Suriya Rusiyanın kimyəvi silahları təslim etmək təklifini qəbul edib. Moderator.az  “Qafqazinfo”-ya   istinadən xəbər verir ki, bu barədə Suriyanın xarici işlər naziri Valid əl-Muallim açıqlama verib. Onun sözlərinə görə, kimyəvi silahlara beynəlxalq nəzarət tətbiq etməklə bağlı Rusiya tərəfinin təklifini qəbul edən Suriyanın əsas məqsədi ABŞ-ın bu ölkəyə qarşı təzyiqlərini azaltmaqdır. XİN rəsmisi bildirib ki, rusiyalı həmkarı Sergey Lavrovla keçirilən görüşün ardından qarşı tərəfin kimyəvi silah məsələsində etdiyi təklifə Suriya axşam saatlarında müsbət cavab verib.

Obama şərt qoydu

Əgər Suriya prezidenti Bəşər Əsəd kimyəvi silahları təhvil versə, hərbi zərbə mütləq dəqiqliklə qeyri-müəyyən zamana qədər təxirə salına bilər. Trend-in RBK-ya istinadən verdiyi məlumata görə, bunu ABŞ prezidenti Barak Obama ABC televiziyasına müsahibəsində deyib.
Obama Fox News-a müsahibəsində isə deyib ki, ABŞ Suriya probleminin qeyri-hərbi yolla həllini arzulayır: "Biz diplomatik yolla gedəcəyik. Mən səmimi olaraq, deyirəm ki, bu problem siyasi vasitələrlə həll edilə bilərdi".
Məlumatda deyilir ki, Obama, eyni zamanda, ABŞ-ın Suriyaya hərbi zərbələr endirməsi üçün qətnamənin konqresdə təsdiqlənməsinə də çalışacağını dilə gətirib: "Düşünürəm ki, biz bütün əyləcləri buraxmamalıyıq. Onlar başa düşməlidirlər ki, biz sözləri havaya buraxmırıq".

Senat səsverməni təxirə saldı
Məlumatda bildirilir ki, Çoxluq Lideri Demokrat Harri Reyd bununla bağlı verdiyi açıqlamada “Səsvermə olmadan öncə Prezident Obamanın öz iddiasını Senata və Amerika xalqına təqdim etmək fürsəti olduğuna əmin olmaq istəyirəm” deyib. Senator əməliyyat planının 11 sentyabrda Senatda səsvrməyə təqdim edilməsinin təxirə salınmasını belə izah edib: “Beynəlxalq müstəvidə Suriyanın kimyəvi silahdan istifadə edib-etməməsi məsələsi müzakirələrə səbəb olub. Belə bir vaxtda ABŞ-ın əməliyyatı nə qədər tez yox, nə qədər mükəmməl həyata keçirəcəyi önəmlidir”.
CNN-nin Senatda apardığı sorğunun nəticələrinə görə Suriyaya qarşı hərbi əməliyyata 20 senator dəstək versə də, 25 senator əleyhinə olduğunu qeyd edib. 55 Senator isə qərarsız olduğunu bildirib. Hakimiyyət nümayəndələri 11 sentyabr səsverməsinin təxirə salındığına baxmayaraq, bu həftə içində yekun qərar qəbul ediləcəyini açıqlayıblar. 

