Qanunvericiliyin tələbinə görə, bayrağın eninin uzununa nisbəti 1:2 olmalıdır.

Bayrağın üzərindəki aypara və səkkizguşəli ulduzun təsvirinə dair də tələblər var. Belə ki, Ayparanın təsviri konsentrik, yəni eyni mərkəzli olmayan iki dairənin hissələri şəklindədir. Böyük dairənin diametri bayrağın eninin 0,286-na, kiçik dairənin diametri isə bayrağın eninin 0,22-nə bərabərdir.

“Dövlət bayrağı haqqında” Əsasnamədə bayrağın rənglərinin konkret çaları da müəyyən olunub. Belə ki, bayraq hazırlanan zaman onun mavi rəngi "Panton" rənglər kataloqunun Blue 313 C rənginə, qırmızı rəngi - Red 185C rənginə, yaşıl rəngi isə Green 3405 C rənginə uyğun olmalıdır.

Bəs satışdakı bayraqlar bu tələblərə nə dərəcədə uyğundur? Dövlət tərəfindən buna nəzarət necədir?

İnzibati Xətalar Məcəlləsinə görə, Dövlət bayrağının qanunvericiliyin tələblərinə zidd istifadəsinə görə vəzifəli şəxslər 30 manatdan 40 manatadək miqdarda, hüquqi şəxslər isə 70 manatdan 90 manatadək miqdarda cərimə edilir.

Bununla yanaşı, Standartlaşdırma, Metrologiya və Patent üzrə Dövlət Komitəsi (SMPDK) də satışda qanunvericiliyin tələblərinə uyğun olmayan bayraqlara nəzarət edir. Qurumun mətbuat xidmətinin rəhbəri Fazil Talıblı da bir müddət əvvəl mətbuata açıqlamasında bildirib ki, bəzi hallarda xaricdən gətirilən bayraqların standartlara cavab vermədiyi müşahidə olunur. Məsələn, bayrağın rəng çalarlarının başqa cür olduğunu da açıq-aydın görmək olur.

“Belə halla rastlaşanda standartın tələblərinə uyğun olmayan bayraqların yığışdırılması ilə bağlı komitə tərəfindən tapşırıqlar verilir”, - komitə rəsmisi belə deyir.