“Ermənistana, bu ölkəni idarə edənlər tərəfindən net şəkildə bəzi göstərişlər və təlimatlar verilib. Yaxın günlərdə və həftələrdə onlar maksimum çalışmalıdırlar ki Rusiyanın moderatorluğu ilə hazırlanan bəzi proseslər ya pozulmasın, ya da ləngidilməsin”.

 

Hərbi ekspert, ehtiyatda olan polkovnik Üzeyir Cəfərov bu fikirləri Musavat.com-a açıqlamasında bildirib.

 

Ekspertin sözlərinə görə, çox ciddi şəkildə, əsasən də rəsmi Moskvanın rəhbərliyi altında noyabr ayında imzalanması gözlənilən sənədlər hazırlanıb və demək olar ki, razılaşdırılıb.

 

Bu mənada Ü.Cəfərov hesab edir ki, Ermənistan parlamentində anti-Azərbaycan sənədinin qəbul olunmaması təsadüfi deyil: “Ermənistan parlamentində qardaş Türkiyə və Azərbaycana qarşı bəyanatın da səs çoxluğu ilə qəbul edilməməsi məqədyönlü şəkildə Paşinyan və yaxın tərəfdarları tərəfdarları tərəfindən reallaşdırılan bir addım kimi dəyərləndirilə bilər. Amma buna da çox aldanmamalıyıq və öz işimizi möhkəm tutmalıyıq. Nəzərə almalıyıq ki, ötən həftə Rusiya prezidenti hansısa kompromislərin vacibliyindən danışdı. Şəxsən mən çox narahatam ki, qalib olmağımıza baxmayaraq, yenə Rusiya öz vassalı üçün hansısa güzəştlər, kompromislər hazırlaya bilər. Yəqin ki, yaxın günlərdə biz bunların nə demək olduğunu öyrənə biləcəyik. Sənədlər daha böyük ehtimalla Azərbaycanın maraqları nəzərə alınmaqla hazırlansa da, orada Ermənistanın layiq olmadığı, onların kaprizlərini nəzərə alan bəzi nüanslar da əlavə olub”.

 

Polkovnik qeyd etdi ki, qalib tərəf Azərbaycandır və bu məsələlərdə də biz diktə etməliyik:

 

“Nə olur-olsun, biz heç bir güzəştə-filana getməməliyik. Vaxtilə biz uzun illər kifayət qədər səbir və dözüm nümayiş etdirdik. Müharibə yolu ilə məcburiyyət qarşısında qalıb, məsələni həll etdiksə, şəhidlərimizin qanı və canı hesabına düşməni və havadarlarını diz çökdürdüksə, deməli, biz deyən və bizə məqbul saydığımız formada hər şey tənzimlənməlidir”.

 

Ü.Cəfərov hesab edir ki, noyabr ayında Ermənistanda çox ciddi gərginliklər olacaq: “Ancaq bu da nəticə verməyəcək. Bu və ya digər üsullarla narazılıqlar və narazılar zərərsizləşdiriləcəklər. Sərhədlər tanınacaq və növbəti mərhələlərdə digər işlərin həyata keçirilməsi nəzərdə tutulacaq. Sözsüz ki, ziyanına olsa da, Ermənistan bu sənədləri imzalayacaq, ancaq vaxtı çox uzatmaq üçün əməli fəaliyyətə başlayacaq. Biz bu arada çox sərt və tələbkar formada həm Ermənistandan, həm də ona havadarlıq edən Rusiyadan və digər dövlətlərdən tələb etməliyik ki, məsələ çox da uzadılmasın. Revanşist qüvvələr sona qədər dirəniş göstərəcəklər. Amma onların səyləri nəticəsiz qalacaq. Bunu Rusiya da, Ermənistanı idarə edənlər də təxmin edir”.

 

Polkovnik qeyd etdi ki, son günlər erməni silahlılarının Şuşa ətrafında görüntülənməsi və bəzi digər məsələlər də boş, blef üçün atılan uğursuz addımlardır: “Yaxın həftələrdən onlardan çoxu yerli-dibli ya oralardan uzaqlaşdırılacaqlar, ya da zərərsizləşdiriləcəklər. Nə, necə olacaq, hamılıqla görəcəyik...”