Suriyanın vurulmasını dəstəkləyənlərin sayı 24-ə çatdı

ABŞ-ın Suriyaya hərbi müdaxilə ilə bağlı çağırışına daha 14 dövlət qoşulub. Lent.az-ın «RİA Novosti»-yə istinadən məlumatına görə, bu haqda Ağ ev açıqlama yayıb. Yeni qoşulan dövlətlər bunlardır: Albaniya, Xorvatiya, Danimarka, Estoniya, Almaniya, Honduras, Macarıstan, Latviya, Litva, Mərakeş, Qətər, Rumıniya və Birləşmiş Ərəb Əmirliyi.
Xatırladaq ki, ötən həftənin sonunda 11 dövlət Suriyada kimyəvi silah tətbiqinin məsuliyyətini Bəşar Əsəd rejiminin daşıdığını bildirməklə yanaşı, bu ölkəyə qarşı hərbi əməliyyatları başlayacağı halda ABŞ-ı dəstəkləyəcəklərini bəyan etmişdi. 11 dövlətin təmsilçisi Suriyada kimyəvi silah tətbiqi ilə bağlı bəyanat verərək, bildirib ki, BMT Təhlükəsizlik Şurası (TŞ) «iflic» vəziyyətdədir və kimyəvi silahdan istifadənin qadağan edilməsi ilə bağlı beynəlxalq ictimaiyyətin tədbirlər görməsi vacibdir.
«Biz beynəlxalq ictimaiyyətin uzunmüddətli fəaliyyətinə, o cümlədən Suriyanın kimyəvi silah anbarının törətdiyi təhlükəyə cavab olaraq, BMT-nin qətnaməsinə sadiqik» - deyə, sənəddə vurğulanıb.
Bəyanatın mətnini Avstraliya, Kanada, Fransa, İtaliya, Yaponiya, Cənubi Koreya, Səudiyyə Ərəbistanı, İspaniya, Türkiyə, Britaniya və ABŞ təmsilçiləri imzalamışdılar. Beləliklə, ABŞ-ı dəstəkləyənlərin sayı 24 çatıb.

Britaniya hərbi müdaxiləyə qarşı

«Suriyadakı vəziyyət yalnız siyasi yolla nizamlanmalıdır». Lent.az-ın «RİA Novosti»-yə istinadən məlumatına görə, bu açıqlamanı Böyük Britaniyanın baş naziri Devid Kemeron verib. 
O bildirib ki, münaqişə edən tərəfləri danışıqlara cəlb etmək yönündə fəaliyyətini davam etdirəcək: «Sankt-Peterburqda «Böyük-20»-liyin liderləri, o cümlədən Vladimir Putinlə görüşdə biz bu məsələni müzakirə etmişik. Britaniya Cenevrədəki ötən danışıqlara əsasən münaqişə edən tərəflərin dialoqa cəlb edilməsi işinə başçılığını davam etdirəcək. Ona görə də biz hesab edirik ki, sabit və demokratik Suriyadakı vəziyyətin tənzimlənməsi üçün yeganə vasitə siyasi yoldur».
Bununla yanaşı hökumət başçısı qeyd edib ki, müxalifətə hərbi olmayan yardımları davam etdirəcək. Kemeron bildirib ki, Britaniya kimyəvi silahdan istifadə edənlərin cəzalandırılmasına nail olmaq niyyətindədir. O, BMT müfəttişlərindən araşdırmaları başa çatdırmasını istəyib.

«Əvvəl hərbi müdaxilə, sonra sülh konfransı»

«ABŞ yalnız hərbi zərbələrdən sonra Suriya üzrə Cenevrədə sülh konfransının keçirilməsinə nail olmaq niyyətindədir». Lent.az-ın «BBC»-yəə istinadən məlumatına görə, bu açıqlamanı ABŞ prezidentinin milli təhlükəsizlik üzrə müşaviri Süzan Rays verib. Onun sözlərinə əsasən, ABŞ diplomatik səylərini «məhdud hərbi zərbələrdən sonra» bərpa edəcək. 
Dövlət Departamentinin təmsilçisi Mari Harf isə bildirib ki, Birləşmiş Ştatlar Suriyadakı kimyəvi silahların beynəlxalq nəzarətə verilməsinə çox şübhə ilə yanaşır. Vaşinqtonda bunun vaxt uzatmaq üçün bəhanə olduğu qənaətindədirlər.

