Partiya daxilində son Məclis toplantısından sonra ikitirəlik yaranıb. Bir tərəf qurultayın sentyabrın 27-də keçirilməsinin vacibliyindən danışırsa, digər tərəf bunun əleyhinə çıxır. Partiyanın qərargahında qurultayın keçirilib-keçirilməməsi ilə bağlı da mövqeləri toqquşan tərəflər də formalaşıb. Bir tərəf partiyanın keçdiyi tarixə baxaraq, qurultayın qərargahda baş tutmasını mümkünsüz hesab edir. Digər tərəf isə, gecikən qurultayın qərargahda keçirilməsinin vacibliyindən danışır.

Müsavat Partiyasının Divan üzvü, başqanlığa iddialı şəxslərdən sayılan Tural Abbaslı istər texniki, istərsə də, insanların yerləşməsi baxımından  qurultayın qərargahda təşkil olunmasını mümkünsüz hesab edir: “Müsavat Məclisi qurultayın zamanı ilə bağlı qərar qəbul edib. İndiyə qədər bu barədə bir neçə dəfə qərar verilsə də, hakimiyyətin yer ayırmaması ucbatından baş tutmadı. Nəticədə qərarlarımızı dəyişməyə məcbur olduq. Artıq 4-cü dəfədir ki, gün müəyyən edirik. Ümid edirik ki, sentyabrın 27-nə qədər hakimiyyət münasib yer ayırar. Bizdə adımıza layiq möhtəşəm qurultayımızı keçirərik. Qurultayın qərargahda keçirilməsi ilə bağlı fikirlərə gəlincə isə , dəfələrlə qərargahda tədbir təşkil edən insan kimi deyə bilərəm ki, bu mümkün deyil. Çünki qərargahımız qurultaya gələn qonaqları yerləşdirmək, media nümayəndələrinə, səsvermə hüquqi olan insanlara yer təşkil etmək səviyyəsində deyil. Hələ qurultay üçün lazım olan başqa vasitələri demirəm. Qurultayı qərargahda keçirməyimiz ilk növbədə, qətiyyətimizi, mübarizəmizi sındıra bilər. Bu baxımdan Müsavat Partiyası sona qədər qurultayını öz istədiyi yerdə keçirmək fikrində qalmalıdır. Başqa yolu da partiyanın yoxdur”.

Tural Abbaslı qərarın hansı formada olmasından asılı olmayaraq, sona qədər başqanlıq uğrunda mübarizəyə namizəd olaraq qatılacağını söylədi: “Mən hər zaman qurultayla bağlı verilən qərarlara keçirilmə günü kimi baxmışam. Çünki fikirləşmişik ki, hakimiyyət öz gülünc siyasətindən əl çəkib, qurultaya yer ayıra bilər. O baxımdan hazır olmalıyıq. Amma bu o, demək deyil ki, harada olur-olsun Müsavat qurultayını keçirməlidir. Mən keçdiyimiz tarixə baxaraq, Müsavatın layiqli yerdə möhtəşəm qurultayının keçirilməsinin tərəfdarıyam. Təbii ki, partiyanın qərarından asılı olaraq, sona qədər namizədliyimizi qoruyub, qurultayda iştirak edəcəyik”.

Divan üzvü sentyabrın 27-də başqan İsa Qəmbərin istefa verəcəyi yaxud başqanlıq səlahiyyətlərini istədiyi şəxsə həvalə edəcəyi barədə yayılan xəbərlərə də aydınlıq gətirdi: “Müsavatda istənilən şəxs istədiyi vaxt vəzifəsindən istefa verib, gedə bilər. Nizamnamədə də göstərilib ki, başqan bu və ya digər formada vəzifəsini icra edə bilmədikdə, müavinlərindən birinə həvalə edə bilər. Mən inanmıram ki, iş bu yerə çatacaq və İsa bəy səlahiyyətlərini kiməsə həvalə edəcək. Partiyamızda başqan ola biləcək şəxslər kifayət qədərdir. Mən sona qədər İsa bəyin bu cür addım atacağına inanmıram”.

Partiyanın digər Divan üzvü Almaz Əliqızı da qurultayın qərargahda keçirilməsi fikrini dəstəkləmədiyini bildirdi: “Başqanın dediyinə görə, hakimiyyət yer ayırmasa, qurultay partiyanın qərargahında keçiriləcək. Mən öz şəxsi fikrimdə qalıram. Partiyanın qurultayının qərargahda keçirilməsinin qəti əleyhinəyəm.  Müsavat öz adına layiq yerdə qurultayını keçirməlidir. Amma biz çoxluğa tabeyik. Bu barədə qərar qəbul edilsə, tabe olacağıq. Amma bu fikirlərin həyata keçməyəcəyinə ümid edirəm. İnanmıram ki, bundan sonra qurultayın zamanı təxirə salınsın. Çünki İsa bəy fikrində çox israrlıdır. Ümid edirəm ki, biz başqanının istefa verəcəyi səviyyəsinə çatmayacağıq. Mənə elə gəlir ki, başqan səlahiyyətlərini kiməsə həvalə edib getsə, biz buna imkan verməyəcəyik. Lazım gəlsə, qanuni qaydada qurultay keçirəcəyik”.

Aylar öncədən qurultayın qərargahda yaxud açıq havada keçirilməsi ilə bağlı səsləndirdiyi fikirlərə görə tənqidlərə məruz qalan başqan müşaviri Səxavət Əlisoyun da fikirlərini öyrəndik. Başqan müşaviri Məclisin son toplantısından sonra ona qarşı olan ittihamların səngidiyini söylədi: “Məclisdə çıxışım zamanı da bildirdim ki, İsa bəyin fikirlərindən sonra sanki mənə qarşı ittihamlar səngidi. Təəssüf edirəm ki, bəzi silahdaşlarım özlərini Müsavatı bizdən çox sevmiş kimi göstərərək, əsassız yerə məni ittiham etdilər. Məndə çox istərdim ki, Müsavata layiqli yerdə qurultay üçün yer ayrılsın. Amma iqtidar bizim partiyanın tarixinə sayğısızlıq göstərərək, yer ayırmadı. Əgər bu günlərdə Müsavat və ümumilikdə müxalifətin gücü olsaydı, hakimiyyət bizə yer ayırardı. Reallıq odur ki, hakimiyyət bizə gücümüzə uyğun yer ayırıb. Bizdə bununla razılaşmaq zorundayıq. İndiyə qədər qurultayın zamanını çox dəyişmişik. Amma indi başqanımızın dilindən səslənib ki, qurultay sentyabrın 27-də keçirilməlidir. Məndə əminlikdə deyirəm ki, qurultay keçiriləcək. Əgər keçirilməsə, demək İsa Qəmbər özünə qarşı addımlar atır. Onun iradəsinə bələd olan insan kimi, qurultayın keçiriləcəyinə əminəm”.

Musavat.com