Ölkəmizdə Vətən müharibəsi getdiyi son bir ayda baş verən faciələr, terrorçu Ermənistanın şəhər və kəndlərimizi hədəf alması  zamanı dinc vətəndaşlarımızın həlak olması bəzən  insanlarda çaşqınlıq,  ruh düşkünlüyü yaradır…

Bunu nəzərə alaraq tanınmış islami bloger, psixoloq-konsultant Asya Qaqiyevanın  Qurani-Kərim ayələri əsasında tərtib etdiyi ibrətamiz bir yazının tərcüməsini nəzərinizə çatdırırıq:

“Bəzən həyatındakı çətinliklə üzləşmiş bir insana yalnız ümid və şəfqət dolu ruhlandırıcı sözlər eşitmək gərəkdir. Bir çox hallarda belə kəlmələr küllər arasından gücləri dirçəldir və insanları cəsarətli qərarlar verməyə təşviq edirlər… 

Yaradandan lütf olaraq göndərilən bir kitab kimi Qurani-Kərimdə bu cür dəstək kifayət qədərdir ...  

“Heç kəs gücü çatdığından artıq yüklənməz. " ("Əl-Bəqərə" surəsi, 233-cü ayə). 

“Allah hər kəsi yalnız qüvvəsi yetdiyi qədər yükləyər (bir işə mükəlləf edər). Hər kəsin qazandığı yaxşı əməl də, pis əməl də özünə aiddir ”("Əl-Bəqərə" surəsi,  286-cı ayə). 

“Allah heç kəsi Özünün ona verdiyindən artıq xərcləməyə məcbur etməz. Allah hər bir çətinlikdən sonra asanlıq (yoxsulluqdan sonra dövlət) əta edər”. ("Talaq" surəsi, 7-ci ayə). 

 “Şübhəsiz ki, hər çətinlikdən sonra bir asanlıq gələr! (Asanlıq yalnız çətinliklə hasil olar!) Həqiqətən, hər çətinlikdən sonra bir asanlıq gələr! (Buna görə də çətinliklərə səbrlə dözmək lazımdır!) ”("Şərh" surəsi, 5-6-cı  ayələr) 

“Əgər siz (Ühüd müharibəsində) yara aldınızsa, o biri (kafir) dəstə də (Bədr müharibəsində) o cür yara aldı. Biz bu günləri (bu hadisələri) insanlar arasında növbə ilə dəyişdiririk ki, Allah iman gətirən şəxsləri (başqalarından) ayırd etsin və içərinizdən şəhidlər (şahidlər) seçsin. Allah zülmkarları sevməz!” ("Ali-İmran" surəsi, 140-cı ayə). 

Rahatlıq çətinliklərin bağırından gəlir. Sınaqlar sonsuza qədər davam etmir. Rahatlıq və sevinc yalnız zaman məsələsidir. Xoş günləri yaxınlaşdırmaq və maneələri aradan qaldırmaq üçün insan əlindən gələn hər şeyi etməlidir

Səbir və savab işlər qələbənin açarıdır... 

“Ey iman gətirənlər! Səbr və dua ilə (namazla Allahdan) kömək diləyin. Çünki Allah səbr edənlərlədir (onların dostudur)” ("Əl-Bəqərə" surəsi,  153-cü ayə). 

“(Ya Peyğəmbər! Mənim adımdan qullarıma) de: “Ey Mənim iman gətirən bəndələrim! Rəbbinizdən qorxun. Bu dünyada yaxşılıq edənlərə (axirətdə) yaxşılıq (Cənnət) vardır. Allahın yeri genişdir (sizə bir çətinlik üz versə, başqa ölkələrə hicrət edə bilərsiniz). Yalnız (dünyada Allah yolunda çətinliklərə) səbr edənlərə (axirətdə) saysız-hesabsız mükafat veriləcəkdir" ("Zumər" surəsi, 10).

Səbirli olmaq - situasiyanın qurbanı olmaq demək yox, heç nəyin dəyişdirilə bilməyəcəyi yerdə baş verənlərlə effektiv davranmaq,  bir şeyin dəyişdirilə biləcəyi yerdə isə qətiyyətlə davranmaq deməkdir... 

 Özünüzü dəyişdirməklə  başınıza gələnləri dəyişdirə bilərsiniz... 

“(İnsan üçün) onu öndən və arxadan təqib edənlər (mələklər) vardır. Onu (insanı) Allahın əmri ilə qoruyurlar. Hər hansı bir tayfa öz tövrünü (nəfsində olanları) dəyişmədikcə (pozmadıqca), Allah da onun tövrünü (onda olanları, onun əhvalını) dəyişməz. Əgər Allah hər hansı bir qövmə bir pislik yetirmək istəsə, onun qarşısı heç cür alına bilməz və Ondan başqa onların heç bir hamisi də olmaz.“ (“Rədd” surəsi,  11).

Çətinliklər  - qurtulmaq mümkün olmayan bir lənət deyil. Onlardan  bəziləri təcrübəmizin bir hissəsi olmaqla inkişaf və sevincə səbəb olmaq üçün düşüncə və hərəkət tələb edir....

“Həqiqətən, Allah insanlara şəfqətlidir, mərhəmətlidir” ("Həcc", ayə 65). 

“Sizi zülmətlərdən nura (küfrdən imana) çıxartmaq üçün Öz bəndəsinə (Muhəmməd əleyhissəlama) açıq-aşkar ayələr nazil edən Odur. Allah sizə şəfqətlidir, mərhəmətlidir! (Hədid surəsi, ayə 9).

“Biz ona şah damarından da yaxınıq!  “ (“Qaf”,16). 

“(Sənə bir neçə gün vəhy nazil etməməklə) Rəbbin səni (ya Peyğəmbər!) nə tərk etdi, nə də sənə acığı tutdu. Şübhəsiz ki, axirət sənin üçün dünyadan daha xeyirlidir! Həqiqətən, Rəbbin sənə (qiyamət günü ən uca şəfaət məqamı, Cənnətdə tükənməz nemətlər) bəxş edəcək və sən (Ondan) razı qalacaqsan! Məgər O səni yetim ikən tapıb sığınacaq vermədimi?! Sənin şaşqın (yaxud: uşaq vaxtı Məkkə vadisində azmış) vəziyyətdə tapıb yol göstərmədimi?! Səni yoxsul ikən tapıb dövlətli etmədimi?! Elə isə yetimə zülm etmə! Dilənçini də (qapıdan) qovma! Və (həmişə) Rəbbinin sənə olan nemətindən söhbət aç!” (“Duha”, 3-11)"