Bu təyinat ordudakı acınacaqlı durumun dəyişməsinə ümidləri artırıb. Məsələ ilə bağlı müstəqil hərbi ekspert, müdafiə nazirinin sabiq müavini Canmirzə Mirzəyevlə əlaqə saxladıq. C.Mirzəyev Z.Həsənovun ordudakı vəziyyəti yaxşılığa doğru dəyişəcəyinə ümid edir: “Zakir Həsənovun buna qədər rəhbərlik etdiyi Daxili Qoşunlarda nizam-intizam hökm sürüb, itki, özünəqəsd sıfır olub. Mənim ümidim var ki, Zakir Həsənov ordudakı acınacaqlı vəziyyəti dəyişə bilər”.

C.Mirzəyev deyir ki, çağırışçıların əksəriyyəti hansı hərbi qurumda xidmət etmək istəyirsə, deməli o qurumda vəziyyət ürəkaçandır: “Çağırışçılar bir qayda olaraq Daxili Qoşunlarda qulluq etməyə can atırlar. Burada sual yaranır ”“ niyə? Çünki Daxili Qoşunlarda hərbi qulluqçular arasında münasibətlər normal, nizamnaməyə uyğundur, xidmət aparmaq üçün hər şərait yaradılıb. Bu məsələ həmin sahəyə birbaşa rəhbərlik edən Zakir Həsənovun xidməti səlahiyyətlərini yüksək səviyyədə yerinə yetirməsindən qaynaqlanır. Ümid edirəm ki, Zakir Həsənov Daxili Qoşunlarda yaratdığı nizam-intizamı orduda da yarada biləcək. Mən buna inanıram”.  

Hərbi ekspert Z.Həsənovu Müdafiə Nazirliyinin icra etmədiyi məhkəmə qərarlarını icra etməyə çağırdı: “Səfər Əbiyevin dövründə Müdafiə Naziriliyinə qarşı çoxsaylı  məhkəmə qərarları çıxarılıb. Bir qayda olaraq həmin məhkəmə qərarlarının icrasına qeyri-rəsmi göstəriş verilib. Zakir Həsənov Müdafiə Nazirliyinin icra etmədiyi məhkəmə qərarlarını icra olunmasına da baxmalıdır. Tutduğu vəzifəsindən asılı olmayaraq hər kəs Azərbaycan Respublikası adından çıxarılan qərarı  icra etməlidir. İnanıram ki, Zakir Həsənov bu məsələni də həll etməklə gündəmdən çıxaracaq”.  

C.Mirzəyev bildirib ki, orduya qayıtması haqda təklif olacağı təqdirdə köməyini əsirgəməyəcək: “Yeni nazir ətrafına baxıb qiymətləndirməlidir. Onun işinə məncə 3-5 aydan sonra qiymət vermək mümkün olacaq. Yəni Zakir Həsənov bu gün Mənə gəlincə, həmişə Azərbaycan ordusuna kömək etməyə hazıram”.  

“Doktrina” Jurnalistlərin Hərbi Araşdırmalar Mərkəzinin direktoru Cəsur Sümərinli düşünür ki, vəzifəyə yenicə təyin olunmuş Zakir Həsənovun görməli işlər  çoxdur: “Hərbçilərə qarşı ciddi qanunsuzluqlar baş verib. Məhkəmə qətnamələri Müdafiə Nazirliyi tərəfindən yerinə yetirilməyib. Səfər Əbiyevin nəzarətində olan qruplar hərbi ekspertlərə qarşı fiziki zorakılıq etməkdən belə çəkinməyiblər və həmin şəxslər indiyə qədər cəzalandırılmayıb. Müdafiə Nazirliyinin informasiya siyasəti sıfır vəziyyətindədir. Ümid edirəm ki, bütün bunlar diqqət mərkəzində olmalıdır”.

O, müdafiə naziri Səfər Əbiyevin vəzifəsindən çıxarılmasının mümkün səbəblərindən danışıb, bir neçə səbəb sadalayıb:

1. Birləşmiş Ştatlarıın Azərbaycandakı səfiri Riçard Morninqstarın səsinin gizli olaraq yazılmasının əsas məsuliyyətinin Əbiyevdə olması və bu hərəkətinə görə, okeanın o tayından Azərbaycan hökumətinə gələn narazılıqlar. Mənbənin bildirdiyinə görə, Səfər Əbiyevin bu hərəkəti ümumiyyətlə diplomatik etik qaydalara zidd olub və bütün dünyada Azərbaycanın hərbi-siyasi rəhbərliyinə qarşı etimadsızlıq mühiti yaradıb.

2. Almaniya və Fransa müdafiə nazirliklərindən Azərbaycana hökumətinə Əbiyevin hərəkəti ilə bağlı ötürülən etiraz və həmin nazirliklərin nümayəndələrinin Azərbaycana səfərlərinin təxirə salınması;

3. NATO-nun Azərbaycan müdafiə nazirliyinin rəhbərliyinə etimadsızlıq göstərməsi və Səfər Əbiyevi oktyabrın 22-23-də Brüsseldə keçirilən üzv və tərəfdaş ölkələrin müdafiə nazirlərinin görüşünə dəvət etməməsi.

4. Səfər Əbiyevin son dövrlərdə etdiyi hərəkətlərlə bağlı Müdafiə Nazirliyinin daxilində ona qarşı etimadsızlığın yaranması, generallar arasında ciddi fikir ayrılıqlarının yaranması və s.

C.Sümərinlinin sözlərinə görə, Səfər Əbiyevin vəzifədən çıxarılması Azərbaycan Silahlı Qüvvələrində ciddi islahatlara başlanılması üçün ciddi imkanlar yaradır. Onun sözlərinə görə, bu gün Azərbaycan ordusunda rüşvətxorluq və korrupsiya tuğyan edir, maddi-texniki təminatda ciddi problemlər var, kadrların təyin olunmasında qanunsuzluq halları artıb və ən əsası qeyri-döyüş itkilərinin sayı kəskin artıb. “Bütün bunlar Azərbaycan ordusunda ciddi idarəçilik böhranının olmasından xəbər verirdi. Vəziyyət hətta idarəolunmaz hala gəlib çıxmaqda idi. İlin əvvəlindən gənclər təşkilatları, ictimaiyyət nümayəndələri aksiyalar keçirdilər və Səfər Əbiyevin bütün qeyd edilənlərə görə vəzifədən çıxarılması vacib idi. Amma İlham Əliyev gözləmə mövqeyi tutdu. Lakin Əbiyevə qarşı beynəlxalq etimadsızlıq mühitinin yaranmasından sonra prezidentin ayrı yolu qala bilməzdi”.