Məlum olduğu kimi, fevralın 3-də Suriyanın Türkməndağı bölgəsində müxalif qüvvələrin həyata keçirdiyi əməliyyat nəticəsində 4 rus və 4 Əsəd generalı öldürülüb, xeyli sayda xəritə və məxfi materialların ələ keçirilib. Türkiyə KİV-nin verdiyi məlumata görə, ələ keçirilən xəritələrdə Rusiyanın Türkiyə ilə bağlı qorxunc planları yer alır ki, bu planlardan biri də Türkiyənin bütün İslam dövlətləri ilə sərhəd əlaqəsini kəsmək, onu xristian dövlətlərinin blokadası ilə əhatəyə almaqdır. Məhz bu planın üzə çıxmasından sonra bəzi siyasi ekspertlər Türkiyənin də öz növbəsində qəti addımlar atmasının vacibliyinə diqqət çəkib. Onların fikrincə, bu addımlardan biri Türkiyənin Suriya müxalif qüvvələrinə hərbi-kəşfiyyat yardımı göstərməsi, onların hərbi-texniki bazasının möhkəmləndirilməsi və s. ola bilər. Mütəxəssislər hesab edir ki, bu gün Rusiya-Əsəd rejiminə qarşı mübarizədə əsas tərəf kimi çıxış edən Suriya müxalifətinin məğlubiyyəti Türkiyəni ən təbii müttəfiqindən məhrum edəcək, onun bölgədəki vəziyyətini daha da ağırlaşdıracaq.

Maraqlıdır, Türkiyə Suriya müxalif qüvvələrinə hərbi yardım göstərməlidirmi? Suriyada Rusiyanın təsiri altında olan bir hakimiyyətin formalaşması Türkiyəyə təhlükə vəd edirmi?

Bununla bağlı Moderator.az-a açıqlama verən politoloq Qabil Hüseynli Rusiyanın Suriya ilə bağlı yürütdüyü siyasətin Türkiyəyə yaxşı heç nə vəd etmədiyini və Kremlin diktəsi altında fəaliyyət göstərən Əsəd rejiminin bu ölkə üçün real təhlükə formalaşdırdığını bildirib:

 “Təbii ki, Suriyada Rusiyanın nəzarəti altında olan, Kremlin göstərişləri ilə oturub-duran bir hakimiyyətin bərqərar olması Türkiyə üçün təhlükə kəsb edir. Bunun elementləri artıq indidən özünü göstərməkdədir. Baxın, Türkiyənin burnunun ucunda kürdləri silahlandırırlar. Kobani kürdlərinin silahlanması, hərbi təchizatının yaxşılaşdırılması istiqamətində ciddi iş aparılır. Digər tərəfdən, türkmənləri öz ərazilərində ya qırır, ya da doğma torpaqlarından uzaqlaşdırırlar. Türkiyənin sərhəddi yaxınlığında hərbi hava bazası formalaşdırmağa çalışırlar. Putinin fikri Türkiyə ilə Suriya arasındakı 910 km-lik ərazi boyu xüsusi zolaq yaratmaq və bu zolaqda Bəşər Əsədin qoşunlarını, habelə kürdləri yerləşdirməkdir. Bu, Türkiyənin strateji maraqları üçün ciddi təhlükə təşkil edir. Bu təhlükəyə qarşı da indidən müvafiq tədbirlər görülməlidir.

Bunu da qeyd etmək lazımdır ki, Türkiyə-Suriya sərhəddi həm də NATO-nun sərhəddi hesab edilir. Bu səbəbdən də NATO da bu məsələ haqqında düşünməli və müvafiq addımlar atmalıdır. NATO-nun bu məsələdə Türkiyəyə yaxından yardım göstərməsi, onu əsaslı şəkildə dəstəkləməsi vacibdir”.

Seymur Əliyev