Mənim üçün ən önəmli olan və səmimi deyirəm ki, xəstə ola-ola bu gün bura gəlməyimin, replika üçün söz istəməyimin tək bircə səbəbi var. Keçən məhkəmə iclasında İlham Məmmədovun emosional çıxışı məni bura gəlməyə vadar edib. O bu gün üçün çox xarakterik bir çıxış idi. Bu çıxış həmin cinayətin törədilməsini, ölkədə baş verənləri xarakterizə edən sanki lakmus kağızı idi. Siz fikir verdinizsə, İlham Məmmədov öz dünyagörüşündə, onun kimilərin bu gün təmsil olunduğu hakimiyyətdəkilərin dünyagörüşünə baxanda özünü haqlı və tam günahsız sayır. Onun davranışlarına görə ilk dəfə mən məhkəmə sədri kimə Sizə etiraz elədim ki, hörmətli məhkəmə, axı bu adam Sizi təhqir edir, Sizə qarşı hörmətsizlik edir, Sizə “sən” deyə müraciət edir. Ancaq Siz ona bunu deməyə imkan yaratdınız. İlham Məmmədovun həmin davranışı və o dəmir barmaqlıqlar arasından çığırması ki, “mən 2003-cü ildən üzü bəri meydanlarda radikal müxalifətin anasın ağlatmışam, həmin o xüsusu vasitələr dediyiniz dəyənəklə müxalifətə divan tutmuşam, mən niyə həbs olunmalıyam”. Bax bu, bu günki real situasiya üçün çox xarakterik çıxış oldu. Bu gün ölkədə İlham Məmmədov kimilər çoxdur və onlar hesab edirlər ki, kimlərinsə vəzifələrində qalması üçün qanunu kobudcasına pozublarsa, dinc nümayişçilərə dünyanın gözü qarşısında divan tuturlarsa, deməli onlar əlahiddə hüquqlara malikdirlər ki, cinayət də törədə bilərlər, kimlərinsə cibinə nəşə də qoya bilərlər, kimlərinsə haqqını yeyə də bilərlər və cəzasız qalmalıdırlar. Ona görə ki, bu adamların bir çoxlarının bu günki hakimiyyətin vətəndaşları ilə davranışında xüsusu rolları var. (Bu zaman məhkəməyə sədrlik edən etirazını bildirir və Aslan İsmayılovun siyasi bəyanatlar səsləndirdiyini deyərək onun çıxışını kəsmək istəyir. Aslan İsmayılovsa təkidlə məhz İlham Məmmədovun çıxışına əsasən həmin fikirləri deməyə məcbur olduğunu bildirərək çıxışına davam edir).

      

Hörmətli məhkəmə, hörmətli kolleqam çıxış elədi və düz də dedi ki, əgər Vüsal Şilder qətlə yetirilməsəydi, baxdığımız cinayət işini heç bilən olmayacaqdı. Bəli, mən də o fikirdəyəm. Niyəsini də deyim. Ona görə ki, bu fikir ölkədə baş verən haqsızlıq və ədalətsizlyin nəticəsidir. Bu gün yüzlərlə, minlərlə belə hadisələr olur və cəzasız qalır. Bu gün bir daha deyirəm, bu aqibətlə üzləşənlərin, təqsirləndirilən şəxslərin də günahkarı yenə də mövcud hakimiyyətin üsul-idarəsidir. Çünki hər bir Azərbaycan vətəndaşı bilsə ki, qanun qarşısında hamı bərabərdir, qanunu pozmaq olmaz, qanunu pozan layiq olduğu cəzanı alacaq, onlar bu addımları atmazlar. Bu gün hakimiyyətin ən yüksək pilləsində təmsil olunan ilham məmmədovlar bilsələr ki, günahsız gəncin cibinə narkotik vasitə qoymaq olmaz, haqqını tələb edəni şərləyib tutdurmaq olmaz, sözünü deyəni polisdə döymək olmaz, rüşvət verməyənin əmlakını əlindən almaq olmaz, hakimiyyətdəkilərə yaltaqlanmayının biznesini çökdürmək olmaz, seçkini qazanmışı kənarda qoyub milyon verəni deputat eləmək olmaz, aktiv vətəndaş mövqeyi olanın yataq otağını çəkmək olmaz yuxarıda diqqətinizi cəlb etdiyim fikirlər də səslənməzdi. Siz bu məhkəmə iclasında gördünüz, İlham Məmmədov dəfələrlə dedi ki, Aslan İsmayılovda mənə qarşı kin-küdurət, nifrət hardandır? Dolayısı ilə dəfələrlə məni təhdid etdi. Hətta açıq dedi ki, “Sənin burada olacağını bilsəm o mitinqlərdə görsəm sən bura gəlməzdin”  

