İşğalçı ordudakı fərarilik və başıpozuqluq halları artır; Qarabağdakı erməni əhali o vaxt girovluqdan çıxacaq ki...

Ermənistanda 8 may 2018-ci il “məxməri inqilab” baş verəndən və hakimiyyətə gizli “qərbçi” sayılan Nikol Paşinyan gələndən sonra Moskva-İrəvan münasibətləri bu günədək normal axara düşməyib. İki tərəfdən verilən nikbin və növbətçi bəyanatlara rəğmən, gerçək belədir ki, Kreml heç cür baş nazir Nikol Paşinyanı “özününkü” saya bilmir - baxmayaraq ki, işğalçı ölkə Rusiyanın forpostu olmaqda davam edir, Paşinyanın özü isə bu iki ildə Moskva əleyhinə heç bir addım atmayıb - əgər yalnız prezident Vladimir Putinin dostu, eks-prezident Robert Köçəryanın həbsi nəzərə alınmazsa.

Bu da faktdır ki, Nikol Paşinyan dönəmində Ermənistanda Rusiya ilə bağlı ictimai ovqat xeyli dərəcədə mənfiyə dəyişib. Əksər analitiklər əmindir ki, bu cür gəlişmədə Paşinyan hakimiyyəti birbaşa iştirak eləməsə də, altdan-altdan o, anti-Rusiya isterikasını körükləyir. Müstəsna olaraq Rusiyanın hesabına ayaqda qalan və Azərbaycan torpaqlarının işğalını davam etdirən Ermənistanın bu “naşükürlüyü” ilk baxışda qəribə görünə bilər. Ancaq söhbətin hansı millətdən getdiyini yada salanda təəccübə yer qalmır.

Ermənilər tarix boyu daha səxavətli və daha qüdrətli ağanın himayəsinə sığınmaq üçün əvvəlki sahiblərinə asanca arxa çevirib, xəyanət ediblər. Təbii ki, ruslar də bunun fərqində olmamış deyillər. Moskvanın Paşinyana qarşı etimadsızlığının qayəsində ilk növbədə bu amil dayanır. Hərçənd Kremlin İrəvana təzyiq və təsir rıçaqları qədərindən çoxdur. Onlardan biri və birincisi, əlbəttə ki, həll uzanan Qarabağ problemidir. Erməniləri ən çox qorxudan və ehtiyatlandıran da budur. Çünki onlarda artıq əminlik yaranıb ki, Moskva Dağlıq Qarabağla bağlı ermənilərin xeyrinə bundan artığına getməyəcək, oyuncaq rejimi “dövlət” kimi tanımayacaq və ya onun Ermənistana rəsmən birləşdirilməsinə “dobro” verməyəcək. Əks halda bölgənin açar ölkəsi olan Azərbaycanı həmişəlik itirə bilər.

*****

Keçmiş xarici işlər naziri Tofiq Zülfüqarov: “...Rusiya ...

Sabiq xarici işlər naziri Tofiq Zülfüqarov da haqlı olaraq deyir: “Nikol Paşinyan bir tərəfdaş kimi Rusiya tərəfindən qəbul edilmir. Ermənilər Rusiyaya ümid etmirlər. Onların istəyi Qərbin bir hissəsi olmaqdır. Bunu da bəyan edirlər. Fikrimcə, bundan sonra da onlar hər vəchlə göstərməyə çalışacaqlar ki, qərbyönlü siyasət həyata keçirirlər, Rusiyadan uzaq qaçırlar. Bu, onların əsas hədəfidir”.

T.Zülfüqarova görə, ermənilər artıq başa düşüblər ki, Rusiyadan nəsə almaq mümkün deyil, nə almaq mümkündürsə, artıq alıblar. “Paşinyan hakimiyyətə ona görə gəlib ki, dövlət siyasətini Rusiyadan Qərbə döndərsin”, - deyə diplomat əminliklə qeyd edib.

