Sentyabrın 27-dən Ermənistanın təxribatı ilə başlayan döyüşləri oktyabrın 10-da Moskvada əldə edilən humanitar atəşkəs razılaşması da dayandıra bilmir. Ermənistan hər dəfə olduğu kimi, bu dəfə də imzasının mürəkkəbi qurumamış verdiyi sözə naxələf çıxdı. Həm də təkcə cəbhə xəttində deyil, Azərbaycanın mülki əhalisinə qarşı daha ağır müharibə cinayətləri törətməklə.

Erməni silahlı qüvvələri cəbhədəki uğursuzluqlarının əvəzini Azərbaycanın döyüş xəttindən onlarla kilometr uzaqlıqda yerləşən yaşayış məntəqələrini atəşə tutmaqla çıxmağı çalışır. Lakin burada hədəf təkcə Azərbaycan əhalis arasında təşviş yaratmaq, ölkəmizin mülki obyektlərinə zərər vermək deyil, həm də çirkin siyasi niyyətdir.

Azərbaycanın Gəncə, Mingəçevir kimi böyük şəhərlərinin Ermənistanın öz ərazisindən raket zərbəsinə məruz qoymasının arxa planında Rusiya, Belarus, Qazaxıstan, Qırğızıstan və Tacikistanın da üzv olduğu Kollektiv Təhlükəsizlik Müqaviləsi Təşkilatını (KTMT) münaqişəyə cəlb edilməsi olduğunu hər kəs bilir. Əlbəttə, Rusiyanın Ermənistanı silahlandırmaqla dolayısı ilə müharibənin iştirakçısı olduğu göz önündədir. Ermənistanın bu təxribatlarla Azərbaycanı KTMT ilə üz-üzə qoymaq cəhdləri aşkardır, amma Azərbaycan bu təxribatın qarşısını almaq üçün hansı addımları atmalıdır?

Görünən odur ki, Ermənistandan Azərbaycanın yaşayış yerlərinə atılan raketlərin cavabı verilməyincə erməni həyasızlığının qarşını almaq mümkün olmayacaq. Əlbəttə, ölkəmiz bu təxribata uymamaq üçün maksimum səbr və həssaslıq göstərir və Ermənistan ərazisinə heç bir hərbi müdaxilə etmir. Belə olan halda diplomatik yollarla bu təxribatların qarşısını almaq mümkündürmü? Axı müharibə cinayəti törətməklə işğalçı ölkə KTMT-yə üzv olan dövlətləri də istəmədikləri bir müharibəyə sürükləyir. Bu ölkələr beynəlxalq hüququ pozan Ermənistanı bu təxribatlardan çəkindirmək öhdəliyinə sahib deyillərmi? Bunun üçün Azərbaycan KTMT-nin digər üzvlərinə diplomatik yollarla rəsmi olaraq müraciət etməlidirmi?

Mövzu ilə bağlı Moderator.az-a danışan Atlas Araşdırmalar Mərkəzinin rəhbəri, politoloq Elxan Şahinoğlu hesab edir ki, KTMT üzvü olan ölkələrə belə bir müraciət mütləq olmalıdır:

“Əlbəttə, müraciət edilməlidir. Gəncə və Mingəçevir artıq mütamadi Ermənistanın bombardmanına məruz qalır. Biz, başda Rusiya olmaqla KTMT-nin digər üzvlərinə xəbərdarlıq etməliyik ki, Ermənistan bir də belə təxribatlara əl atsa həmin atəş nöqtələrini susdurmaq məcburiyyətində qalacağıq. KTMT üzvü olmaq o demək deyil ki, sən istədiyin ölkəni raketlə vurasan və digər üzvləri də təhrik edəsən ki, məni müdafiə etməlisiniz. Belə olan halda o dövlətə qarşı tədbirlər görülməlidir”.

Politoloqun fikrincə, Azərbaycan həm Rusiyaya, həm də digər üzvlərə rəsmən mürciətindən sonra ona verilən cavaba uyğun addımlar atmalıdır:

“Rusiya belə bir tədbir görmürsə, biz Qazaxıstan və Belarusla da əlaqə saxlayıb deməliyik ki, onlar bununla bağlı münasibətlərini bildirsinlər. Əks halda biz Ermənistandakı atəş nöqtələrini susdurmalıyıq. Çünki istisna deyil ki, bizim yaşayış məntəqələrimiz yenidən oradan atəşə tutulmaycaq. Ona görə də biz belə bir müraciəti mütləq etməliyik. Əgər reaksiya olmasa, biz lazımı cavabı verməliyik. İlk addım kimi bunu etmək lazımdır”.

Qeyd edək ki, Ermənistan istisna olmaqla, KTMT üzvü olan digər dövlətlər ayr-ayrılıqda Azərbaycanın ərazi bütövlüyünü dəstəkləyirlər və ölkəmizlə dostluq münasibətlərinə malikdirlər. Buna rəğmən Ermənistanın KTMT-ni təxribata cəlb etmək kimi çirkin niyyətini diplomatik yollarla puça çıxarmaq zəruridir. Məhz bu adımlardan sonra Ermənistanın məlum təxribatlarının qarşısını istənilən əks-həmlə ilə almaq mümkün olacaqdır.

Taleh