“Son vaxtlar Putinin hərəkətlərini yüzlərlə insan şərh edir. Oxuyanda belə bir təsəvvür yaranır ki, çoxları Putini sadəlövh, bir neçə addım qabağı ölçüb-biçə bilməyən siyasətçi sayır. Ancaq Putinin hakimiyyətə gələndən bu günə kimi keçdiyi yola baxanda görərik ki, o, heç də sadəlövh siyasətçi deyil. Lakin təbii ki, Rusiyanın Ukraynaya qarşı addımı yanlışdır və çox böyük problemlər meydana gələcək. Bu, Rusiyanın özünə də çox ciddi problemlər yaradacaq addımdır. Putinin yanlışlığı təkcə Ukrayna ilə başlamayıb.

Ümumiyyətlə, avtoritar rejim qurmaq, korrupsiyalaşmış hakimiyyət qurmaq siyasətinin özü yanlış siyasətdir. Bunu bir müddət davam etdirmək olar. Ancaq dünya təcrübəsi göstərir ki, avtoritarlaşmış və korrupsiyalaşmış rejimlər hansısa bir mərhələdə qaçılmaz böyük sosial partlayışlarla üz-üzə qalır və siyasi səhnədən getməli olurlar. Putinin səhvi budur ki, Rusiyada belə bir siyasi sistem qurdu. 

Putinin Ukraynaya müdaxilə etməsində, bu cür riskə getməsində çox vacib amil var. Çoxları bu amilin fərqində deyil. Rusiyanın bütün tanınmış ekspertlərinin əsaslandırılmış proqnozları var ki, təqribən yaxın 3 ildən sonra Rusiyanı böyük iqtisadi böhran gözləyir. Bütün arqumentli proqnozlara görə, Rusiya iqtisadiyyatı artıq böhran dövrünə qədəm qoyub. Bu gedişlə 3 ildən sonra böyük iqtisadi böhran yaranacaq. Təbii ki, bu böhran baş verəndə Rusiya əhalisinin necə reaksiya verəcəyi də bəlli idi. Korrupsiyanın baş alıb getməsi, məmur özbaşınalığı göz qabağındadır. Təqribən üç ildən sonra dəhşətli iqtisadi böhran Rusiyanı böyük sosial  etiraz dalğasının bürüməsi ilə üz-üzə qoyacaq. Bu perspektivi Vladimir Putin çox dəqiq bilirdi". 

E.Namazovun sözlərinə görə, qonşuluqda olan Ukrayna dövlətinin Yanukoviçdən sonrakı yeni hakimiyyətinin Ukraynanı Qərbə inteqrasiya etdirəcəyi və böyük inkişaf yoluna qədəm qoyacağının da Rusiya əhalisi üçün rejimləri müqayisə etmək imkanı yaradacağını Putin bilirdi. Baş verənlərin nəticəsində Putin iqtidarının Gömrük İttifaqı, Avrasiya İttifaqı, NATO-nu mövcud sərhədlərdə saxlamaq, Avropa Birliyinin genişlənməsinin qarşısını almaq kimi böyük planlarının hamısı da alt-üst olurdu: “Vladimir Putin bütün bunları bilirdi və qeyd olunan proseslərin onun rejiminin fəlakətli sonu olacağını özü üçün dəqiqləşdirdiyi üçün Ukraynaya hərbi müdaxilə etdi. 

Bir müddət öncə Putin jurnalistlərlə görüşündə maraqlı bir xatirə danışdı. Dedi ki, mən uşaq vaxtı bir dəfə dəyənəyi götürüb həyətdə böyük bir siçovulu qovmağa başladım, siçovul binanın padyezində küncə sıxıldı, görəndə ki, qaçmağa yer yoxdur geri dönüb üstümə cumdu. Bunu Putin qəflətən danışdı və dedi ki, heç kimi küncə sıxmaq olmaz. Küncə sıxılan istənilən canlı ən əcaib, riskli addımlara gedir. Psixoanalizin xaç atası Ziqmund Freyd yaşasaydı, deyərdi ki, Putin niyə məhz bu xatirəsini jurnalistlərə danışır. Putin ölkəsində həm daxili siyasətdə böhranın, həm xarici siyasətdə böhranın onu küncə sıxışdıracağını və xalqın ayağa qalxacağını bilirdi. Ona görə də qəfildən Krımı işğal əməliyyatına komanda verdi. Putin bununla özü üçün bir neçə uduş əldə etmək istəyir. Birincisi, ölkənin daxilində şovinist imperiya kampaniyası əhaliyə təsir edir və Putinin reytinqini daxildə qaldırır. Putin özünü Rus imperiyasının tarixi torpaqlarını qaytaracaq siyasi lider kimi göstərir və cəmiyyəti öz ətrafında mobilizə edir, eyni zamanda bununla cəmiyyətin diqqətini iqtisadi problemlərdən, yaxınlaşan iqtisadi böhrandan yayındırır. Hələlik müvəqqəti buna nail olub". 

E.Namazov vurğuladı ki, Krımın işğalı ilə bağlı Rusiyaya qarşı beynəlxalq sanksiyalar işə düşəndə isə Putin bundan məharətlə istifadə edəcək. Onsuz da yaxın 3 ilə qaçılmaz olan fəlakətli sosial, iqtisadi böhranı Putin ABŞ-ın və Avropa Birliyinin sanksiyalarının ayağına yazacaq: “Halbuki, heç bir sanksiya olmasa da Rusiyanı bu perspektiv gözləyir. Putin isə böhranı sanksiyaların ayağına yazacaq və xalqı dəvət edəcək ki, dözümlü olsunlar, bu vəziyyətə korrupsiya, avtoritar rejim yox, Krıma görə Qərbin sanksiyaları səbəb olub. Krım məsələsi olmasaydı, rus xalqı böhranın günahkarı kimi hakimiyyətin yaxasından yapışacaqdı. Ancaq Putin Krım kartını oynadaraq əhaliyə deyəcək ki, Krım məsələsi Rusiya dövlətinin ümummilli projesidir, bu projenin həyata keçirilməsi müəyyən dövr üçün problemlər yaradır, buna dözmək lazımdır”.

E.Namazov onu da dedi ki, Putinin digər məqsədi Ukraynaya müdaxilə edib Avropa və Amerika ilə alver etməkdir: “Putin şərtlər qoyacaq ki, müdaxiləni dayandırmaq müqabilində Qərb NATO qoşunlarını Ukrayna ərazisində yerləşdirməmək barədə təminat versin. Qərbdən Rusiyanın daxilində hakimiyyətə qarşı hərəkətlənmələrə dəstək verməmək təminatı almaq istəyəcək”.

müsavat.com