“Türmə belə onu yolundan döndərmədi” -Sabiq prezidentin qardaşı...

Xalq artisti onları tənqid etdi: “Villaları, maşınları, qızılları efirdə reklam etməyin, gözə soxmağın nə mənası var ki?”

Ukraynalı qaçqınlara kömək edən rus şərləndi və təcrudxanada ölü tapıldı...-FOTOLAR

“Məktəblilər arasında hərbi bilik yarışının keçirilməsi ona görə vacibdir ki...”

"Jurnalistika Yer kürəsinin heç bir yerində cinayət olmamalıdır"

Britaniya XİN rəhbəri Kreml üçün qorxunc bəyanat verib, Zaxarovanın "gözləri kəlləsinə çıxıb"...

Çeçenistanda Ramzan Kadırov adlı "fələstinli" dünyaya gəldi...

"Türkiyə İsraillə bütün ticarət əlaqələrini kəsib" - "Bloomberg"

"Rusiya ukraynalılara qarşı kimyəvi silah tətbiq edir" - ABŞ Dövlət Departamenti

“Türmə belə onu yolundan döndərmədi” -Sabiq prezidentin qardaşı...

Oxunub: 4462

23 May 2016 | 13:01

“Türmə belə onu yolundan döndərmədi” -Sabiq prezidentin qardaşı...

İstiqlalçı millət vəkili Vahid Əhmədovun dünən mətbuata açıqlamasında eks-prezident, Milli Azadlıq Hərəkatının lideri Əbülfəz Elçibəy haqqında səsləndirdiyi xoş sözlər mediada ciddi ilgi gördü.

Xatırladaq ki, Vahid Əhmədov Elçibəyin bəzi xidmətlərindən bəhs etmişdi:

"Çox vaxtı deyirlər ki, Əbülfəz Elçibəy siyasətçi olamayıb. Mən 1992-ci ildə Əbülfəz Elçibəylə bir yerdə işləmişəm. Rəhmətlik Əbülfəz Elçibəy Azərbaycan tarixində ən unudulmaz və böyük zəhməti rus qoşunlarını Azərbaycandan çıxartması olub. Bunu hər dövlət başçısı bacarmazdı. O dövrdə Azərbaycanda nə qədər təxribatlar tödətdilər ki, rus qoşunları buradan çıxarılmasın. Ancaq rəhmətlik Əbülfəz Elçibəy sonadək mübarizə apardı və bir nəfər rus əsgərini də Azərbaycanda qoymadı. Baxmayaraq ki, o dövrdə bizim imkanımız çox zəif idi və bizə silah-sursat verən yox idi. Buna baxmayaraq biz dövlətin müstəqilliyini qoruyub saxlaya bildik. Bu gün də həmin Azərbaycan 25 ildir ki, müstəqil dövlət kimi fəaliyyət göstərir”.

Mövzunu davam etdirmək üçün Moderator.az-ın əməkdaşı Elçibəyin qardaşı ilə söhbətləşib. Almurad Əliyev Elçibəylə bağlı xatirələrini Moderator.az-la bölüşüb.

A.Əliyev deyib ki, sabiq prezident uşaqlıqdan çox rəhmli biri olub. Nəinki insanlara, heç heyvanlara belə zərər yetirməyib: “Elçibəy körpə olanda obada onu yatızdırıb mal-heyvan sağmağa gedirdik. Qayıdanda görürdük ki, nənnisinin altında ilan yatıb. Rəhmətlik Mehrab baba deyirdi ki, dəyməyin, ilan onun keşiyin çəkir. 6-7 yaşı olanda da bir yekə ilanı tutub gətirmişdi, nənəmə demişdi ki, cücü gətirmişəm. Nənəm də qorxusundan demişdi ki, hə bala, cücüdü, burax getsin. Sonralar da nə qədər ilan tutub gətirirdi, nə ilan onu çalmazdı, nə də o, ilanları öldürməzdi. Heç vaxt bir cücüyə olsun belə zərər verməzdi, heyvanlara sonsuz sevgisi vardı. Böyüyəndən sonra da ata hədsiz marağı, sevgisi vardı. Yaxşı at minərdi”.

Elçibəyin qardaşı daha sonra onun insani keyfiyyətlərindən danışıb: “Ürəyi yumşaq adam idi, küsülü qalmağı bacarmırdı. Kiməsə acıqlansaydı, beş dəqiqə keçməzdi ki, barışardı. Ürəyi yumşaqlıqla yanaşı həddən ziyadə səxavətli, yardımsevər insan idi. Bərabər yol gedərdik, elə vaxt olmazdı ki, maşını saxlatdırıb kiməsə pul verməsin. Heç özündə olmayanda da məndən alıb yolda gördüyü uşaqlara, tələbələrə verərdi. Səhər yüz manat cibinə qoysaydın, axşama ondan bir manatı qalmazdı. Pul onunçün heç nə idi, heç bilməzdi ki, pulu var, yoxsa yoxdu. Səhərlər onu zorla yedizdirib yola salırdılar. Səhərə qədər yatmırdı, ancaq oxuyurdu, yazırdı. Səhərə yaxın beşdə, altıda yatırdı, bir-iki saatdan sonra da durub işə gedirdi”.

Almurad Əliyev sonda qeyd edib ki, Elçibəyin indiyədək yazılmamış o qədər xüsusiyyətləri, keyfiyyətləri var ki, danışmaqla qurtarmaq olmaz: “Millətini hədsiz çox istəyirdi. Hələ 6-7-ci siniflərdə oxuyanda məktəbdə ona hamı millətçi deyirdi. Millətçiliyi onunla bərabər böyüdü, instituta girəndən sonra bu sahədə fəaliyyətə başladı. Heç həbs olunmaqdan da qorxmadı. Tutuldu da, türmədə olanda yanına getdim, gördüm tutulmaq da onu fikrindən döndərə bilməyib. İnanmıram ki, Elçibəy qədər vətənini, millətini sevən ikinci bir adam doğulsun”.