Bu ilin aprel ayının 13-də Prezident İlham Əliyevin sədrliyilə Nazirlər Kabinetinin keçirilən iclasında təhsil naziri Mikayıl Cabbarov etdiyi çıxışda təhsil sistemindəki problemlərdən danışarkən bir sıra qaranlıq məqamlara aydınlıq gətirdi. Nazirin qanunsuz yolla xeyli sayda işə qəbul olunanların prezidentin qarşısında bəyan etməsi problemin miqyasından xəbər verirdi. Araşdırmalar da göstərir ki, qanunsuz işə qəbullar daha çox qaçqın və məcburi köçkün məktəblərində, rayon və ucqar kənd məktəblərində həyata keçirilir. Uzağa getməyək, Baş Prokurorluq Yanında Korrupsiya Qarşı Mübarizə İdarəsi bir ay əvvəl Kəlbəcər və Quba təhsil şöbələrində saxta diplomlar əsasında müəllimlərin işə götürülməsi faktını aşkarlamışdı. Hər iki təhsil şöbəsinin müdiri qanunsuz əməllərinə görə istintaqa cəlb edildilər.Adı korrupsiya və saxta diplom qalmaqalında hallanan Kəlbəcər rayon Təhsil Şöbəsinin sabiq müdiri Məhəmməd Bağırov 2008-2013-cü illər ərzində 987 nəfər şəxsi Təhsil Nazirliyinin nomenkulaturasından kənar işə qəbul etməkdə, eləcə də külli miqdarda dövlət vəsaitinin mənimsənilməsinə yol verməkdə ittiham edilir.

Baş prokurorluq yanında Korrupsiya qarşı baş Mübarizə İdarəsinin İstintaq şöbəsində Kəlbəcər rayonun sabiq Təhsil Şöbəsinin müdiri Məhəmməd Bağırovla bağlı 200-dən çox saxta dövlət nümünəli əsli olmayan diplomlar aşkarlanaraq fakt kimi cinayət işi materialına da əlavə edilib. Kəlbəcər rayon təhsil şöbəsinin 2011-2012-ci  tədris illərində 2013-cü ilin büdcəsinin 510 min manat vəsaitinin talanması hələ də Maliyyə Nazirliyi tərəfindən yoxlanılıb Korrupsiya qarşı Baş Mübarizə İdarəsinə təqdim edilməyib. Amma Quba rayon Təhsil Şöbəsinin sabiq müdiri Süleyman Aslanov səlahiyyətlərindən sui-istifadə etməklə qulluq mənafeyinə qəsdən zidd olaraq saxta diplomlar əsasında Quba rayon sakinlərinin rayonun orta və tam orta məktəblərinə müəllim təyin edilməsinə nail olmaqla həmin şəxslər tərəfindən keyfiyyətsiz tədris aparılmasında, həmçinin dövlət büdcəsindən təhsilin maliyyələşdirilməsi üçün ayrılmış 103 min 455 manat məbləğində vəsaitin əmək haqqı kimi onlara qanunsuz olaraq verilməsinə şərait yaradaraq təhsil sistemini nufuzdan salan hərəkətləri ilə dövlətin qanunla qorunan mənafelərinə mühüm zərər vurmasında şübhələr üçün əsaslar olduğundan o, iş üzrə Cinayət Məcəlləsinin 308.2-ci (vəzifə səlahiyyətlərindən sui-istifadə) maddəsi ilə təqsirləndirilən şəxs qismində cəlb edilib.Hal-hazırda həbsdə olan  sabiq müdirin  Cinayət işinin istintaqı tamamlanaraq baxılması üçün aidiyyəti üzrə Bakı Ağır Cinayətlər Məhkəməsinə göndərilib.

Xatırladaq ki, Baş Prokuror yanında Korrupsiyaya Qarşı Mübarizə Baş İdarəsində Kəlbəcər rayon Təhsil Şöbəsinin sabiq  müdiri Məhəmməd Bağırovun qulluq səlahiyyətlərindən istifadə edərək müxtəlif dövrlərdə 30-dan artıq şəxsi saxta diplomlar əsasında şöbənin tabeçiliyində olan ayrı-ayrı ümumtəhsil məktəblərinə işə qəbul etməsində şübhələr üçün əsaslar olduğundan o, Cinayət Məcəlləsinin 308.2-ci (vəzifə səlahiyyətlərindən sui-istifadə) maddəsi ilə təqsirləndirilən şəxs qismində istintaqa cəlb olunub.Hazırda cinayət işi üzrə rayon təhsil şöbəsinin vəzifəli şəxsləri tərəfindən törədilməsi ehtimal olunan digər cinayətlərin aşkar edilməsi istiqamətində zəruri istintaq-əməliyyat tədbirləri davam etdirilir.Nədən Quba rayon təhsil şöbəsində 104 min israfçılığa görə Süleyman Aslanov, həbsə atılır amma yüzlərlə şəxsə saxta diplom verən və  510 min manat büdcə vəsaitini həzm-rabedən keçirən M.Bağırov həbs edilmir?