəyərlərinə həqarətdə biruzə verməməlidir. İnsanlar müxtəlifdir. Təhqiri və aşağılanmanı hərə öz tərbiyəsinə, prinsiplərinə, psixoemosional statusuna uyğun qəbul edir. Aydın məsələdir ki, Qərb dəyərləri ilə Şərq dünyagörüşü, Qərb məişəti ilə Şərq həyata baxışları arasında ciddi fərqliliklər vardır. Bəzi hallarda eyni məsələyə baxışlarda bu 2 sivilizasiya nümayəndələrinin bir- birinə diametral zidd, hətta antoqonist yanaşmalarına rast gəlinir. 

Dəyərlərin belə ziddiyyəti təbii qarşılanmalı, bir reallıq olaraq qəbul edilməlidir. Misal üçün bu gün Qərb dünyası canı dildən insan azadlıqlarını əsas gətirərək, eyni cinsli ailələrin rəsmiləşməsi uğrunda mübarizə aparır, bu anormallığı təbliğ edir, qəbul etməyənləri isə qınamağa cəhd göstərirlər. Şərq dünyasında bu "mədəniyyət" normaları yumşaq ifadə etsək, tabudur. 

Həyat göstərir ki, bu dəyərlər hansı cəmiyyətdə yaşamasından asılı olmayaraq, fərdlər üçün əsasən dəyişmir. Fransa idman tarixindən bir nümunəyə müraciət etmək istəyirəm. Fransa və dünya futbolunun əfsanələrindən sayılan Əlcazair əsilli Zinəddin Zidan 2006-cı il dünya çempionatının final matçında İtaliya yığmasının müdafiəçisi Materassini kəllə zərbəsi ilə meydanda aşırmışdı. Meydandan qovulan Fransa yığmasının kapitanı və lideri Zidan idmançıya yaraşmayan hərəkəti ilə dünya mətbuatında xeyli müzakirə edildi. Final oyununu Fransa yığması uduzdu. Oyundan sonra mətbuat konfransında Materassi hadisəyə aydınlıq gətirərək bildirmişdi ki, o Zidanın ailə üzvlərinin ünvanına söyüş işlədib. və bu hərəkətinə görə üzr istəmişdi. Misaldan aydın görünür ki, Fransada doğulub tərbiyə almasına baxmayaraq, müsəlman tərbiyəsi hətta bu miqyaslı idmançını ailəsi və namusu qarşısındakı mənəvi borcunu hər şeydən üstün tutmağa istiqamətləndirmişdi. 

İslam dini, müqəddəs kitabımız Quran, Peyğəmbərimiz Məhəmməd və digər müqəddəs dəyərlərimiz bizim üçün toxunulmazdır. Olmaz ki, dünyada digərləri bizim dəyərlərimizə tolerantlıq nümayiş etdirib, hörmət və sayğı göstərsinlər? Kitabımızı yandırmasınlar, Müqəddəslərimizi eybəcər tərzdə kino və teatrlarında, nəsr və nəzmlərində, şəkillərində həqiqətdən kənar və eybəcər təsvir etməsinlər. Fikirdə azadlıq mütləqmi Peyğəmbərimizə həqarətdə ifadə olunmalıdır? Axı biz müsəlmanlar bütün peyğəmbərləri sevir və ehtiram göstəririk.

Sonda əhalisinin xeyli hissəsi müsəlman olan Rusiyada prezidentliyə can atan Xodorkovckini Avropaya xoş gəlmək üçün verdiyi bəyanata dair demək istərdim ki, bütün növ aqressiyalar ziyanlıdır. Nə qədər Parisdə terror törətmiş insanları qınayırıqsa, bir o qədər də qarşıdurmaya çağırış edən fitnəkarları qınamalıyıq."