Hörmətli məhkəmə, mən Sizə və zalda oturanlara bildirirəm. Nə İlham Məmmədov, nə onun havadarlarının havadarlarından həyatı boyu çəkinməmişəm və törətdikləri qanunsuzluqları hər birinin üzünə 25 il Azərbaycanda yaşadığım müddətdə demişəm, nə qədər də sağ qalacam, deyəcəm. Amma hörmətli məhkəmə, bir şeyi demək istəyirəm. Bu məhkəmə iclasında biz zərərçəkənlər dəfələrlə təhqir olunduq. Mən özümü qoyuram kənara. Amma bir balasını itirmiş ana burada təhqir olundu. İlham Məmmədovun nə vəkillərindən, nə qohumlarından biri ona bircə dəfə demədi ki, bu cür davranmaq olmaz. Mən Sizi əmin edirəm, əgər İlham Məmmədov belə davranmasaydı, nə mənim bu cür çıxışım olardı, nə zərərçəkənlərin bu cür barışmaz münasibəti olardı. Bəlkə də məhkəmə tamam başqa axarda gedərdi. Məhz hadisələrin bu cür davam etməsi və bunların məni düşmən qisimində görməsi bizim deyil, qarşı tərəfin davranışından qaynaqlandı. Hörmətli məhkəməyə və zalda oturanlara deyirəm bunu, mən əsla heç kimə düşmən deyiləm. İlham Məmmədov mənim üçün sıradan bir vətəndaşdır, onun havadarları ilə də mənim düşmənçilyim yoxdur, çünki mən kiminləsə düşmənçilik aparan deyiləm. Mən bu işə düşmən gözündə baxsaydım, Siz əmin edirəm ki, bu işlə bağlı qaldırmadığım onlarla hallara diqqqəti yönəldərdim. Təkcə bircə məqamı deyim. Yaşar Sumer ifadəsində deyir ki, İlham Məmmədovun qohumu Nərimanov polisində işləyən Azər bu işdə birbaşa iştirakçıdır. Amma mən bir dəfə də onun adını çəkmədim. Ona görə ki, mən cinayət işini oxuyanda başa düşdüm ki, o adamın bu işə heç bir aidiyyatı yoxdur. İkincisi, hörmətli məhkəmə, zərərçəkənlər və bu iş ətrafında işlə tanış olanların hamısı Vüsal Şilderin ölümünün arxasında da İlham Məmmədovun dayandığını zənn edirdi. Amma mən işlə tanış olanda bunun o cür olmadığını görüb fikrimi açıq bildirdim. Dəfələrlə mən burada çıxışımda da dedim ki, bu işin başında dayanan və ən böyük canfəşanlığı edən İlham Məmmədov olsa da Vüsalın ölüm işindən onun xəbəri yoxdur

 Məhkəmə prosesində heç vaxt istəmədim ki, İlham Məmmədov və digər təqsirləndirilənlərlə münasibətləri gərginləşdirəm. Halbuki hər məhkəmə prosesindən sonra onların qohumları bayırda dəfələrlə mənə hədə -qorxu gəldilər. Məhkəmə proseslərinin birindən sonra isə bunlardan birinin bir yaşlı qohumu açıq şəkildə məni təhdid edərək “bunu avtobusun altına salmaq lazımdır” dedi. Amma buna heç əhəmiyyət də vermədim və olayı şişirtmək istəmədim. Bizim ən böyük bəlamız nədir? Mən bu günki işdə və gələcəkdə Vüsal Şilderin ölüm işində də hədə-qorxu və pulla ələ alma ilə işi düzüb-qoşmaq istəyənlərə müraciət etmək istəyirəm. İnanın, bu hadisə nəinki bu zalda oturanlardan hər birinin, hər bir Azərbaycan vətəndaşının başına gələ bilər. Ona görə də sizin hər biriniz üçün hədə-qorxudan qorxmayan, pula satılmayan vəkillər lazımdır. Siz çalışmayın ki, vicdanla vəzifəsini yerinə yetirənlərə hədə-qorxu gələsiniz. Əksinə, çalışın belə vəkillərin sayı çox olsun ki, nə zamansa haqqınız pozulanda ürəklə üz tutacağınız və etibar edəcəyiniz adam tapmaqda çətinlik çəkməyəsiniz. Ona görə ki, bu ölkədə hər bir vətəndaşın vəkilə ehtiyacı var. Ən yüksək kürsüdə əyləşən vəzifəlilərlə üz-üzə gələndə də onlara demişdim ki, qanundan qorxun və onu pozmayın, vəkillərlə də belə aşağılayıcı tonda rəftar etməyin. Sonra həmin şəxsləri mən müdafiə edəndə onların özünə demişdim ki, yadınızdadırmı vəkillərə divan tutduğunuz? Amma məni özlərinə düşmən hesab edənlər də üstümə gəldilər ki, onların müdafiəsini həyata keçirim.

