Ermənistanın Azərbaycana qarşı işğalçılıq siyasətinin legitimləşməsi yönündə ən böyük maneə, şübhəsiz ki, qardaş və müttəfiq Türkiyənin məsələdə tutduğu prinsipial mövqedir. Son vaxtlar həm də türk dövlətlərinin birliyi yönündə atılan kövrək addımlar (Qəbələ sammiti və s.) rəsmi İrəvanı narahat eləməkdədir.

Təsadüfi deyil ki, Ermənistan prezidenti Serj Sarkisyan iki həftə öncə Kollektiv Təhlükəsizlik Müqaviləsi Təşkilatının (KTMT) Soçi toplantısında bu quruma formal üzv olan iki türk dövlətinin - Qırğızıstan və Qazaxıstanın Qarabağ məsələsində Azərbaycana açıq dəstək verməsindən gileylənmişdi. 

Bu və digər məsələlərlə bağlı karabakhİNFO.com-a danışan Milliyyətçi Hərəkat Partiyasının sədr müavini, İzmir millət vəkili Ahmet Kenan Tanrıkulu Türkiyənin Qarabağ problemi ilə bağlı Azərbaycana həmişə dəstək verdiyini və bundan sonra da verəcəyini bildirib: “Türkiyə işğal səbəbi ilə Ermənistanla sərhədini bağlayıb və ATƏT-in Minsk Qrupunu münaqişəni həll edəcək uyğun platforma olaraq görməkdə davam edir. Bundan başqa, Ankara sülh prosesində durğunluğu aradan qaldırmaq üçün əlavə tədbirlərin, məsələyə yaradıcı yanaşmaqla yeni yolların axtarılmasının tərəfdarıdır”.

MHP yetkilisinə görə, Ermənistanın Rusiyanı strateji tərəfdaş kimi görməsi və bunu ictimaiyyətə açıq formada təqdim etməyə çalışmasından qaynaqlanan addımları beynəlxalq diplomatiyada özünə yer tapa bilmir və müsbət qarşılanmır: “Heç bir ölkə digər bir dövlətin daxili və ya xarici siyasətinə qarışa bilməz. Bu hər zaman beynəlxalq hüquqda da belə qəbul olunub. Dolayısıyla Ermənistanın başqa ölkələrdən digər ölkələrə şikayət etməsinin ciddi bir təsiri yoxdur və bu addımın özü qeyri-ciddi və qeyri-peşəkar bir yanaşmadır. Ermənistan Qarabağı işğalda saxlayır və buna görə də beynəlxalq hüquqsuzluq, qanunsuzluq davam etməkdədir”.

Millət vəkili hesab edir ki, Ermənistanın beynəlxalq arenada qətiyyətsiz və dəyişkən siyasəti başda Avropa ölkələri olmaqla bir çox ölkədə ona olan etimadsızlığı, inamsızlığı daha da artırmaqdadır: “Digər tərəfdən, Türkiyənin Ermənistanla sərhədlərini açması müzakirə mövzusu deyil”.

Azərbaycanla Türkiyə arasında hərbi-texniki sahələrdə əməkdaşlığa gəlincə, Tanrıkulu bunu deyib: “Türkiyə 18 oktyabr 1991-ci il tarixində müstəqilliyini elan edən Azərbaycan Respublikasını 9 noyabr 1991-ci ildə tanıyan ilk dövlət olub. Türkiyə ilə Azərbaycan bu tarixdən sonra bir çox sahədə əməkdaşlıqlara başlayıb və müqavilələr imzalayıb. Bu ilin may ayında da iki ölkə arasında bütün sahələrdə olduğu kimi müdafiə sənayesi sektorunda da əməkdaşlıq müqaviləsi imzalanıb. Bununla da iki ölkə ordularının güclənməsinə xidmət etməsi hədəflənib. 12-28 iyul 2013-cü il tarixində Türkiyə ilə Azərbaycan arasında reallaşan tapşırıq qrupu batalyonunun poliqonu ilə də Türkiyənin və Azərbaycanın ərazi bütövlüyünün qorunmasında Türk Silahlı Qüvvələrinin qərarlı olduğu mesajı verilib”.

MHP sədr müavini hesab edir ki, türk dövlətləri hər sahədə bir-birlərinə güvənib əməkdaşlıq etməklə beynəlxalq aləmdə bütün maneələrin, onlara qarşı olan güclərin öhdəsindən gələ bilər: “Biz, bütün problemləri birlikdə həll edə bilərik”.