Əziz oxucular, tanınmış psixoterapevt və elmi-lədun bilicisi Paşa Yaqubun yeni kitabı artıq nəşr olunub. “HƏYATINIZI DƏYİŞƏCƏK – 2019” adlanan bu kitabda müəllif, üzümüzə gələn 2019-cu ilin astronomik hadisələrini təhlil edərək, növbəti il üçün proqnozlar verib. Kitabda həmçinin, kimya, fizika, biologiya və tibb sahəsində bugünədək elmə məlum olmayan bəzi sirlər açıqlanır. 

kitaba, müəllifin “Pangeya” romanı da daxil edilib.  

Geniş oxucu kütləsi üçün nəzərdə tutulan bu kitabı hissə-hissə oxucularımıza təqdim edirik. 

(Yazının əvvəlini bu linkdən oxuya bilərsiniz:  //www.moderator.az/news/253249.html ) 

Yaradanın sizə irs olaraq verdiyi dünyanı murdarlamayın.

Qadın kişi paltarı, kişi qadın paltarı geyinməməlidir. Allah belə adamdan ikrah edir. 

Öküzlə eşşəyi bir kotana qoşmayın.

Yunla kətanın qarışığından toxunmuş parçadan paltar geyinməyin.

Aranızdan pisliyi yox etməlisiniz.

Heç kim atasının arvadını alıb atasının şərəfinə ləkə gətirməməlidir.

Düşmənlərinizə qarşı çıxmaq üçün ordugah quranda özünüzü hər cür murdarlıqdan qoruyun.

Nəzir edəndə onu yerinə yetirməyi uzatmayın; çünki, Yaradan bunu sizdən tələb edəcək. Yerinə yetirməsəniz, özünüzə ziyan verənlərdən olacaqsınız. Amma nəzir deməkdən qaçınırsınızsa, bu günah deyil.

Verdiyiniz sözün (əhdin) üstündə durun və Yaradana öz dilinizlə könüllü olaraq nə nəzir etmisinizsə, yerinə yetirin. 

Yadellinin, yaxud yetimin işinə baxanda haqqı, ədaləti pozmayın.

Yaradanın  sözünə həmişə qulaq assanız, bütün nemətlər başınızdan töküləcək:  şəhərdə də, tarlada da xeyir-bərəkətiniz aşıb-daşacaq;  övladlarınız çox, torpağınızın bəhrəsi bol olacaq, heyvanlarınızın balaları, buzovlarınız, quzularınız saya gəlməyəcək. Səbətləriniz, xəmir təknələriniz bərəkətli olacaq. Hər işiniz avand olacaq. Yaradan anbarlarınızı bərəkətli, əl atdığınız hər işi xeyirli edəcək. Yaradan sizə verdiyi diyarda üstünüzə bolluca xeyir-bərəkət yağdıracaq. Yaradanın  əmrlərinə riayət edib Onun yolu ilə getsəniz, Yaradan siz sülhsevərləri müqəddəs  xalq edəcək.

Yaradan  mal-heyvanınızı birə-beş artıracaq, torpağınızı məhsuldar edəcək. 

Yaradan Öz ruzi-bərəkət anbarının, göylərin qapısını açıb torpağınıza vaxtlı-vaxtında yağış yağdıracaq, əlinizin hər işinə bərəkət verəcək. 

Yox əgər Yaradanın əmrlərinə  qulaq asmasanız, bütün əmrlərə və qanunlara dəqiqliklə əməl etməsəniz, bu lənətlər sizi qarabaqara izləyib yaxanızdan yapışacaq:  Şəhərdə də, tarlada da lənətli olacaqsınız. Səbətləriniz  xəmir təknələriniz lənətli olacaq. Övladlarınız da, torpağınızın bəhəri də, mal-heyvanınızın balaları da lənətli olacaq.  Hər işiniz nəhs gətirəcək. Bəd əməllərinizə, Yaradanı unutduğunuza görə gördüyünüz hər işdən lənət, çaşqınlıq, cəza biçəcəksiniz; tez bir zamanda məhv olub yer üzündən yox olacaqsınız...

Allahı sevirsinizsə,  insafdan üz çevirməyin

Ey sülhpərvər xalq! Mənim ilk nəsihətim budur: pak, gözəl və nurlu bir ürəyə malik olun ki, əzəli, əbədi və qədim bir səltənətə sahib olasınız. 

Yaradanın nəzərində ən sevimli şey insafdır; Allahı sevirsinizsə,  insafdan üz çevirməyin. İnsaf  Yaradanın bizə bir bəxşişidir; onu gözünüzün önündə saxlayın.

Ey insanlar! Sevgi Yaradanın qalasıdır; oraya daxil olan kəs nicat tapar və əminamanlıqda olar; ondan üz çevirən kəs isə, yolunu azar və həlak olar. 

Yaradan sizi zəngin yaratdı; nə üçün yoxulluğa yuvarlanırsınız? 

Yaradan sizi əziz yaratdı; nə üçün özünüzü zəlil tutursunuz?

 Yaradan sizi elm cövhərindən yaratdı; nə üçün Yaradandan deyil, başqasından elm axtarırsınız?

 Ey sülhpərvər xalq! Kainatı başdan başa axtarsan Yaradanın qüdrətindən başqa heç nə tapa bilməzsən!

Yaradan sizi əbədiliyə çağırır;  siz isə, faniliyə meyl edirsiniz.

 Öz məqamınızla fəqirlər qarşısında lovğalanmayın.

Allahın yaratdıqlarından biri sizə üz tutub bir şey istəsə, onu rədd etməyin.

 Ey ağıl sahibləri! Hesabata çəkilməmiş, hər gün özünüzə hesabat verin. Çünki, ölüm sizi qəflətən haqlayar və əməllərinizin hesabını verməli olarsınız.

Yaradan ölümü sizin üçün bir şadlıq müjdəsi etdi; nə üçün ondan hüzünlənirsiniz?!.

 Allah Günəşi  öz şəfəqlərini sizin üzərinizə səpmək üçün yaratdı! Nə üçün o nurdan pərdələnirsiniz? (Evinizə qalın pərdələr vurursunuz?!)