“Qələm fahişəliyi” ifadəsini ilk olaraq Azərbaycan Cümhuriyyətinin yaradıcısı M.Ə.Rəsulzadə 1911-ci ilin aprel-may aylarında “İrani – Nov”(“Yeni İran”) qəzetinin 28-53-cü saylarında çap edilmiş “Mətbuat azadlığı” məqaləsində işlədib. 

Həmin fikir belə ifadə olunub:”...Mətbuat azadlığına əl qaldırmaq insan azadlığına təcavüz etməkdir...Mətbuatın əsarəti əxlaq pozğunluğu törədir,əxlaq gözəlliyi və yaxşı xüsusiyyətləri aradan çıxarır, yalan danışmağı, oğurluğu,əyrilik və casusluğu yayır,ədəbi  və qələm fahişəliyi meydana çıxarır..”

     

Bu gün Azərbaycan xalqının ərazi bütövlüyü və torpaqlarını işğaldan azad etməsi uğrunda apardığı mücadiləyə dəstək verməyən, ermənipərəst mövqeyi hər dəyərdən üstün tutan jurnalistləri görəndə həmin o “qələm fahişəliyi” ifadəsini düşünürəm.

    

Hər bir ölkənin ictimai, siyasi və mədəni inkişafında mətbuatın rolu əvəzsizdir.Lakin unudulmamalıdır ki, ictimai nəzarət funksiyasını yerinə yetirən jurnalistlikanın əsas şərtlərindən biri də obyektivlikdir. Yəni mətbuat elmi,siyasi və bəşəri informasiyaları yayıb insanların dünyagörüşünü işıqlandırsa da, millətlərin, xalqların zehni və fikirlərini işıqlı etsə də, yenə əsas funksiyalarından biri olan obyektivliyi öndə tutmalıdır.

    

Bəs Qarabağ  savaşı ilə bağlı informasiyaların hazırlanıb yayılmasında “qələm fahişəliyi”nin əsas nümunələrini hansı ölkələrin jurnalistlərinin fəaliyyətində görürük? İlk olaraq Rusiya mətbuatında və xüsusən bu ölkənin televiziyalarında.”Rossiya 1” televiziyasının yayımlarında, informasiyalarında çalışan jurnalistlər sanki jurnalist təhsili görmədən, informasiya mədəniyyətinin nə olduğunu bilmədən geniş bir auditoriyanı yalan və saxta bilgilərlə məlumatlandırmağa çalışırlar. Gəncədə dinc insanların gecə vaxtı raket atəşinə tutulması, gedən döyüşlərin Azərbaycan torpağında - Qarabağda  olması və 30 ilə yaxın Azərbaycan torpaqlarının erməni işğalında saxlanması faktlarını qətiyyən səsləndirmədən “dezinformasiya” yaymaqla məşğuldurlar.Solovyovun verilişində,“60 dəqiqə” proqramında və digər informasiya yayımlarında isə  şovinist fikirlər təqdim olunması özünün son həddinə çatıb.

“Qələm fahişəliyi”nin digər nümunəsi “Evronyus” xəbərlərində görünməkdədir. Qarabağda savaşa qoşulan erməni separatçılarını az qala “qəhrəmana” döndərən, onlarla “dostcasına” söhbət edən jurnalistdən soruşmaq lazımdır:1) Siz niyə bu ərazinin Azərbaycan ərazisi olduğunu səsləndirmirsiniz? Axı bu ərazi beynəlxalq hüquqi sənədlərdə Azərbaycan ərazisi olaraq tanınır və qəbul edilir 2) Niyə tez-tez “Qarabağ ordusu” sözünü işlədirsiniz?Axı bu işğalçı və terrorçu silahlı dəstələrdir. Və elə həmin gün(Gəncənin atəşə tutulması) o “dostcasına” söhbət etdiyiniz erməni silahlılarından soruşmursunuz ki, niyə dinc vətəndaşları yatdığı yerdə cəbhə xəttindən 60-70 kilometr uzaqda olan yaşayış məntəqələrində raket atəşinə tutursunuz?

     

“Qələm fahişəliyi”nin digər nümunəsini  “Bİ-Bi-Si” nin məlumatlarında oxuyur və görürük.Qarabağ bölgəsindən fotolar yayımlanıb.Guya bu məşhur kanal obyektivliyini qoruyur.Əvvəl Tərtərdə evinə atəş yağdırılmış bir azərbaycanlını təqdim edir.O biri görüntüdə isə Əsgəranda erməni hərbçiləri(oxu quldurları və terrorçuları) üçün “çətin” şəraitdə çörək bişirən bir erməni kişisini göstərir.Və hər iki təqdimat eyni statusda təqdim edilir.Bəs bu jurnalistdən soruşan lazımdır: çörək bişirilən yer Azərbaycan ərazisidir və həmin o çörək bişirən niyə Azərbaycan qanunlarına tabe olub sakit yaşamaq istəmir? İngiltərədə çoxlu xalqlar yaşayır və o xalqların təmsilçiləri qeyri -qanuni silahlı dəstələri müdafiə etsələr, informasiyanı necə təqdim edərdiniz? “Qələm fahişəliyi”nin baş alıb getdiyi ABŞ, Fransa televiziyalarından da nümunələr göstərmək mümkündür.

Bu ölkələrin ermənipərəst jurnalistləri heç olmasa öz ölkələrinin mətbuat azadlığı uğrunda apardığı mübarizənin tarixi ilə tanış olsalar görəcəklər ki, öz xalqlarının da uzun illər mübarizə apardığı azad sözün, azad fikrin əsasında  informasiyanın auditoriyaya obyektiv və qərəzsiz çatdırılması  dayanır.