Braziliyalı milyarder iş adamı Skarpa bir gün ondan çox jurnalisti öz şəxsi evinə dəvət etdi. Jurnalistlərin hamısı Skarpanın şəxsi həyatı ilə çox maraqlansalar da, qəfil dəvəti başa düşə bilmədilər. Gözləyirdilər... Bir müddətdən sonra ev yiyəsi olan iş adamı qonaqları salamladı və onları bura nə üçün dəvət etdiyini dedi. Jurnalistlər bunu eşitcək gözlərinə inanmadılar. Hətta bəziləri bunu iş adamının növbəti zarafatı kimi qəbul etdi. Bəs onları təəccübləndirən nə olmuşdu ?

Moderator.az təqdim etdiyi yazıda bu barədə danışacaq:

“Eradan əvvəlki sivilizasiyanın hegemonu olan Qədim Misirdə belə bir adət var idi: Onlar “canlı ölülər” adlandırdığı qulları işçi qüvvəsi kimi saxlamaqla yanaşı onlardan başqa məqsədlə də istifadə edirdilər. Əgər firon, fironun ailə üzvləri, erkən dünyalarını dəyişərdilərsə, onda ən yaxşı qul-qaravaşı seçər, onları “canlı ölü”dən elə əsl ölüyə çevirərdilər. Bir firon ölən zaman 20-dən çox qulu öldürüb basdırırdılar. Bu o anlamı daşıyırdı ki, guya bu dünyada olduğu kimi o dünyada da onlar firona xidmət göstərsinlər. Elə bu mifoloji düşüncədən çıxış edib ilxıdakı ən yaxşı atları da boğazlayıb öldürür, xəzinədəki qızıl əşyalarını, bahalı əlbisələri də  basdırardılar. Hamı elə düşünərdi ki, onlar o dünyada firona mütləq lazım olacaq...

Skarpa da əvvəl bu hadisəni jurnalistlərə danışır və ən bahalı və sevimli avtomobili olan milyon dollarlıq Bentley markalı avtomobili torpağa göməcəyini bildirir. Gözləri kəlləsinə çıxan jurnalistlər bir anlıq da olsa hiddətlənirlər. Çünki milyarderin həyətyanı sahəsində maşın üçün artıq “qəbir”  qazılmışdı. Hətta hamının gözü qarşısında bir milyonluq maşın yavaş-yavaş öz son mənzilinə doğru irəliləyirdi. Jurnalistlərin yaddaşı bir anlıq köhnə informasiyalara qayıdır. “Bir milyonluq maşının pulu ilə Braziliyada çox uşağa yardım etmək olardı, amma bu isə... “ deyə düşünürlər. Elə bu məqamda sanki jurnalistlərin fikrini oxuyan Skarpa hamını çaşdıracaq, özünü isə sevdirəcək bir nitq söyləyir:

-“İndi yəqin ki, hamının mənim nə üçün bahalı maşını torpağa gömdüyümmü düşünür və qınayırsınız. Mən təbii ki, maşını basdırmayacağam. Amma öz orqanlarımın da basdırılmasına imkan verməyəcəyəm və sizlərin yanında vəsiyyət edirəm ki, mən ölən zaman mənim sağlam orqanlarımı torpağa gömməyib ehtiyacı olanlara köçürsünlər.

Jurnalistlər bu çıxışdan çox təsirləndilər. Bu addım çox keçmədən milyarderi ölkəsində daha da sevdirdi. Xüsusən də mafiya və böyük qara qüvvələrin ən böyük qazanc mənbəyi olan orqan satışının sürətlə artdığı bir məqamda bu kimi cəhdlər həm də böyük maarifləndirici xarakter daşıyır. Təsəvvür edin, xüsusi qara güc qüvvələri qara camaatı, kimsəsiz uşaqları qaçırır və onların orqanların mənimsəyərək milyonlarla ölçülən bir məbləğə satır. Bu kimi hallar isə insanı xilas etməklə yanaşı, həm də ən bahalı qara biznes sahəsinə böyük zərbə vurur. Odur ki, Skarpanın bu jesti həm iqtisadiyyat, həm də humanizm baxımından çox gərəklidir.