Bəzən erməni jurnalistləri içərisində mövcud Ermənistan siyasətini tənqid edənlər də tapılır. Bu tənqidin arxasında Azərbaycana heç bir rəğbət olmasa da, çətin duruma düşdüklərinin etirafını onların öz dilindən eşitmək maraqlıdır. 

Moderator.az bu marağı nəzərə alıb “Armenian Report”un yazarı Tevos Arşakyanın Ermənistan xarici işlər naziri Zöhrab Mnatsakanyanın uğursuz London səfəri haqqında qeydlərini diqqətinizə çatdırır.

“Bölgədə baş verən və Ermənistana birbaşa təsir edən ən mühüm geosiyasi proseslərin təhlili göstərir ki, Paşinyan hökumətinin xarici siyasəti diletantlıq baxımından daxili siyasətdən çox da fərqlənmir. Məsələ heç də Valdayda Əliyev-Paşinyanın qiyabi söz duelində deyil, hətta Aşqabadda baş verən əyani dueldən də söhbət getmir. Burada hər şey aydındır - Moskva rəsmi İrəvanı Qərblə dialoq qurmağa çalışdığı üçün Əliyevin əli ilə cəzalandırmağa çalışır. Məsələ, Qərbin inqilabi erməni hakimiyyətinin eyni  vaxtda iki stulda oturmasında, yəni həm Rusiya, həm də Qərblə dost olmaq istəyinə görə məyus olmasındadır.

Heç kimə sirr deyil ki, sivil dünya keçən il Ermənistandakı inqilaba həvəslə və rəğbətlə yanaşdı. Qərbdə, güman edirdilər ki, Kremlin oyuncağı - Serj Sarkisyanı aşırandan sonra Nikol Paşinyan şübhəsiz ki, ölkəni Rusiyanın təsir orbitindən çıxaracaqdır. Xüsusilə, keçən il Boltonun İrəvana səfəri də bunu göstərir. Ancaq, buraya gələndə Bolton gördü ki, yeni hakimiyyət ruslarla ayrılmaqda  və Qərbə üz tutmaqda qərar qəbul edə bilmirlər. Bu, Tramp administrasiyasında məyusluğa səbəb oldu. İndi, Boltonun ziyarətindən bir il sonra, avropalılar da İrəvanın xarici və daxili siyasətindən məyus olduqlarını nümayiş etdirirlər. Üstəlik, bunu açıq şəkildə, “döymək” yolu ilə nümayiş etdirirlər.

Məhz bu, Ermənistan Xarici işlər naziri Zöhrab Mnatsakanyanın  yaxınlarda  Böyük Britaniyaya işgüzar səfəri zamanı BBC kanalında yayımlanan "Hard Talk" verilişində iştirak edəndə baş verdi. Razılaşın ki, meydan, göründüyü kimi, çox nüfuzludur. Bu verilişə dünyada milyonlarla insan baxır. Aparıcı Stefan Sakur qonaqlarına növbətçi deyil,  kəskin suallar verir. Ona adekvat cavab vermək üçün ağıl, professionallıq, dəyanət lazımdır ki, bu da bizim xarici işlər idarəsinin rəhbərinə yaddır. 

Belə ki, məsələn,  İrəvanın xarici siyasətinin prioritetləri, yəni Ermənistanın gələcəkdə özünü kimlə görəcəyi - Qərblə və ya Şərqlə (yəni Rusiya) ilə əlaqəli  ev sahibinin sualına Zöhrab Mnatsakanyan adekvat cavab verə bilmədi. Eyni şəkildə o, yeni hakimiyyətin apardığı islahatlarla bağlı suallara da ağzını sürüməklə cavab verdi. O, aparıcını Paşinyan hökumətinin həqiqətən korrupsiyaya qarşı mübarizə apardığına, köhnə çürük siyasi sistemi pozduğuna və xalqın vəziyyətini yaxşılaşdırmağa çalışdığına da inandıra bilmədi.

Təbii ki, Artsaxda problemi nizamlama perspektivləri ilə bağlı sual da var idi. Aparıcı Stefan Sakur Nikol Paşinyanın "Artsax Ermənistan və nöqtə" sensasiyalı açıqlamasına toxundu və əlavə etdi ki, "bu, sülhün bərqərar edilməsinə yönəlməyib və beynəlxalq hüquqa, BMT prinsiplərinə ziddir".

Bilirsiniz, mən şəxsən Mnatsakanyanın söylədiklərini dinləməkdən utanırdım.  Guya Ermənistanın baş naziri bununla  Artsaxın həm Ermənistanın, həm də bütün ermənipərəst birliyin gündəmində vacib bir məsələ olduğunu göstərmək istəyib.  O, bu sözlərlə nəinki aparıcını inandıra bilmədi, üstəlik aparıcı hücumunu daha da artırıb  sözün əsl mənasında nazirimizin “ağız-burnunu əzişdirdi”.

Sonunda nə qazandıq? Paşinyan hökuməti  uzun illər boyu toplanmış Rusiya ilə münasibətlərdə xarici siyasət kapitalını boşa çıxartdı. Bu baxımdan Lavrovun Paşinyanın Stepanakert çıxışı ilə bağlı sərt açıqlamasını, Moskvanın Soçi və Aşqabadda vurduğu bir sıra ağrılı zərbələri xatırlayaq. Digər tərəfdən, BBC kanalında Mnatsakanyanın “əzişdirilməsi” əyani sübut etdi ki,  Qərblə güclü və etibarlı münasibətlər qura bilmədik. Əgər sabah Azərbaycan müharibəyə başlasa, bu isə gec-tez başlayacaq, artıq Ermənistan azərbaycanlılara rəğbət bəsləyən ruslardan, qərbdən heç mənəvi dəstək də ala bilməyəcək.

Paşinyan hökuməti dərhal oyanmalı və Ermənistanın maraqlarına söykənən real xarici siyasət yürütməyə başlamalıdır. Münaqişə tamamilə həll olunana qədər bu barədə qışqırmağa dəyməz, əks halda bizə qarşı çevrilir. Daha dəqiq iş, təbliğat aparılmalıdır ki, belə gülünc vəziyyətlər yaranmasın. Amma Paşinyan  Zohrab Mnatsakanyanı Xarici işlər nazirliyindən çirkli süpürgə ilə süpürüb atmalıdır”.