Xəbər verdiyimiz kimi, gücünü daha da möhkəmləndirmək istəyən Türkiyə prezidenti Rəcəb Tayyib Ərdoğanla baş nazir Əhməd Davudoğlu arasında soyuq münasibət daha da kəskinləşib. Xarici mətbuatın yazdığına görə  buna Davudoğlunun Avropa İttifaqı (Aİ) ilə razılaşma təşəbbüsünün də təsiri olub.

 Belə ki, Davudoğlu Ərdoğanla məsləhətləşmədən Aİ-yə üzv ölkələrə Yunanıstana gedən miqrantları Türkiyəyə yönəltməyi təklif edib və buna görə də prezidentin qəzəbinə tuş gəlib. Mətbuatda o da qeyd olunurdu ki, yaxın vaxtlarda Ərdoğan təşkil edəcəyi konqreslə Davudoğlunu “devirəcək”. Ancaq dünən Davudoğlu özü istefa anonsunu verdi. 

AKP daxilindəki bütün səlahiyyətləri əlindən alınan Davudoğlu lazım gələrsə, bütün vəzifələrindən imtina etməyə hazır olduğunu bildirdi. 

Burada digər bir məqam da var ki, Avropalı liderlər Ərdoğandansa Davudoğlu ilə işləməyə üstünlük verirlər. Çünki jurnalistlər əleyhinə iddia qaldıran, müxalif şəxslərə qarşı təzyiqlər edən və ona insan haqları barədə xatırlatma etdikləri üçün Qərbi azarlayan Ərdoğan getdikcə daha avtoritar lider kimi görünür. 

Və Davudoğlu ilə işləməyin əsas üstünlüyü də Ərdoğanla ünsiyyətdə olmamalarıdır.

Bəs bundan sonra Türkiyədə hansı hadisələr baş verəcək, Davudoğlu hakimiyyətdən gedəcəkmi, baş verənlərin Aİ-yə üzv olmaq istəyən Türkiyənin daxili siyasətinə təsiri olacaqmı? 

Moderator.az-ın bu və ya digər suallarına «Şərq-Qərb» Araşdırmalar Mərkəzinin rəhbəri Ərəstun Oruclu aydınlıq gətirib. 

Ə.Oruclu bildirib ki, bu baş verənlər əvvəlcədən gözlənilən idi: “Çünki Türkiyə prezidentinin mütləq hakimiyyət istəyi, onun siyasi opponentlərlə, ilk növbədə mediadan olan, hərbi çevrələrdən özünə rəqib bildiyi şəxslərlə, müxalifətə qarşı fəaliyyəti son nəticədə gəlib onun öz çevrəsinə, komandasına tuşlandı. Bu, siyasətin məntiqidir və bu da baş verdi, əslində gözlənilən idi. Davudoğlu istefa verəcəkmi? Bu bir qədər çətin sualdır. Təbbi ki, onun dünənki çıxışında görünürdü ki, istefa anonsu bir növ siyasi mesaj idi. O, istefa da verə bilər, amma onun istefa verməsi belə Ərdoğanın və AKP-nin uğuru olmayacaq. Bu, istənilən halda AKP-ni çətin duruma salacaq və AKP-nin siyasi böhranı qaçılmaz olacaq. Çünki bunun kökündə hakimiyyətin avtoritar siyasəti, o cümlədən də konkret olaraq Ərdoğanın bütün məsələlərdə avtoritarizmə üstünlük verməsi dayanır. Ona görə də Davudoğlunun istefa verib verməməsindən asılı olmayaraq, artıq AKP hökumətində çat baş verib. Düşünürəm ki, bu prosesin davamı olacaq”.

Ərəstun Oruclu hesab edir ki, Aİ-yə üzv ölkələrin Davudoğlunu daha çox tərəfdaş kimi görmələri də normaldır: “Çünki Davudoğlu strateji düşüncəli siyasətçidir, tamamilə normal və anlaşılandır. Ona görə də Aİ ölkələrinin də Türkiyəyə müəyyən təsiri olacaq. Həmçinin də bu, Ərdoğana ünvanlanmış konkret mesaj idi.  Artıq Qərb dünyası, Qərb dövlətləri, hansı ki, Türkiyə ilə münasibətləri çox intensiv şəkildə inkişaf edib, açıq şəkildə Ərdoğanın avtoritar lider olduğunu vurğulayıblar. Bu da Avropa ilə yaxınlaşmaq, Avropa Birliyinə üzv olmaq üçün yolverilməz haldır. Bunun da təbii ki, birmənalı şəkildə Türkiyənin daxili siyasətinə təsiri olacaq”.