Sürücünün valideynləri övladlarının qəzaya düşməsinə səbəb yol polisi əməkdaşlarının onu qovmasına görə baş verdiyini iddia edir. 

Moderator.az xəbər verir ki, iyunun 9-da Bakı şəhər Xırdalan rayonu ərazisində Cəlilabad rayon Maşlıq kənd sakini və hazırda Abşeron rayon Gənclər şəhərciyində yaşayan Hüseynov Şahmar Faiq oğlu idarə etdiyi 44-CB-723 dövlət nömrə nişanlı avtomobili ilə ağır qəzaya düşüb. 

Ş.Hüseynovun valideynləri saytımıza açıqlamalarında bildiriblər ki, avtomobil övladlarının adına olsa da, onun sürücülük vəsiqəsi olmayıb. Yol polisinin “saxla” əmrinə tabe olmayan sürücü yoluna davam edib və bu zaman polis onu qovmağa başlayıb. Avtomobildə olan üç dostu Ş.Hüseynovu təqib edən yol polisini mobil telefonla çəkməyə başlayıblar. Diqqətsizlik edən və tələsən Ş.Hüseynov yolda park edilmiş iki avtomobili vuraraq özü də ağır xəsarət alıb. Ş.Hüseynovun valideynlərinin sözlərinə görə o, qəzaya düşən kimi onu təqib edən yol polis əməkdaşları ərazidən uzaqlaşıblar və əraziyə başqa dövlət yol polisi əməkdaşları gəlib. 

Hadisə nəticəsində ağır xəsarət alan Ş.Hüseynov dərhal 1 saylı Klinik Tibbi Mərkəzə (Semaşko) yerləşdirilib. Məlum olub ki, Ş.Hüseynovun yeddi qabırğası sınıb, çiyin sümüyü əzilib və başından travma alıb. Sürücünün valideynləri  bildirib ki, həmin polis əməkdaşları indiyə kimi onlara nə baş çəkib, nə də heç üzürxahlıq etməyib. Ş.Hüseynovun isə vəziyyəti ağır olaraq qalır. Onun valideynləri qəzanın ədalətli araşdırlması üçün Azərbaycan Respublikası Daxili İşlər Nazirliyinin Baş Dövlət Yol Polisi İdarəsinin rəisi, polis general-mayoru Ramiz Zeynalova şikayət ediblər. 

Bəs polis hansı hallarda avtomobili təqib edə bilər?

 Hüquqşünas Ərşad Hüseyov bu sualları belə şərh edib:

 

“Polis haqqında” Qanunun 20-ci maddəsinin 9-cu bəndini və “Yol hərəkəti haqqında” Qanunun 85-ci maddəsinin 2-ci bəndinin qeydini birgə təhlil etdikdə aydın olur ki, DYP əməkdaşının dayanma barədə göstərişini sürücü yerinə yetirmədikdə onun nəqliyyat vasitəsinin təqib olunmasına yalnız aşağıdakı hallarda yol verilə bilər:

1) nəqliyyat vasitəsini idarə edən şəxsin və onunla birlikdə olan sərnişinlərin cinayət törətdiyi (o cümlədən idarə edilən nəqliyyat vasitəsini qaçırdığı) və ya cinayət törədilməsində şübhələnilməsi haqqında dəqiq məlumat olduqda;

2) nəqliyyat vasitəsinin dayandırılması tələbini yerinə yetirməyən sürücü öz hərəkətləri ilə cinayət törədilməsinə real təhlükə yaratdıqda (o cümlədən həmin nəqliyyat vasitəsinin idarə olunması ilə insanın həyatına və sağlamlığına real təhlükə yaratdıqda).

 

Birinci hal sürücünün və ya sərnişinin cinayət törətməsi barədə inandırıcı məlumat (növbətçi hissədən, digər polis əməkdaşlarından, cinayəti bilavasitə görmüş konkret şəxsdən və s.) alındıqda, habelə DYP əməkdaşı həmin cinayət faktını şəxsən müşahidə etdikdə yaranacaqdır.

 

İkinci hal isə o zaman mövcud olacaqdır ki, sürücünün vəziyyəti, onun idarə etdiyi nəqliyyat vasitəsinin vəziyyəti və ya onun etdiyi hərəkətin xarakteri (məsələn, xüsusi təhlükəli manevrlər etməsi, adamların çox olduğu yerdə yüksək sürətlə hərəkət etməsi və s.) başqa hərəkət iştirakçılarının, sürücünün özünün, sərnişinlərin, DYP əməkdaşlarının və ya istənilən başqa şəxsin həyatını və ya sağlamlığını aşkar təhlükəyə məruz qoysun, yaxud da nəqliyyat vasitəsində olan sürücü və ya sərnişinlərin cinayət törədəcəyi (məsələn, silahlı basqın edəcəyi, talama cinayətləri törədəcəyi və s.) barədə dəqiq məlumatlar olsun.

 

DYP əməkdaşı inzibati xətaya görə sürücünü təqib edə bilməz

 

Sürücünün sadəcə inzibati xəta törətməsi (yol hərəkəti qaydalarını pozması) nəqliyyat vasitəsini dayandırmadığı halda onun təqib olunması üçün əsas deyildir.

 

Çünki qanunvericiliyin tələbinə görə, qaydalardan kənara çıxan adi hərəkət (o cümlədən DYP əməkdaşının göstərişinə tabe olmama) təqib kimi təhlükəli vasitəyə əl atmaq üçün yetərli deyildir. Ona görə də, məsələn, DYP əməkdaşının göstərişinə tabe olmayaraq hərəkətini davam etdirən sürücü getdiyi yolda əvvəlki əməkdaşın məlumatı əsasında onu dayandırmaq istəyən digər DYP əməkdaşının da göstərişinə tabe olmadıqda, yuxarıda göstərilən iki haldan hər hansı biri yoxdursa, yenə də təqibə yol verilə bilməz. Lakin belə hallarda həmin nəqliyyat vasitəsi barəsində məlumat DYP-nin və polisin digər xidmətlərinin də nəzərinə çatdırılmalı, o, nəzarətə (o cümlədən texniki vasitələrin köməyi ilə) götürülməlidir.

 

Nəqliyyat vasitəsinin təqib edilməsi kifayət qədər təhlükəli bir hərəkətdir, çünki həm təqib olunanların və təqib edənlərin, həm də kənar şəxslərin həyat və sağlamlığını, müxtəlif subyektlərə aid maddi dəyərləri risk altına alır. Ona görə də bunun üçün qanunda göstərilən əsasların olduğu hər bir konkret halda da təqibin zəruriliyi dəyərləndirilməli, sürücünün saxlanılmasının başqa mümkün üsulları varsa, təqibə yol verilməməlidir.

Təqibi necə həyata keçirməli?

DYP əməkdaşı müvafiq əsaslar olduqda tabeçilik qaydasında DYP-nin yuxarı vəzifəli şəxsinə (məsələn, öz taqım komandirinə, bölmə rəisinə və s.) radio-cihaz vasitəsilə məlumat verməklə təqibə yol verə bilər. Təqibin təhlükəsiz həyata keçirilməsi ən mühüm şərtdir və təqibi həyata keçirən DYP əməkdaşı təhlükəsizliyə ciddi riayət etməlidir. Açıq-aşkar təhlükə olduqda DYP əməkdaşları təqibə yol verməməlidirlər. Təqib edilən nəqliyyat vasitəsinin dayandırılmasına başqa imkan olmadıqda bu məqsədlə məcburi dayandırma vasitələrindən (“kirpi”, müxtəlif sədlər və s.) istifadə olunmalıdır”.