Türkiyədə yaşayan tanınmış aktrisa Cəmilə Tağızadə Moderator.az-ın suallarını cavablandırıb.
- Son bir neçə həftədə məmurların sosial şəbəkələrdə yayılan videosu gündəmin əsas mövzusuna çevrildi. Sizin bu mövzuda mövqeyiniz necədir?
- Bu, çox böyük bir tərbiyəsizlik və biabırçılıqdır. Onların evində oturub nəvə oynadan vaxtıdır. Digər tərəfdən də istər cavan olsun, istər yaşlı, heç kim gərək öz vəzifəsindən sui-istifadə etməsin. Yanında çalışan işçilərə qarşı əxlaqsızlıq və tərbiyəsizlik etməsin. Bu, rəsmən təcavüz, əxlaqsızlıqdır. Ümid edirəm ki, videoları yayılan insanlar evindəki uşaqlarından, nəvələrindən, həyat yoldaşından utanıb. Belə insanlar utanıb yerə girsəydilər, bu cür hadisələrlə üzləşməzdik. Bu cür videolar da yayılmazdı. Bir var ki, insanın şəxsi həyatı olsun, evində baş verən bir hadisəni çəkib paylaşsınlar, bir də var ki, iş yerində əxlaqsızlıq, tərbiyəsizlik, iş yerində seksual hərəkətlərə yol verilsin. Bu sənin həyat yoldaşın deyil, bu sənin rəsmi can yoldaşın deyil. İstər yaşlı, istər cavan - vəzifəsindən sui-istifadə edən hər kəs mənim üçün əxlaqsız və tərbiyəsizdir. Bu cür şərəfsiz və əxlaqsızlara görə bizim bir çox istedadlı gənclərimiz iş tapa bilmir. Bir çox savadlı insanlarımız, qızlarımız evinə çörək apara bilmir, işsiz qalıb. İctimai qınaqla deyil, dövlət səviyyəsində bu məsələlər həll olunmalıdır. İnsanları işə məhz onların işi yaxşı bacardıqlarına görə götürmək lazımdır, başqa bacarıqlarına görə deyil.
- Ötən gün yeni çəkilən xarici filmlərə baxdıqda özünüzü aktrisa hesab etmədiyinizi bildirmişdiniz. Çox istərdik ki, bu fikrinizə aydınlıq gətirəsiniz...
- Sevdiyim bir çox rejissorlar var ki, hər dəfə onların işlərini izlədikdə düşünürəm ki, mən obraz canlandırmamışam. Demirəm bizim rejissorlar yaxşı deyil. Azərbaycanda işinin peşəkarı olan ən yaxşı rejissorlarla çalışmışam. Bizim də çox yaxşı aktyor və rejissorlarımız var.
Açıq danışsaq, Hollivudun film məktəbinə, filmlərinə yatırılan maliyyə bizdə yoxdur. Ümid edirəm ki, bir gün bizdə də o səviyyədə filmlər çəkiləcək. Biz də “Kann” film festivalına tammetrajlı filmlər göndərəcəyik. Bizdən daha çox qısametrajlı filmlər göndərilir.
O filmləri izlədikdən sonra gördüm ki, mən çox zəif aktrisayam. Bəlkə də üzərimdə bir müddət çalışsam, onlar kimi böyük filmlərdə baş rolları canlandıran aktrisa ola bilərəm. İstedad var, amma o istedad da paslanmamlıdır. Hələ ki, dünya səviyyəsinə çıxacaq bir layihəm yoxdur.
- Ana olduqdan sonra həyatınızda sanki bir durğunlaşma başladı. Cəmilə Tağızadə ana olduqdan sonra həyatında nələr dəyişdi?
- Ailənin çox sevilən övladıyam və çox sevilirəm. Uşaqlıqdan indiyə kimi hər zaman sevgi, qayğı içində böyümüşəm. Bir var ki, sən özün ana olursan, anan səni sevdiyi kimi sən də balanı sevirsən. Daha fədakar, qayğıkeş olursan. Sevgi varsa, o 10 qat daha çoxalır, daha anlayışlı olur, müdrikləşirsən. Mən onsuz da uşaqları sevirdim, bu yaşıma qədər içimdəki uşağı öldürməmişəm. Uşaqlar o enerjini məndən hiss etdikləri üçün mənə tərəf gəlir. Bir də var ki, sən ana olursan, dünyaya başqa gözlə baxırsan. Daha mülayim, mərhəmətli olursan, həssaslaşırsan. O zaman sevgin birə-on artır. Bir insanı özündən daha çox sevməyə başlayırsan.
Mən özümü tamamən övladıma həsr etmişəm, heç də bundan narazı deyiləm. Deyirlər ana olduqdan sonra özümü unutmuşam. İçimdə olan boşluq dolub, çox xoşbəxtəm. İstəyirəm ki, ana olmağa layiq olan qadınlarımız - hər kəs ana olsun. Övladı dünyaya gətimək ana olmaq deyil. Ana olmaq ona bir ömür boyu sahib çıxmaqdır.
- İllərlə bu sənətdə çalışan, sözünü deyən xalq artistlərimizin bir çoxu kirayələrdə qalıb, yaşamlarını təmin edə bilmədikləri halda bir- iki filmə, seriala çəkilən aktrisaların lüks həyat tərzlərinin şahidi oluruq. Gənclər isə o aktrisaları özünə örnək götürür.
- Kim ki quru maaşa işləyir, onun heç nəyi olmur. Elə insanlar var ki, kimsə imkanlı adamla ailə qurur, yoldaşı ona dəstək olur, beləcə, irəli gedir. Kiminsə sevgilisi və sevgililəri var. Quru maaşla heç vaxt kimsə irəli gedə, bahalı avtomobilə, lüks evlərə sahib ola bilməz. Bu, mümkün deyil.
Bizim elə aktyor və rejisorlarımız var ki, istedadlı, bacarıqlı, çalışqandır. Çəkildikləri reklamlarla, gördükləri işlərlə yaxşı pul qazanırlar. Onları ittiham edib, barmaqla göstərib deyə bilməzsən ki, o rüşvətxordur. Bəziləri isə kişilərin hesabına irəli çıxır, onların çoxunun istdedadları yoxdur. Yaxşı ki, o kişlər var ki, onları qabağa çəkiblər. Təəssüf ki, çoxluq təşkil edir. Sponsor olmasa, itib-batarlar, çünki istedadları yoxdur.
Xəyalə Rəis
Fotolar Əli Əliyevə məxsusdur
