Moderator.az xəbər verir ki, Soçidə Rusiya və Azərbaycan prezidentlərinin Ermənistanın baş naziri ilə danışıqları keçirilib. Tərəflər İrəvanla Bakı arasında münaqişənin sonrakı nizamlanmasını müzakirə ediblər.

 

Görüş iştirakçıları Rusiyanın dəstəyi ilə Ermənistan-Azərbaycan arasında sərhədlərin delimitasiyasi üzrə komissiyanın yaradılması, həmçinin regionda nəqliyyat dəhlizlərinin açılması barəsində razılığa gəlib.

 

Rusiya prezidenti Vladimir Putin, Azərbaycan lideri İlham Əliyev və Ermənistanın baş naziri Nikol Paşinyan Dağlıq Qarabağda atəşin və bütün hərbi əməliyyatların dayandırılması barəsində razılaşmanın imzalanmasının ildönümü ilə əlaqədar Soçidə üçtərəfli görüş keçirib.

 

Tərəflər Azərbaycanla Ermənistan arasında sərhəddə təhlükəsizliyin və sabitliyin səviyyəsinin yüksəldilməsi üzrə addımlar atılması barədə razılığa gəlib.

O cümlədən, Ermənistanla Azərbaycan arasında Rusiyanın konsul dəstəyi ilə sərhədlərin delimitasiyası üzrə ikitərəfli komissiyanın yaradılması və sonradan demarkasiyası haqqında razılıq əldə edilib.

 

"Biz bir sıra məsələlər haqqında razılığa gəldik və mən onları həlledici hesab edirəm. Bunlardan biri ondan ibarətdir ki, bu ilin sonunadək biz iki dövlət arasında sərhədlırin delimitasiyası və demarkasiyası üzrə mexanizmlərin yaradılmasını razılaşdırdıq. Ümid edirəm ki, bu, imkan daxilində tez baş verəcək, çünki bunun üçün heç bir maneə yoxdur", - görüşün yekunlarına dair görüşdə Putin qeyd edib.

 

Bundan başqa, Rusiya prezidenti əlavə edib ki, tərəflər humanitar məsələlərdə irəliyə gedib, nəqliyyat dəhlizlərinin açılmasında razılığa gəlib. Onun sözlərinə görə, görüş çərçivəsində iqtisadi əlaqələrə xeyli diqqət yetirilib.

 

"İlk addım olaraq biz nəqliyyat dəhlizlərinin-həm dəmir yolu, həm də avtomobil yolunun açılması haqqında danışdıq. Düşünürəm ki, biz bu məsələlər üzərində kifayət qədər uzun müddət işləyən baş nazirlərin müavinlərinə təşəkkür etməliyik",-Putin qeyd edib.

 

Görüş iştirakçıları danışıqları yüksək qiymətləndirib, regionda vəzyyətin sabitləşməsində Rusiya sülhməramlılarının işinin müsbət xarakter daşıdığını qeyd edib, həmçinin münasibətlərin yaxşılaşmasına yönləndiklərini təsdiq ediblər.

 

Məsələn, Əliyev qeyd edib ki, Bakı İrəvanla uzun illər mövcud olan qarşıdurmaya son qoymağa hazırdır, Paşinan isə Ermənistanın regionda sülh erasına yönləndiyini təsdiq edib.

 

"Qazeta.ru" tərəfindən sorğu edilən ekspertlər belə ümumi fikirdədir ki, görüşün ən mühüm yekunu Ermənistanla Azərbaycan arasında sərhədlərin delimitasiyası haqqında razılaşmadır.

 

Moskva Beynəlxalq Münasibətlər İnstitutunun Qafqaz problemləri və regional təhlükəsizlik Mərkəzinin baş elmi işçisi Nikolay Silayevin fikrinə görə, bu, son aylar regionda sabitliyi pozan sərhəddəki gərginliyin kəskinləşməsinin qarşısını almağa kömək edəcək.

 

"Ehtimal olunur ki, bu ona gətirib çıxaracaqdır ki, sərhəddə gərgiliyin kəskinləşməsi halları azalacaqdır",-ekspert qeyd edib.

 

Lakin Silayevin nöqteyi-nəzərincə, bu, çətin ki, bilavasitə Dağlıq Qarabağ ətrafında gərginliyi aradan qaldırsın.

 

Ekspertin fikrincə, Ermənistanla Azərbaycan arasında dərin ixtilaflar qalmaqdadır.

 

"Bir görüşdə bu ixtilafları həll etmək mümkün deyil. Burada önəmlisi odur ki, tərəflər sərhəddə sabitliyin və təhlükəsizliyin səviyyəsinin artırılması üzrə addımlar atılması barədə razılığa gəlib, həmçinin 10 noyabr 2020-ci və 11 yanvar 2021-ci il razılaşmalarının müddəalarının icrasına tərəfdar olduqlarını təsdiq edib. Yəni prinsipcə Ermənistan və Azərbaycan sülhə tərəfdar olduqlarını təsdiq edib. Lakin bunların necə reallaşması hələ bəli deyil. Görünür, bu, heç də tez baş tutan məsələ deyil",-Silayev əlavə edib.

 

Onunla qismən MDB ölkələri Qafqaz İnstitutunun şöbə müdiri Vladimir Yevseyev də razıdır. Onun sözlərinə görə, Dağlıq Qarabağ ətrafında gərginlikdən qurtulmaq mümkün deyil, lakin sərhədlərin delimitasiyası və demarkasiyası üzrə işçi komissiyasının yaradılması iki dövlətin sərhədlərində gərginliyi azaltmağa imkan verəcəkdir.

 

"Qarabağda vəziyyət onsuz da mütəmadi olaraq tanınmamış "Dağlıq Qarabağ respublikası" ətrafında gərginləşəcək. Yəni orada gərginlik davam edə bilər, lakin prinsipial məqam ondan ibarətdir ki, tərəflər bu görüşdə iqtisadi münasibətlərdən kənara çıxdılar və təkcə nəqliyyat dəhlizlərinin açılması deyil, həm də demilitasiya və demarkasiya üzrə mexanizminin yaradılması məsələsini müzakirə etdilər. Lakin hələ bu mexanizmin necə işləyəcəyi bəlli deyil",-ekspert belə deyib.

 

"Emosional bəyanatlar verilir və hələ çox şeylər baş verəcəkdir. Əlbəttə, tərəflər arasında sülh müqaviləsində nələrin yazıla biləcəyi haqqında güclü ixtilaflar var, lakin heç kim bu görüşdə belə bir müqavilənin imzalanmasını gözləmirdi. Lakin bu görüşün baş tutması onu göstərir ki, tərəflər çətin də olsa razılığa gəlməyə yönəlib",-ekspert belə deyib.

 

"Nikol Paşinyana ABŞ, Böyük Britaniya və Fransa tərəfindən ciddi təzyiqlər var. Yəni Paşinyan mürəkkəb vəziyyətdədir, amma həm erməni əhalisinin təzyiqləri, həm də vəziyyətin özü onu hər hansı güzəşt axtarışına sövq etdi. Doğrudur, belə olan halda Azərbaycan tərəfinin də belə güzəştə hazır olması vacibdir",-deyə ekspert fikrini tamamlayıb.