«Zərbə endirin, Əsəd yalan danışır»

Suriya Azadlıq Ordusunun komandanı Səlim İdris sentyabrın 9-da Qərb dövlətlərini Bəşar Əsəd rejiminə bağlı ordunun mövqelərini vurmağa çağırıb. Lent.az-ın «interfaks»-a istinadən məlumatına görə, o, «əl-Cəzirə» telekanalına müsahibəsində belə bir çağırış edib.
«Biz zərbə endirməyə çağırır, Əsəd rejiminin yalan danışdığını xəbərdarlıq edirik»-deyə, S.İdris bildirib. O, Moskvanı Dəməşqlə sıx əlaqə saxladığı üçün kəskin tənqid edib.

Əsəd: “Peşmanam”

Suriya prezidenti Bəşər Əsəd ölkədə vətəndaş müharibəsi başlayangündən bəri ilk dəfə ABŞ telekanalına müsahibə verib. CBS kanalının müxbiri Çarli Roz prezident Bəşər Əsəddən müsahibə aldığını bildirib. 
CBS kanalının xəbər bülleteninə qoşulan Roz Əsədə baş verən kimyəvi silah hücumu və Suriyaya qarşı hərbi müdaxilə ilə bağlı suallar verdiyini bildirib. Roz Əsədin 1500-ə yaxın insanın ölümü ilə nəticələnən kimyəvi hücumla heç bir əlaqəsi olmadığını, belə bir əmr vermədiyini iddia etdiyini deyib. 
"Kimyəvi hücumla bağlı peşmanlıq hissi keçirirsinizmi?" sualına Əsəd, "Bəli, peşmanam" cavabını verib.

İran əsgərləri Suriyada

Bu arada, İran əsgərlərinin Suriyadakı qarşıdurmalarda aktiv iştirak etdiyini göstərən görüntülər yayınlanıb. AzVision.azxarici mətbuata istinadən xəbər verir ki, müxalif güclər tərəfindən ələ keçirilən kameradakı görüntüdə Tehranın Bəşər Əsəd rejimini qorumaq məqsədilə daxili qarşıdurmalardakı iştirak etdiyi görünür.
Əl Cəzirə telekanalında yayımlanan görüntüdə əks olunur ki, İran əsgərləri Hələbdə bir hərbi qərargahda taktika mövzusunda fikir mübadiləsi aparırlar və daha sonra da xarabaya çevrilmiş şəhərdə avtomobillə gəzirlər. Eyni zamanda videoda görünür ki, suriyalı əsgərlər iranlıların əmrlərinə riayət edirlər.

Türkiyədə təhlükəsizlik toplantısı

Dünən Türkiyənin paytaxtı Ankarada isə Baş nazir Rəcəb Tayyib Ərdoğanın rəhbərliyi ilə ölkənin təhlükəsizlik məsələləri ilə bağlı görüş keçirilib. Trend Türkiyənin "Sabah" qəzetinə istinadən məlumat verir ki, görüşdə Baş nazirin müavini Bəşir Atalay, Baş Qərargahın rəhbəri Nejdət Özəl, XİN rəhbəri Əhməd Davudoğlu, daxili işlər naziri Müəmmər Gülər, müdafiə naziri İsmət Yılmaz və Türkiyə Kəşfiyyat İdarəsinin rəhbəri Hakan Fidan iştirak edirlər.
İclas zamanı Suriya böhranı daxil olmaqla regiondakı problemlərin müzakirə ediləcəyi gözlənilir.

"Əsəd rejimi qətllərdə sərhəd tanımadı"

Suriyada kimyəvi silahın istifadəsindən əvvəl də 200 min insan öldürülüb. Trend-in "Anadolu" agentliyinə istinadən verdiyi məlumata görə, bunu Türkiyənin xarici işlər naziri Əhməd Davudoğlu deyib.
"Kaş ki, bu gün göstərilən qərarlılıq 2 il öncə göstərilərdi. Əgər 2011-ci ildə Hamada kütləvi qətllər olarkən qərarlar verilsəydi, hadisələr buraya qədər gəlib çıxmazdı", - deyə Davudoğlu bildirib.
Davudoğlu vurğulayıb ki, Bəşər Əsəd və onun komandası qətllərdə sərhəd tanımadı.