Məlum olduğu kimi insan orqanlarının qanunsuz transplantasiyası ilə əlaqədar Ukraynanın hüquq mühafizə orqanlarından daxil olmuş hüquqi yardım göstərilməsi haqqında müraciət əsasında Azərbaycan Beynəlxalq Universitetinin nəzdində fəaliyyət göstərmiş Tibb Mərkəzinin vəzifəli şəxsləri tərəfindən vəzifə səlahiyyətlərindən sui-istifadə edilərək donorlardan qanunsuz olaraq böyrəklərinin götürülüb əcnəbi vətəndaşlar olan resipiyentlərə köçürülməsi faktları ilə bağlı Baş Prokurorluğun Ağır cinayətlərə dair işlər üzrə istintaq idarəsində Cinayət Məcəlləsinin 308.2-ci (vəzifə səlahiyyətlərdən sui-istifadə) maddəsi ilə başlanmış cinayət işinin istintaqı yekunlaşıb. Artıq  Baş Prokurorluq yekunlaşdırdığı istintaq materiallarını məhkəmnəyə göndərib.

Qeyd edək ki, ittihama görə universitetinin rektoru Elşad Abdullayevin, tabeçiliyində olan Tibb Mərkəzinin baş həkimi Dilarə İsmayılovaya həmin tibb müəssisəsinə insan orqan və ya toxumalarının transplantasiyası ilə bağlı cərrahiyyə əməliyyatlarının keçirilməsinə dair xüsusi razılıq (lisenziya) verilmədiyi halda qanunsuz göstəriş verməklə İsrail vətəndaşları Boris Volfman, Yuri Katsman və digərləri ilə əlbir olub cinayət əlaqəsinə girərək "İnsan orqan və (və ya) toxumalarının transplantasiyası haqqında" Azərbaycan Respublikası Qanununun tələblərini kobud surətdə pozaraq, 2009-cu ilin mart-dekabr aylarında Ukraynadan Azərbaycan Respublikasına gətirilmiş təqsirkar şəxslərdən maddi cəhətdən asılı olan donorlardan qanunsuz olaraq böyrəklərinin götürülüb 11 nəfər İsrail, 1 nəfər Fransa və 1 nəfər ABŞ vətəndaşları olan resipiyentlərə köçürülməsi ilə bağlı 13 cərrahiyyə əməliyyatlarının keçirilməsinə şərait yaratması, həmçinin Dilarə İsmayılovanın hər bir əməliyyata görə heç bir sənədləşdirmə aparmadan nağd qaydada ümumilikdə 130.0 min ABŞ dolları məbləğində pulu alaraq mərkəzin kassasına mədaxil etmədən Elşad Abdullayevə verməklə dövlətin qanunla qorunan mənafelərinə ağır nəticələrə səbəb olan zərər vurmasında şübhələnmək üçün əsaslar olduğundan cinayət işi üzrə Elşad Abdullayev və Dilarə İsmayılova Cinayət Məcəlləsinin 137.3 (insan orqanların və ya toxumalarının alqı-satqısı) və 308.2-ci (vəzifə səlahiyyətlərdən sui-istifadə) maddələri ilə təqsirləndirilən şəxs qismində cəlb ediliblər.

Həmin cinayət işinin materiallarından Dilarə İsmayılova barəsində Cinayət Məcəlləsinin 137.3 və 308.2-ci maddələri ilə cinayət işi ayrılmaqla istintaqı tamamlanaraq 26 avqust 2013-cü il tarixdə baxılması üçün Bakı Ağır Cinayətlər Məhkəməsinə göndərilmişdir.

Elşad Abdullayev istintaqdan qaçıb xarici dövlətdə gizləndiyi üçün barəsində Nəsimi rayon məhkəməsinin qərarı ilə həbs qətimkan tədbiri seçilərək axtarış elan olunmaqla tutulması istiqamətində beynəlxalq axtarış tədbirləri həyata keçirilir.

Dünən Fransada yaşayan Elşad Abdullayevin müdafiəçisi Elnur Məcidli Moderator.az-ın bununla bağlı sorğusunu cavablandırıb.

Elnur Məcidlinin saytımıza göndərdiyi sənədi və fikirlərini olduğu kimi təqdim edirik: “Bir mənalı olaraq bilinməlidir ki, orqan transplantasiya işinin qabardılması bir başa olaraq seçkilərlə bağlıdır, seçkilər ərəfəsində Elşad Abdullayevdən gələ biləcək hər hansı video zərbəyə qarşı önləyici tədbir kimi düşünmüş ola bilərlər.

Eyni zamanda Elşad Abdullayevin Fransada Maqnitski aktına bənzər prosesə başlaması və bununla bağlı müxtəlif dövlət orqanlarına sorğuların göndərilmə ehtimalı da orqan transplantasiya məsələsini əks arqument kimi ortaya çıxmasına səbəb ola bilər. Təbii ki, hadisələrin bu formada cərəyan etməsi Ramiz Mehdiyev, Zakir Qaralov başda olmaqla bütün Mehdiyevçilərin narahatçılığına səbəb olur. Bildiyiniz kimi, Elşad Abdullayev Fransada artıq siyasi sığınacaq alıb, daimi yaşayış hüququ əldə edib.Növbəti aylardan etibarən Elşad Abdullayev müəyyən kurslardan sonra Paris universitetlərindən birində işləyə bilər, həmçinin Fransada yeni universitet qurulması layihəsi də müzakirə olunmaqdadır. Qayıdaq orqan transplantasiyası məsələsinə. Sizə iki sənəd göndərirəm eksluziv olaraq. Hər ikisi təsisçi müqaviləsidi. ABU Tibb Mərkəzinin sahibi Elşad Abdullayevdi, lakin o bu mərkəzin tibb qurumu kimi işlədilməsiylə bağlı baş həkim Dilarə İsmayılova ilə müqavilə bağlayıb. Sizə göndərdiyim hər iki təsisci müqaviləsində də göstərilir ki, bütün fəaliyyət qanun içində olmalıdır, qanundan kənar hər hansı fəaliyyətdən Dilarə İsmayılova məsuluyyət daşıyır. Hüquqi qiymət verəsi olsaq Elşad Abdullayev müqavilədən görsəndiyi kimi bir növ icarədardır, tibb mərkəzinin bütün fəaliyyətindən məsuliyyəti Dilarə İsmayılova daşıyır. Əgər burada hər hansı qanundan kənar fəaliyyət olubsa bunun məsuliyyətini Dilarə İsmayılova daşıyır, ilk növbədə o məsuliyyətə cəlb olunmalıdır.

Lakin bu baş verməyib, əksinə o başqa bir klinikada baş həkim olaraq işləyir. Bununla yanaşı bizdə olan məlumata görə Ramil Usubova məxsus Nur klinikasında qanunsuz orqan transplantasiyası ilə məşğul olunub, bununla bağlı faktlar toplamışıq, yəqin ki yaxın zamanda bunlar ictimaiyyətə açıqlanacaq”.