Yəni söhbət faktiki surətdə Qərb timsalında Ermənistanın özünə yeni ağa axtarışından gedir. Bu, onların öz işidir, ancaq məsələ ondadır ki, onlar işğal altındakı Dağlıq Qarabağla birgə indi də Qərbin himayəsinə sığınmaq, işğalı legitimləşdirmək istəyirlər. Odur ki, Azərbaycan Ermənistanla bağlı mümkün “əl dəyişmə”ni daim diqqətdə saxlamalı, Qərblə daha çevik və intensiv işləməlidir. Biz ərazi bütövlüyümüzün hər hansı şəkildə və heç bir platformada alver predmeti olmasına imkan verə bilmərik. 

Qarabağ danışıqlarında İrəvanın təxribatçı, status-kvonu uzatmağa, danışıqları pozmağa yönəlik destruktiv davranışı ola bilsin, həm də Qərb amili ilə əlaqədardır. Ermənilərin “dalağı sancıb” ki, Moskva konfliktin onların istədiyi kimi həllinə, işğalın rəsmiləşməsinə qol qoymayacaq. O zaman bəlkə Qərb?..   

*****

Bu arada məlum olub ki,  ATƏT-in Minsk Qrupunun həmsədrləri Azərbaycan prezidenti İlham Əliyevlə Ermənistan baş naziri Nikol Paşinyanın yeni görüşünü təşkil etməyə çalışırlar. Məlumatı “Qraparak” qəzeti yayıb. Məlumata görə, bu məsələ Mnatsakanyanla Məmmədyarov arasında baş tutan son videokonfrans zamanı da müzakirə edilib. Həmsədrlərin görüşün baş tutması üçün koronavirusla bağlı situasiyanın zəifləməsini gözlədikləri bildirilib.

Ancaq liderlərin daha bir görüşü nəyi dəyişəcək, əgər rəsmi İrəvan özünün XİN başçısı Zoqrab Mnatsakanyanın dili ilə işğal altındakı torpaqların qaytarılmayacağını, Dağlıq Qarabağın statusu və ya “arsax xalqının öz müqəddəratını təyinetmə” haqqı deyilən cəfəngiyatı ön şərt kimi irəli sürürsə?

Görünən budur ki, zaman ermənilərə işləmir. Ona görə ki, Qarabağ məsələsi Ermənistanın problemləri arasında açar problemidir və Azərbaycandan fərqli olaraq o, geri gedir. Koronavirus pandemiyası aradakı fərqi daha da böyüdəcək - Azərbaycanın xeyrinə. 

Düşmən ölkədəki acınacaqlı vəziyyət isə, təbii ki, işğalçı ordudakı duruma da neqativ anlamda inikas eləməkdədir. Son vaxtlar erməni ordusunda başıpozuqluğun, fərariliyin daha da qənaətimizin sübutu sayıla bilər. İki “isti” fakt.

Məlumatlara görə, Ermənistan ordusunda daha 3 zabit hərbi hissədən qaçıb. Erməni mediası xəbər verir ki, Daro Harutunyan və Albert Hambaryan hərbi hissədə ağır şəraitə dözməyərək oranı tərk ediblər. Qaprel Qaprelyan adlı zabit isə məzuniyyət bəhanəsi ilə hərbi obyekti tərk edərək bir daha geri qayıtmayıb. Hər 3 zabitin əməli ilə bağlı cinayət işi açılıb.

Digər fakt budur ki, iki gün öncə Azərbaycanın işğal edilmiş yaşayış məntəqələrində yerləşdirilən Ermənistan silahlı qüvvələrinin bölmələrində xidmət edən əsgərlər arasında nizamnamədən kənar münasibətlər zəminində baş verən daha bir cinayət faktı ortaya çıxıb. Erməni KİV-ləri bildirir ki, hərbi qulluqçular tərəfindən təhqirlərə və təzyiqlərə məruz qalan əsgər Arman Mesropyan odlu silahdan atəş açmaqla özünə qəsd edib. Şahidlərin dediyinə görə, özünə qəsd etməzdən əvvəl A.Mesropyan odlu silahdan atəş açaraq onunla birlikdə eyni bölükdə feldşer kimi xidmət edən digər hərbi qulluqçunu da ağır yaralayıb.

*****

Əslində işğalçı orduda xidmət edən əsgərlər də, Dağlıq Qarabağdakı Azərbaycan vətəndaşları olan ermənilər də bir qrup avantürist və kriminal rejimin girovudur - kimlər ki, bütövlükdə erməni xalqına fəlakətdən savayı, yaxşı heç nə gətirməyiblər və 30 ildir onu sərsəm “miatsum” ideyası ilə “yemləyirlər”. Təbii ki, bunu etiraf edən ermənilər də var.

