44 günlük savaşda 44 ilə bərabər sarsıdıcı zərbə alan işğalçı ölkədə baş nazir Paşinyana və onun əlaltılarına qarşı cəmiyyətin təpkiləri davam edir. Erməni mediasında isə "Sorosun uşaqları" sözün həqiqi mənasında hər gün aşağılanır, məsxərəyə qoyulur.

Elə erməni jurnalist Artak Akopyanın məqaləsində də Arayik Harutyunyan ələ salınıb:

"21 yanvarda Əmək, Sosial Məsələlər və Miqrasiya Nazirliyinin əməkdaşları ilə görüşdə qondarma qurumun prezidenti Arayik Harutyunyan "Qarabağı daha da çətin qərarlar gözlədiyini” bildirib. 

Sonra bunun yalnız sosial-iqtisadi məsələlərlə deyil, həm də təhlükəsizlik problemləri ilə də əlaqəli olduğunu deyib.

Üstəlik, Arayik insanların lazımsız çaxnaşmaya düşməməsi üçün detalları açıqlamayıb. Lakin Arayik Harutyunyan özü də çox şeyi bilmir. Məsələn, Əliyev onun üçün "DQR məsələsinin artıq mövcud olmadığını" bəyan edir. Üstəlik, artıq "bu məsələni Ermənistanla müzakirə etməyəcəyini" də bildirib. 

İ.Əliyev qeyd edir ki, "Qarabağın Azərbaycan daxilində heç bir statusu olmayacaq". Bu da öz növbəsində gec-tez Qarabağın rəhbər orqanlarının qanuniliyi məsələsini gündəmə gətirəcəyi deməkdir.

Erməni cəmiyyəti və hətta ölkənin müxalifət elitasının əksəriyyəti Ermənistanı və bu gün nəzarət etdiyimiz Qarabağ hissəsini nə qədər çətin günlərin gözlədiyini tam anlamırlar.

Təbii ki, bu məsələlər bir neçə ay sonra aktuallaşacaq, baharda, hava dəyişikliyi nəticəsində Əliyev Moskvadan Qarabağın hazırkı rəhbərlərinin fəaliyyətinin məhdudlaşdırılmasını tələb edəcək.

Bu gün İlham Əliyev səssizliyini müstəsna olaraq "humanitar" problemlərlə əlaqələndirir və insanların bu ərazidə qışda humanitar fəlakətə məruz qalmasını istəmədiyini qeyd edir.

Nikol Paşinyan da bunu bilir, lakin məlum səbəblərə görə cəmiyyətdə hansı yeni rezonans yarana biləcəyini anlayaraq hələ bu barədə danışmaq istəmir.

Paşinyan hətta Əliyevdən xahiş edir ki, Ermənistanda erkən seçkilər keçirilməyənə qədər vasitəçilər vasitəsi ilə bu məsələləri gündəmə gətirməsin ki, onun sözləri ilə desək "revanşistlər Ermənistanda hakimiyyətə qayıda bilməsinlər". Paşinyan vasitəçilər vasitəsilə Əliyevi bu məsələdə onun və Əliyevin maraqlarının üst-üstə düşdüyünə inandırmağa çalışır. 

Ermənistandakı seçkilər zamanı əsirlər məsələsinin Əliyev tərəfindən Paşinyanın bundan maksimum dərəcədə faydalana biləcəyi anda həll edilməsi də mümkündür".