     

 istərdim ki, Siz bu iş üzrə təqsirləndirilənlərin şəxsiyyətlərinə və prosesdəki davranışlarına fikir verəsiniz. Mən hakim işləmiş bir adam kimi bir həqiqəti bilirəm ki, cəza təyin edilərkən cinayəti törədən şəxsin cinayət baş verəndən sonrakı davranışına xüsusi fikir vermilməlidir ki, bu adam hadisədən peşman olubmu, cinayət törətdiyini etiraf edirmi? Məhz buna görə ayağını ayağının üstünə qoyub hakimə “sən” deyə müraciət etmələrinə, zərərçəkmişlərə və onların nümayəndəsinə “çıxaram danışarıq” kimi hədə qorxularına fikir verməlisiniz. Cəza təyin olunanda bunlar hökmən nəzərə alınmalıdır ki, bu şəxslər azadlığa çıxandan sonra bir daha həmin “reşotka” arxasına qayıtmasınlar. Sizə səmimi deyirəm, cəzaçəkmə müəssisələrinin islah-əmək müəssisəsi olduğuna heç də inanmıram, amma mən bir şeyə inanıram ki, cinayəti törədib etiraf etməyən hökmən yenidən cinayət törədəcək və yenidən cəzaçəkmə müəssisəsinə qayıdacaq. Hörmətli məhkəmə, Sizdən bir  xahişim də var, Vüsal Şilderi 10 yaşında övladlığa götürüb, ona sahib çıxan bir alman vətəndaşı bu zalda əyləşib. O bir ildən artıqdır ki, bu işin arxasınca gedir. Vüsal Şilderin anasına bu ölkədə bu müddət ərzində tək o dayaq durub. Bu gün də bu cinayətin ifşa olunmasının səbəbkarı heç də hüquq-mühafizə orqanlarının qəhrəmanlığı deyil, məhz Almaniya hakimiyyətinin tələbidir. Məhz Alman hökuməti vətəndaşı olan Vüsal Şilderin müdafiəsinə qalxıb. Bu məhkəmə prosesində və bundan öncəki proseslərdə də nə baş verdiyini gördük. Bu ölkədə balasını itirmiş anaya sahib çıxan hüquq-mühafizə orqanları olmadı, amma bu alman vətəndaşı həm uşağın arxasında oldu, həm anaya dayaq durdu. Bu məhkəmə zalında belə bu ananı təhqir etdilər, buna reaksiya verən olmadı. Yeganə reaksiya verən yenə həmin alman vətəndaşı oldu, o şığıyaraq onlara təpindi ki, kimsə mənim həyat yoldaşımı təhqir edə bilməz. Hörmətli məhkəmə, Sizdən xahiş edirəm ki, bunların hamısına diqqət yetirəsiniz. Çünki həyat çıx qısa və biz bildiyimizdən ədalətlidir. Həyat heç kimin cinayətini və günahını bağışlayan deyil. Mən Sizin şəxsinizdə Azərbaycan hüquq-mühafizə orqanlarının öz vətəndaşının pozulmuş haqqına olan münasibətini görəcəm. Mən bu gün də hansı məhkəmə qərarı olacağını bilmirəm. Amma mənim üçün vacib olan budur ki, bu alman vətəndaşı qarşısında qürurla “Azərbaycan Dövlətinin vətəndaşıyam” deyə biləcəmmi, yoxsa onun qarşısında gözükölgəli olacam ki, bizim ölkədə bir gəncin qətlini hüquq-mühafizə orqanları göz yumurlar? Diqqətinizə görə sağ olun.