“Məlum olduğu kimi, Azərbaycan Respublikası Dağlıq Qarabağ bölgəsinin azərbaycanlı icmasının fəaliyyətini ən yaxından izləyənlər arasında Dağlıq Qarabağ bölgəmizin erməni icmasından olan xeyli sayda vətəndaşımız var. Azərbaycanın işğal olunmuş ərazilərində Ermənistan tərəfindən qeyri-qanuni şəkildə idarə edilən qondarma rejimin repressiv davranışlarına rəğmən, erməni icmasının üzvü olan sakinlər bizimlə əlaqə saxlayaraq fəaliyyətimizi dəstəklədiklərini və azərbaycanlı icma ilə sülh şəraitində ölkəmizin beynəlxalq tanınmış sərhədləri çərçivəsində birgə yaşamağa hazır olduqlarını bildiriblər”.

Tural Gəncəliyev: Dağlıq Qarabağın Azərbaycanlı icması erməni ...

Bunu Azərbaycan Respublikasının Dağlıq Qarabağ bölgəsinin Azərbaycanlı İcmasının sədri Tural Gəncəliyev deyib. Onun sözlərinə görə, faktlar onu göstərir ki, Azərbaycanın Dağlıq Qarabağ bölgəsinin erməni icması özlərini bütün bu oyunların qurbanı olduqlarını, Ermənistan tərəfindən Azərbaycana qarşı təcavüzün bir alətinə çevrildiklərinin fərqindədirlər. “Müsbət haldır ki, Azərbaycan Respublikasının Dağlıq Qarabağ bölgəsinin erməni icması daxilində bölgədə ədalətli və davamlı sülhə nail olunması və normal həyatın bərpası üçün münaqişənin yeganə həllinin Azərbaycanın beynəlxalq səviyyədə tanınmış ərazi bütövlüyü çərçivəsində iki icmanın birgə mövcudluğundan keçdiyini anlayan şəxslərin sayı kifayət qədər çoxdur və artmaqdadır. Son dövrlər ərzində həm azərbaycanlı icmanın rəsmi sosial media hesablarına, həm də mənim şəxsi hesablarıma erməni icmasının nümayəndələri tərəfindən göndərilən çoxsaylı ismarıclar bunu deməyə əsas verir”, - deyə Gəncəliyev qeyd edib.

“Azərbaycan Respublikası Dağlıq Qarabağ bölgəsinin seçilmiş nümayəndəsi olaraq, mən erməni icmasının diqqətinə çatdırmaq istəyirəm ki, onların bizə göndərdikləri müraciətlərin anonimliyi həmin şəxslərin təhlükəsizliyi naminə yekun sülh əldə olunanadək tam qorunacaq. Dağlıq Qarabağın azərbaycanlı icması bölgədə sülhün bərpası üçün daim səy göstərir və bu prosesdə bizə dəstək olan bütün erməni icmasının nümayəndələrinin fəaliyyətimizə dəstəyini qiymətləndiririk. Xankəndi şəhərinin millət vəkili olaraq, şəhərin həm erməni, həm də azərbaycanlı sakinlərinin bütün qayğı və problemlərinin həlli istiqamətində çalışdığıma sizləri bir daha əmin etmək istəyirəm. Azərbaycan Respublikası Dağlıq Qarabağ bölgəsinin erməni icmasına bir daha bildirmək istəyirəm ki, biz sülh naminə icmalararası daha geniş dialoqa hazırıq və bunu tezliklə təşkil edəcəyik”,- deyə icma rəhbəri vurğulayıb.

Qeyd edək ki, Milli Məclisin iclasında Tural Gəncəliyev Azərbaycanın AŞ PA-dakı yeni nümayəndə heyətinin üzvü seçilib. Ümid edirik ki, icma rəhbərinin bu vəzifəsi Qarabağ həqiqətlərini Avropaya daha sanballı şəkildə çatdırmaq və erməni yalanlarını daha effektli şəkildə faş etməkdə yeni və güclü stimul yaradacaq.(Musavat.com)