Dekabrın 25-də “Borçalı” Cəmiyyətin təşkilatçılığı ilə “Xudafərin” şadlıq saryında “Gürcüstan türklərinin həmrəyliyi günü” qeyd olunacaq.

Moderator.az-a açıqlamasında  “Borçalı” Cəmiyyətinin sədri Zəlimxan Məmmədlinin tədbirin əhəmiyyətindən danışıb:

“Həmrəylik, vətəndaş həmrəyliyi, xalq həmrəyliyi, etnik həmrəylik tarixdən üzü bu yana ən sivil cəmiyyətlərdə də aktuallığını itirməməkdədir. Bütün inanc qruplarında, səmavi düşüncədə də insanlar, toplum birliyə, həmrəyliyə çağırılır. Həmrəylik həm də bəşəri mahiyyət daşımaqdadır. Bu bölgədə  etnik və dini dözümsüzlük problemləri mövcuddur ki, bu da dinlərin, etnosların, mədəniyyətlərin birgə yaşayışını təhdid etməklə, bölgədə güvənli yaşamanı şübhə altına alır. Gürcüstan və Azərbaycan məhz bu təhlükələrlə üz-üzədir. Hər iki dövlət bu səbəbdən sivil dünyaya inteqrasiya edə bilmir.  Gürcüstanda tarixən türklər yaşamış və yaşamaqdadır. Tarix üzərində siyasi spekulyasiyalar yapmaq bizim iş deyil. Böyük siyasi güclər əsasən fərqliliklər arasında problemlərin qalmasında maraqlı tərəf rolunda çıxış edirlər. Bu, onların öz maraqlarını həyata keçirmək üçün münbit şərait yaradır. Gürcüstanda əsasən axıska və borçalı türkləri yaşamaqdadırlar. Axıska türkləri Stalin sürgününə məruz qalmaqla 250 min nəfər 1946-cı ildə bir neçə günün içərisində Orta Asiyaya sürgün edildi. Borçalı türklərinin sayı isə beş yüz min civarındadır. 10 il bundan əvvəlki rəsmi siyahıyaalmaya görə 300 min göstərilib. 4 iri rayon mərkəzi və 200 sayda kənddə məskunlaşmışlar.

Tbilisi, Rustavi, Batumi, Qori, Kutaisi, Telavi, Msxeta, Kaspi, Kareli kimi iri şəhərlərdə də soydaşlarımız yaşamaqdadırlar. Strateji anlamda Gürcüstan və Azərbaycanı birləşdirən məqamlara önəm veririk. Bu iki zəngin mədəniyyətin birgəyaşayışını bu bölgənin gözəl gələcəyinin qarantı kimi qavramaqdayıq. Təsadüfi deyil ki, "Borçalı" Cəmiyyətinin əsas simvollarından biri Azərbaycan-Gürcüstan-Azərbaycan bayraqlarının yan-yana düzülməsi və "Güc birlikdədir" şüarıdır. Yəni çox aydın bir formada həm də Gürcüstanda Azərbaycan türkləri ilə gürcü və digər azlıqlarla qarşılıqlı inteqrasiyasında maraqlıyıq və bu istiqamətdə layihələr həyata keçirməkdəyik. Amma milli azlıqlar problemi dünyada aktual və həssas problem olaraq beynəlxalq hüquqda özünəməxsus hüquqi bazaya və mexanizmlərə malikdir. Gürcüstan polietnik dövlətdir. Hər bir toplumun özünü təqdim və təsdiq etmə vasitələri, milli bayram və təqvim proqramları mövcuddur. Hər ilin müxtəlif tarixlərində istər gürcü, istərsə svan, meqrel, osetin, acar, abxaz, erməni, aysori, yunanlar müxtəlif adlar altında kütləvi törənlər təşkil edirlər. Bu tədbirlər ortaq uzlaşan maraqların, dövlətçilik şüurunun formalaşmasını stimullaşdırmaqla, polietnik zonada subyektlərin öz adət-ənənələrini qorumasına yardım etməkdədir. Borçalı türklərinin bu anlamda müəyyən boşluqlarının olduğu qənaətim var. Onlar daha çox Azərbaycan təqviminə uyğun davranmağa önəm veriblər ki, bu da onların Gürcüstan cəmiyyətinə inteqrasiyasını müəyyən mənada əngəlləməkdədir. Təşkilatlanmamış, hədəfləri qeyri müəyyən olan toplumlar dayanıqlı olmamaqla, həm də yadların öz niyyətlərini həyata keçirmək üçün vasitəyə çevrilirlər. Borçalı türklərinin sadaladığımız prinsiplər ətrafında həmrəyliyi Gürcüstanın və Azərbaycanın milli maraqlarının təmini üçün münbit şərait yaratmaqla, icma olaraq onların Gürcüstanın quruculuğunda daha səliqəli davranış sərgiləmələrinə şərait yaratmış olur.  Bu isə iki dövlət, iki mədəniyyət arası daha dayanıqlı körpü deməkdir. Bu həm də Gürcüstanla həmrəyliyin möhkəmlənməsi deməkdir. Artıq Borçalı türklərinin təqviminə 2 tarix -26 iyul "borçalı  türklərinin elat mədəniyyəti günü" və 25 dekabr "Gürcüstan türklərinin həmrəylik günü" kimi ənənə halını almış tarixi günlər daxil olub.”