“Azərbaycan toyları dünyada analoqu olmayan bir şeydir və indiki qaydalar hökmən dəyişdirilməlidir”

Bunu Moderator.az-a açıqlamasında şair Zakir Fəxri toylarımızdakı israfçılığa münasibət bildirərkən deyib. Z.Fəxri bildirib ki, köhnə toy adətlərimiz indikindən daha yaxşı idi:

“Qabaqlar toylar daha gözəl keçirilirdi, yemək başqa yerdə olurdu və sonra gəlib musiqiyə qulaq asırdın. İndi bütü dəyərlər tapdanıb, yəni indi buna toy demək olmaz. Toydan gələndən sonra altı saat qulağından o səs-küy getmir. Toylarımızla bağlı qonunlar dəyişməlidir. Masalar həddən artıq yeməklə dolu olur, bu isə heç kimə lazım deyil. Buna görə də toy sahibi ziyana düşür, toya gələn insan isə masanın qiymətin hesablayır. Bunların hamısı çox xaotikdir. Qabaqlar çadır toylarımız bundan çox dəyərli olurdu. Onda bir kasa bozbaş, pendir, çörək və göyərti olurdu və kifayət qədər də toyunu yola verirdin, amma indi elə deyil. Azərbaycan toyları dünyada analoqu olmayan bir şeydir və indiki qaydalar hökmən dəyişdirilməlidir. Dünyada elə milyonçu adamlar var ki, vur-tut altı nəfərlə kilsəyə gedib kəbinin kəsdirir. Bizdə isə elə bil yarış keçirilir. Ailə var ki, on günlük məsrəfin toya verir, bunlar hamısı nəzərə alınmalıdır. Milləti düşünmək lazımdır, toylarımızla bağlı müsbət heç nə görmürəm. 

“Əvvəllər toyda yığılan puldan nəsə qalırdı və o pulla gənc ailə özünə bir iş görürdü. Amma indi valideyn iyirmi il toyalara gedir və sonra öz övladının toyunda yığılan pulları restoran müdiri cibinə qoyur. Bunların şadlıq saraylarından başqa heç kimə xeyri yoxdur, mədəni sürətdə qarət olunuruq. Aqil Abbasla Dubayda, Türkiyədə bir neçə toyda olduq. Sizi inandırım ki, o boyda nəhəng varlıların toyunda masanın üstündə rəngli su və şirniyyat var idi. Qayda onlarda belədir ki, təam edib hədiyyəni verirsən və bu da toy sahibinə qalır. Xırda xərclərlə də restoranı yola vermək olur. Son illər bizim toylarda salat yeyənləri görmürəm. Bu israfçılıqdan yaxa qurtarmaq üçün köhnə toylarımızı bərpa etməliyik. Rayonlarımızın çoxunda restoranı bir neçə saatlıq icarəyə verirlər, qalan şeyləri özün alırsan. Bu variant nəinki sərfəli, çox gözəldir. Bunu Bakıda da dəbə salmaq  lazımdır. İmkanlıları bir qırağa qoysaq, orta təbəqənin adamları toy edərkən ancaq həyəcan keçirir ki, görəsən toydan necə çıxacaq. Sonra da borcdan uzun illər çıxa bilmirlər. Ona görə də çox insanlarımız var ki, 30-35 yaşındadı, amma evlənə bilmir”.